9 февралалда Мах1ачхъалаялда  поэзиялъул рокъоб т1обит1ана  «Дун гьаюна хасало» абураб Дагъистаналъул халкъияй поэтесса нилъер ракьцояй Фазу Г1алиева рак1алде  щвезайиялъул сордо. Гьениб г1ахьаллъи гьабуна республикаялъул  нухмалъиялъ, маданияталъул ва исскуствоялъул вакилзабаз, поэтессаялъул г1ага-божараз, гьелда цадахъ х1алт1араз.

Республикаялъул бет1ерас бицана, поэтесса нилъедаса ят1алъи к1удияб камилъун кканин г1иц1го гьелъул г1ага-божаразе гуребги т1олабго  Дагъистаналъегиян. «Фазу Х1амзатовнаялъе киналго  дагъистаниял кколаан г1ага-божараллъун, щайгурелъул гьелъие кутакалда бокьулеб бук1индал Дагъистан ва киналго дагъистаниял. Гьей  жиндирго г1амал-хасияталдалъун кидаго йик1ана дагъистанияйлъун. Кий гьей йик1аниги, гьелъ жиндирго рек1елъ кидаго ц1унун бук1ана жиндирго росу-ракь, жиндирго т1алъи. Гьей йик1ана х1еренай эбеллъунги, лъик1ай лъадилъунги, бажари  бугей пачалихъияй ва жамг1ияй х1аракатч1ужулъунги. Жиндир ахирисеб къоялде щвезег1ан, гьей йик1ана ц1ияб жо  г1уц1улейлъун ва  гьелда т1ад ургъулейлъун. Фазу лъалей йик1аралщинал рук1ине ккола гьелъул пикруцояллъунги гьелъул поэзия халкъалда гьоркьоб т1ибит1изабулеллъунги. Дида рак1алде  ккола Фазу Х1амзатовнаялъ жиндирго асаразулъ щивав дагъистаниясул г1умруялде к1вар кьунин. Гьелъги бицунеб буго, гьей рак1 рагьарай ва киналъулго ургъел гьабулей инсан  йик1араблъи. Узухъда,  гьелъие кутакалда рокьулаан жиндирго васал. К1удияй поэтесса йик1иналда цадахъго, ункъго вас гьави ва тарбия-лъай кьун гьел г1езари – гьеб ккола унго-унголъунги к1удияб иш. Г1емерисезда абизе к1ола гьей лъик1ай гьудул-гьалмагълъунги йик1анилан.  Дир рак1ч1ола Россиялъул  ва Дагъистаналъул халкъал регебг1ан мехалда Фазу Г1алиевалъул ц1ар ч1аго хут1изе бук1иналда»,- ян абуна Рамазан Х1ажимурадовичас.

Дагъистаналъул хъвадарухъабазул Союзалъул председатель Мух1амад Ах1мадовас бицана жив жеги божулев гьеч1ин  халкъияй поэтесса нилъгун цадахъ гьеч1ин абураб жоялдаян.

«Хъвадарухъан Константин Симоновас хъвана гьудулзаби холарин, гьел г1иц1го нилъеда аск1оса нахъе унилан. Гьединалго раг1аби абизе бегьула Фазул х1акъалъулъги.  Гьей йик1ана жиндилъ к1удияб махщел ва бихьинчилъи бугей г1аданлъун. Дида  кидаго рак1алде кколаан, гьей киданиги хвеч1ого абадиялъ нилъгун цадахъ йик1инилан. Гьединго кколаан дида Расул Х1амзатовасда хурхунги. Дида цебе ч1езабизе к1олароан гьел гьеч1еб г1умру, рак1алде кколаан гьел къанщидал улкаги, республикаги, поэзияги щущан инилан. Х1акъикъаталдаги, гьел к1иялго к1удиял  шаг1ирзаби цереса индал, поэзиялъул дунял бесдаллъанин абизе бегьула. Дие рокьулаан гьелъул асарал ц1ализе, дир куч1дул гьелъиеги рек1ее г1олаан. Дие гьей йик1ана унго-унголъунги к1удияй гьудуллъун. Дир рес бук1ана бокьараб мехалда гьелъухъе г1акълу  дандбазе ине ва гьелъ кидаго дие кумекги гьабулаан дир творчествалъул нухда»,- ян абуна Мух1амад Ах1мадовас.  Ахиралда гьес ц1алана  Фазуде жинцаго гьарурал  куч1дулги.

Республикаялъул ТОКСалъул командир, х1алхьиялда вугев генерал-майор Г1умар Муртузалиевасги бицана улкаялъеги  республикаялъеги х1инкъи бугеб заманалда поэтессаялъ бихьизабураб къвак1иялъул ва х1инкъи гьеч1олъиялъул. «Дида рак1алда буго 1999 соналъ гьелъ жиндаго т1адаблъун рик1к1унеб  бук1ана террористаздаса нилъер республика ц1унун  рагъулезухъ хьолбохъ ч1езе.  Гьеб х1алуцараб заманалда гьелъ рахъ ккуна  Дагъистан Россиялда гъорлъ ц1унун хут1иялъул. Фазу нилъедаса ят1алъаниги гьей кидаго хут1ила нилъер рак1алде щвеязулъ, щайгурелъул, гьелъие рух1г1ан хирияб бук1индал  Дагъистан, киданиги хисич1о гьудуллъиялъе, гьей йик1ана ва хут1ила Дагъистаналъул гвангъараб ц1валъун. Г1умрудул ахирисеб къоялде щвезег1ан, г1емераб х1алт1и гьабуна гьелъ нилъер республикаялъул ц1ар раг1изабизелъун, к1удияб бут1а лъуна нилъер  г1адамазул, хасго  г1олилазул рак1азулъ Ват1аналде рокьи бижизабиялъулъ. Гьей йик1ана нилъер  республикаялъул ц1ар раг1изабурай г1аданлъун ва  нилъеца жеги г1емераб жо гьабизе ккола абадиялъго гьей нилъер рак1азулъ хут1изелъун»,- ян абуна генерал-майорас.

Гьединго, поэзиялъул  рукъалъул сценаялда Фазу Г1алиевалъул х1акъалъулъ  жидерго рак1алде щвеязул бицана Дагъистаналъул халкъияв поэт Мух1амад Х1амидовас, республикаялъул халкъияв хъвадарухъан Мух1амадрасул Расуловас, цее Дагъистаналъул йик1арай пачалихъияй секретарь Ажа  Г1абдурах1мановалъ ва  цогидазги. Киналго к1алъазе рахъараз бицана Фазу Г1алиевалъ жиндирго творчествоялъе рит1ухълъи ц1унанин абун.

Вечералда ах1ана Фазу Г1алиевалъ хъварал куч1дул ва рихьизаруна поэзиялъул композициял. Гьединго,  тадбиралъул  программаялда рук1ана  театралъул артистаз ва концерталъулал г1уц1абаз бихьизабураб гьит1инабго концертги.

Х1акъикъаталдаги, Фазу Г1алиева йик1ана Дагъистаналъул гвангъараб ц1валъун, гьелъ меседил  х1арпаздалъун хъвана жиндирго ц1ар Россиялъул ва Дагъистаналъул адабиятазул фондалда. Абадиялъ нахъе хут1ила дунялалъул 68 бат1иял мац1азде  руссинарурал гьелъул  пероялъ хъварал ункъогоялдасаги ц1ик1к1ун  поэзиялъул ва прозаялъул  т1ахьал.