Къо бахъанаг1ан мигьлъулел, дагьлъулел руго К1удияб Ват1анияб рагъул  г1ахьалчаг1азул кьерал. Нилъер бук1инеселъе г1оло рух1алда барахшич1ого рагъарал, ракълилаб зах1маталъулъги ц1ик1к1арал церет1еял рихьизарурал гьезул жакъа къоялде районалда хут1ун вуго 8 чи. Гьел мустах1икъалги руго  нилъер  кидагосеб т1алаб-агъазалъе, адаб-хъатиралъе, реццалъе. Районалъул администрациялъ кидагосеб т1алаб-агъаз гьабулаан рагъул г1ахьалчаг1азул ва рагъда росал хут1арал руччабазул. Районалъул бет1ерлъуде  Саг1ид Юсупов  вач1аралдаса гьезул гьабулеб т1алаб ц1акъго  ц1ик1к1ана. Гьесие хасиятаб буго щивав рагъул г1ахьалчиясухъе живго щвезе, гьезул г1олел г1оларел рахъал ц1ехезе ва жиндир заманалда гьезул т1алабал т1уразаризе ресал ратула Саг1ид Камиловичас.  Рагъул г1ахьалчаг1азе  ва рагъда росал хут1арал руччабазе гьабулеб г1арцулаб кумек к1иго нухалъ ц1ик1к1инабуна гьес. Гьаб ахираб щуго-анлъго соналъ «Сулахъэнерго» ва «РусГидро» г1уц1абазул нухмалъулезги ц1ик1к1араб х1алт1и гьабуна рагъул г1ахьалчаг1азе кумек гьабиялъулъ . Рес бугеб, гьеч1еб мех  бук1унелъул, гьанжелъизег1ан гьабураб кумекалъухъги к1удияб баркала буго гьезие.  Рагъул г1ахьалчаг1аз, районалъул ветераназул  советалъ к1удияб адаб-х1урматалда рак1алде щвезавула, кидаго жидер  т1алаб-агъазалда вук1арав  мунагьал чураяв Гьоц1алъа1  Саг1идов Мух1удада. Лъик1ал раг1абаздалъун рехсола  сахаватчаг1и  - Къурбанов Арсен, Х1амзатов  Майндур, Х1аштихов Х1ажимурад, Г1исаев Мух1амад, Х1амзатов Х1осен ва гь.ц.  Хунзахъ администрациялъул бет1ер Т1алхатов Хизрица ресал ратула рагъул г1ахьалчаг1азе, Афганалъул рагъул г1ахьалчаг1азе г1арцулаб  кумек гьаби гуребги гьезул т1алабал т1уразаризеги. Гьедин, жидер бугеб ресалда рекъон рагъул г1ахьалчаг1азе, рагъда росал хут1арал руччабазе кумек гьабулареб росдал администрация цониги гьеч1илан абизе бегьула.  Районалъул ветераназул  советалъул гьари буго лъай кьеялъул отделалъул, Хунзахъ, Гьамищт1а СПК-язул нухмалъулезде ва цогидалги идарабазде  г1умруялъ жидер г1уц1абазда х1алт1улел рук1арал рагъул г1ахьалчаг1и к1одо гьарулел рук1араб, гьанже к1очон тараб г1адат ц1и  гьабейилан. Жалго рагъул г1ахьалчаг1азул бицани, ч1аго ругел 8 ясул к1игояв вуго  ч1аголъиялда вугев. Х1адисов Камилги, Хъазанбиев Гъазиявги, Г1умаров Х1амзатги, Гьит1иновасов  Маламух1амадги бусен ккун гьеч1ониги, жани-къват1ире рахъун бажарулеб х1алалда гьеч1о. Мирзаг1алиев Мух1амадмирза Мах1ачхъалаялда жиндиего  хасиятаб ч1аголъиялда вуго. Мусаев  Шайихг1алиги Буйнакскиялда  цойгидазул кумекалде х1ажалъулев х1алалда вуго къват1и-рокъове вахъун, жиндиего ч1аголъиялда вуго Мух1амадов Г1иса. Къо х1ехьеялда вуго Гьиматов Мух1амадрасул. Гьев г1амал берцинав, г1адатияв инсанас т1аде къабул гьарула журналистал, районалъул школазул ц1алдохъабигун цадахъ тарбия кьолел. Живго уна ах1арал школазде, ясли-ахазде. Киг1ан жиндие зах1мат бугониги гьес жеги жив ах1араб  коллективалъе инкар гьабич1о. Жив сабаблъун, гьез г1уц1улеб бугеб тадбир хвезабизе бегьуларилан абула гьес. Школал, ясли-ахал, гьесулгун дандч1ваял г1уц1арал идараби ц1акъ разиго рук1уна  Мух1амадрасулидаса. Гьезул мурад т1убазе щвеялдаса рек1ее асар лъугьунилан бицуна гьесги. Гьел рагъул г1ахьалчаг1азе нилъ кидагосел налъулал руго ва  рук1инеги руго. Нилъеца жидее гьабулеб кумекалде ккарал чаг1и жал  гуриланги абула гьезул цо-цояз, амма районалъул ЦСОНалъул х1алт1ухъабазулги,  районалъул газеталъул коллективалъулги, ветераназул  советалъулги цадахъаб акция бук1ана Бергьенлъиялъ 70-сон т1убаялде рач1унаго  щивав рагъул  г1ахьалчиясухъе щвезе, ЦСОНалъ х1адурун рук1ана гьезие сайгъаталги, бихьулеб бук1ана гьезул рак1азе лъик1аб асар  гьабураблъи. Гьезда жал к1очон  гьеч1олъи, жидеда бихьараб къо г1адада ккун гьеч1олъи лъараб г1адаб  пикру бач1ана нижер  гьезухъе щвараб мехалъ.

Нижеца, районалъул ветераназул советалъ, ЦСОНалъул х1алт1ухъабаз, районалъул редакциялъул коллективалъ киналго районцояз ах1ула рагъул г1ахьалчаг1азе, рагъда росал хут1аразе нилъедаса бач1араб, бажарараб кумек гьабизе. Гьеб гьабизе к1веялдаса ва щвеялдаса разилъи, рек1ей парахалъи лъугьина нужейги.

Нилъер, щибаб росулъ руго рагъда т1аг1аразе рарал памятникал. Районалъул бет1ерасул  март моц1алда бук1араб буюрухъалда рекъон гьел киназего гьаруна ремонтал. Уздалросулъ ц1игьабун балеб бугеб памятникги гьал къоязда лъуг1изе буго. Г1арцул г1унгут1и сабаблъун Г1ахьалч1и бугеб мемориалияб  комплекс лъуг1иялда х1инкъи бук1ана амма росдал бегавулас гьелъиеги ресал ралагьана. Ц1акъ к1удияб ва берцинаб реставрация гьабуна  Хунзахъ мемориалияб  комплексалъе. Гьеб къокъаб заманалда лъуг1иялъе к1вах1-свак  лъач1ого х1алт1ана  Х1асанов Г1абдулагьица нухмалъи гьабулеб бригада. Гьанже гьеб  памятникалъги, гьелда  сверухъ бак1алъги бат1ияб асар гьабула гьеб  бихьаразе. Хьул буго, нагагь г1иси-бакъинал х1алт1аби хут1ун ратани, гьал хинал къояздаса пайдаги босун, Маялъул  байрамалде памятниказул бат1ияб берцинлъи  лъугьинилан.

Г1. Г1алих1ажиев, районалъул ветераназул  советалъул председатель.