1-2 апрелалда г1адатлъун лъугьана Хунзахъ Р. Х1амзатовасул ц1аралда бугеб спорткомплексалда т1обит1ана «Мужество» орденалъул кавалер, жиндирго рагъулаб налъи т1убазабулаго къадаралде щварав бах1арчи, Х1усейнов Мух1амад рак1алде щвезавиялъул мурадалда бат1и-бат1иял соназ Хунзахъ гьоркьохъеб школа лъуг1арал выпускниказда гьоркьоб волейболалъул турнир. Гьеб т1обит1улеб буго районалда 1995 соналдаса нахъе гьеб бухьинабун буго Мух1амадил ц1аралда. Цереселго г1адин исанасеб турнирги г1уц1ун бук1ана бах1арчиясул гьудул-гьамагълъиялъул, г1ага-божаразул, цадахъ х1алт1аразул ва ц1аларазул х1аракаталдалъун.
Исанасеб турниралда г1ахьаллъи гьабуна кинабниги 12 командаялъ. Гьезда гъорлъ рук1ана ахирал соназ школа лъуг1арал г1исинал г1олилаздаса байбихьун, к1икъоялда анц1илъа сонал арал волейболалъул ветераназде г1унт1унги бат1и-бат1иял г1елазул командаби.
Турнир рагьулаго к1алъазе вахъарав райадминистрациялъул лъайкьеялъул отделалъул нухмалъулев Залимхан Г1умаровас данделъаразе саламги кьун баркана гьезда иргадулаб нухалда гьадин берцинго данделъизе щвей ва киназего бит1ккей гьарана. Бах1арчиясул классцояв Локалов Мух1амадица Х1усейновасул г1умруялъул ва бах1арчияб хвалил х1акъалъулъ бицана, гьединго раг1и кьуна г1ахьаллъулел командаби ругелг1ан мехалъ, жидеца гьаб турнир гьоркьоб къот1изе телариланги. Турнир рагьи берцин гьабун бук1ана Расул Г1амирхановас куцарал г1исинал акробатазул церерахъиналъги.
Хадуб байбихьана х1аязде. Командаби рикьун рук1ана к1иго подгруппаялде. Щибаб группаялдаса полуфиналалде борч1изе рес бук1ана к1и-к1и командаялъул. Гьедин к1иго къоялъ халат рахъарал х1алуцарал х1аязул х1асилалде полуфиналалда дандч1вана 2004-2010 ва 2003-2008 соназул командаби. 2-1 ва 2-0 х1исабгун дандиязда т1ад бергьенлъи босун финалалде рач1ана 2008 ва 2004 выпусказул волейболистал. Байбихьудаго х1алуцана гьезул х1ай. Халат бахъараб къеркьеялъул х1асилалда 2-1 х1исабгун бергьенлъи босана 2008 сонил командаялъ. Лъабабилеб бак1 щвана 2003 соналъ школа лъуг1араб командаялъе. Турниралъул г1ажаиблъилъун ккана киназего бищун заг1ипаздасан цоябин рик1к1унеб бук1араб 2010 соналъул выпускалъул команда полуфиналалде бач1инги.
Тадбир къалаго, гьеб г1уц1аразе ва г1ахьалчаг1азе баркала загьир гьабун к1алъана районалъул спортивияб отделалъул начальник Х1айдарбегов Г1абдулкъадир ва бах1арчиясул классцояв Малачиев Малачи. Призалъулал бак1ал ккурал командабазе кьуна кубок, грамотаби ва медалалгун г1арцулал сайгъаталги. Хасал сайгъатал кьун к1одо гьаруна цересел бак1ал ккурал командабазул бищун лъик1ал игрокалги: Гъайирбегов Гьит1ин (2011); Мух1амадсайгидов Арсен (2004); Мух1умаев Мух1амад (2010); Мах1мудов Мух1амад (2008); Хочоев Халид (2003); бищун лъик1ав болельщик х1исабалда сайгъат кьуна Г1амирг1алиев Гьиматие.
Ахиралдаги турниралъул чемпионлъун бахъараб 2008 соналъул командаялъул рахъалдасан к1удияб баркала кьолеб буго тренер Малачиев Шамилие ва турнир г1уц1аразе.
И. Мух1амадов
|