Инсудасан щвана дие кинабго лъик1абщинаб

Цо-цоязда рак1алде кколеб батила райкомалъул секретарасул ясалъул  лъидасаго т1ок1абги, бигьалъаби г1уц1арабги г1умру бук1ун батилилан. Амма бук1ана гьелъул г1аксалда – гьит1инаб къоялдаса нахъе сундулъго т1алабчилъиги, г1адлу-низамги, жавабчилъиги  ц1ик1к1араб бук1ана дида т1ад лъун. Рак1алда буго инсуца цо командировкаялдаса дие бач1ун бук1ана чинидул щакъит1ел. Гьелда т1ад хъван рук1ана гьадинал раг1аби, «Отлично учись, честно трудись». Нагагьлъун цойгидаздаса  заг1ипго дарсазде х1адурун дун яч1ани, учительницаялъ дида бихьизабулаан гьеб сайгъат ва дун намуслъулаан гьелда т1ад хъварабги рак1алде щун х1акимлъиялде, власталде гьет1и бугев чиясул лъимал рук1унилан, нужее г1умруялда щибго бигьалъи, т1ок1лъи бук1ине кколарилан абулаан нижеда  инсуца кидаго. Нужедаса  лъабго нухалъ ц1ик1к1ун т1алаб гьабизе  кколин х1алт1улъги ц1алулъгиян. Гьедин, г1умруялъго дун рак1бац1ц1адго  х1алт1ана. Лъала, дида хадуб хъаравуллъи ккун буго инсул ц1одораб бер. Дир я  г1умрудулъ, я х1алт1улъ гъалат1 ккезе ихтияр  гьеч1о, гьевги  нахъа вук1ун. Эмен дидаса вохизе ва ч1их1изеян т1амуна щибаб галиги.  Инсанасул хасиятазул лъик1абщинаб дие щвана  инсудасан: зах1мат бокьи, жамг1ияталъе пайдаяйлъун йик1ин, чиясе кумек гьабизе бокьи. Дир кабинеталъуса мурад т1убан, разиго чи къват1иве вит1изе х1аракат бахъула дица. Инсул г1умруги гьедин индал. Гьасаг1атги гьединавлъун хут1ун вуго гьев. Чиясе жиндасан бач1араб кумек гьабизе, г1умруялда лъугьунеб толелда гьоркьоса вахъунгут1изе жигар бахъула гьес. Жиндир г1умруялда кинабго бихьарав: инкъилаб рагъ, рагъда хадусел ракъарал сонал,  перестройкаялъул бигъараб  заман – инсул  г1акъиллъиялде, х1албихьиялде гьаб жакъаги рак1арула ниж малъа-хъваязда хадур. Гьаб жакъаги х1ажатаб буго гьесул раг1и г1олилазда маслих1ат гьабиялда гьоркьоб, политикаялда. Гьел ишазулъ эмен нахъе къанги ч1оларо. Руго г1адамал 40-45  сон баралги, жал г1умруялда ратич1ел, риларал, лъугьукъал. Амма кинаб г1акъуба-зах1малъи бихьаниги кинаб заман т1аде бач1аниги, Махуласул Мух1амад хут1ана живго вугев  лисностьлъун. Жиндирго г1умрудул нухгун, пикругун, ях1гун. Дун ч1ух1арайги йиго гьесул яслъун ятиялдаса. Амма  инсул г1амалазул бищун дие бокьулеб  кинабин гьикъани, дица абила – нижер эбелалъул гьес гьабулеб т1алаб-агъазги гьелъул бугеб ургъелги бугилан. Нижер гьит1инай яцалъул хвалил рух1елалъ эбелалъул к1иц1улго  ккана инсульт. Циндаго сахай ч1ужуг1аданалъул г1умру лъагьана чияр кверазда, т1алаб-агъазалда бараблъун. Амма инсуца гьелъухъе бегьана жиндирго къуватаб квер, йиччач1о гьей тархъизе. Нижедагицин божун толаро инсуца гьей: «Дир Саг1адат, мун кваназаюнищ?», «Саг1адат, дуе щиб бокьилеб?», «Саг1адат , унтулеб бак1 бугищ?». Гьединав вуго эмен рос. Нагагьабги 8-леб март бук1унаро инсуца эбелалъе байрамалъулаб  т1огьол квац1и кьеч1еб. Тобтил раг1алда тира-сверизе яцгун индал, инсуца  гьейгун цадахъ цин  бак1арулеб бук1ун буго гьелъие жиндиего т1огьол гул, рукъоре унагойин абуни , «Рач1а гьанже эбел  йохизайизе  долъиеги рет1изеян»,  жувалев вук1ун вуго хъизаналъул х1уби, гьеб ккурав, хъизамалъул кодексалъул бищун лъик1ал г1адатал ц1унарав чи. Гьединав вуго эмен. Сундулъго  жавабияв, жиндего т1алабчилъи ц1ик1к1арав. Районалда дур юбилей гьабизеян ругин, дуе зах1малъиларищ хасало маг1арухъе вахинеян гьикъидалги, гьес дие жаваб кьуна: «Дида г1адамаз абухъе гьабизе кколин дица»,- ян. Гьелъги бицуна г1емераб.

М. Махуловасул яс Пат1имат Махуловалъул раг1абаздасан хъвана редактор Ф. Мух1амадовалъ.

Сураталда: Пат1имат Мух1амадовна х1алт1уда нахъа.