Г1адатлъун лъугьун буго районалъул нухмалъиялъул щибаб лъаг1алил байбихьуда г1ат1иракьалда ругел районалъул маг1ишатазде сапар бухьун, г1адатал г1адамалгун дандч1ван, гьезул ах1вал-х1ал ц1ехей. Гьедин, 12 февралалда Бабаюрт мухъалда ругел «Ленинил», «Машгьурал г1адамал», «Гьамишт1а» маг1ишатазде щвана «Хунзахъ район» муниципалияб районалъул бет1ер Саг1ид Юсупов ва бат1и-бат1иял хъулухъ-ишазул нухмалъулелгун специалистал. Улкаялъул Президентасул рищиязде хъутабазда унеб бугеб х1адурлъиялъухъги балагьун, гьалбал щвана г1и-боц1ул фермабазде, боц1ухъабазул къавуде, ц1ехана хасел т1амиялъул, раг1и-хералъул нахъраталил, къинлъул кампания иналъул.
Г1емерсоназулаб, рак1бац1ц1адаб зах1маталъухъ цо-цо росдал маг1ишаталъул х1аракатчаг1азе кьуна райадминистрациялъул Х1урматалъул грамотабиги. Гьале гьезул цо-цоял: «Ленинил» СПКялдаса председатель Расулов Х1усен, доярка Хирачилаева Пат1имат, вехь Сулейманов Х1усен. Гьамишт1а маг1ишаталдаса-дояркаби: Бекбулатова Марина ва Х1амзатова Г1унайзат, «Машгьурал г1адамал» маг1ишаталдаса-к1удияв вехь Х1айбулаев Муслим, доярка Мух1амадова Пат1имат ва гь.ц. Кинавниги 21 чиясдасан г1уц1араб къокъа к1одо гьабуна районалъул т1алъиялъ баркала-шапакъаталдалъун гьеб къоялъ. Г1агараб заманалда жаниб гьебго мурадгун нухмалъулезул къокъа щвезе буго Хъумторхъала, Кизилюрт, Хасавюрт мухъазда ругел маг1ишатаздеги.
Ф. Мух1амадова
|