К1удияб Ват1анияб рагъда умумул, г1ага-божарал г1ахьаллъич1еб хъизан къанаг1атги хут1ун батиларо нилъер пачалихъалда. Гурх1ел-ц1об гьеч1ев г1алхулав тушманасдаса инсаният хвасар гьабурал бах1арзал абадиялъго к1оченч1ого рук1инелъун, щибаб шагьаралда, росулъ ран руго памятникал. Нилъер районалда бук1инч1о, гьеб росу биххун бук1иналъ, г1иц1го Илълъаса рагъдаса руссинч1езе бараб памятник. Гьанже гьеб росу, цо-цоял г1умру гьабизе рахъун, ц1илъулеб буго.
2013 соналъул май моц1алъ, гьениса инсул рахъ кколев Артцул Шамилица байбихьана рагъдаса руссинч1езе памятник баялъе х1алт1аби гьаризе. Х1алт1абазде гъорлъе журана цойгидал росуцоялги: Шамилил Г1алил Саг1адатица гьабуна г1арцулаб кумек, х1алт1удалъун, материалалдалъун бажарараб кумек гьабуна Дадаев Гьит1их1ица, Г1алиасх1абил Мух1амадица, Сайгидил Мух1амадица, Х1асаница, Дибирица ва цогидазги.
Памятник буго цойгидал обелисказда релълъинч1еб, к1амуриялъухъего гьабураб, гьелда т1огьиб рала Россиялъул, исламалъул ва 9 маялъ-СССРалъул байрахъалги. 9 маялъ гьаниб Вечный Огонь бакулин жидецаян бицана Ш. Артцулица. Памятник к1амуриялъухъе гьабиялъул буго к1иго маг1на: цо-г1олохъаби рагъде индал росу ва гьелдаго цадахъ улбузул рак1алги ч1обоголъанин абулеб ва к1иабилеб-к1амуриялда нуц1би гьеч1елг1адин жал хвезег1ан рахач1ого рагьарал рук1анин умумузул рукъалъул нуц1би васал т1ад руссиналъухъ ралагьун абураб.
Илълъа бараб памятник цебего бан бахъун буго, хут1ун буго гьеб официалияб къаг1идаялъ рагьизе. Шамилил г1ага-божаразда рак1алда буго гьеб рагьараб къоялъ гьениб мавлидги ах1изе.
Памятникалда аск1обго гьев росдал патриотасул жигарчилъиялдалъун балеб буго кверкьей лъолеб рукъги. Раг1алде бахъаги гьеб лъик1аб байбихьиги.
Баркала буго нилъерго бах1арчиял умумузул ц1арал даим гьаруразе.
П. Гунашева.
|