Бит1араб бицани районалъул бет1ерлъуде г1олохъанчи  Юсупов Саг1ид Камилович вач1араб мехалда, дида рак1алде кколеб бук1ана зах1матаб х1алт1иги  бугила, бег1ерал г1адамалги ругила, гьабунго бажариладай х1алт1иян. Амма бихьулеб буго гьесда ва гьесул командаялда х1алт1и гьабизе лъалеб бук1ин.  Муг1рузул районазда гьоркьоб т1ибит1араб къецалда район экономикияб рахъалъ цебет1езабуралъухъ нилъер  районалъе щвана 1-себ бак1.

Балагье сверухъе. Цебе пакетазги, магъакь-к1ачаралъги ц1ун бук1унеб бук1араб сверухъ бак1алъе бач1ун бугеб берцинлъи. Районалда ч1аралщинал гъут1би к1удиял г1уни х1ухьбахъи гьабулезе санаг1алъи аск1осан унезе раг1ад, гьаваялъе бац1алъи, черхалъе сахлъи гьеб сундухъ кьолеб буголъи.

Хал гьабе Хунзахъ К1удияб Ват1анияб рагъда т1аг1аразул х1урматалда бараб памятникалда сверухъ ч1ун ругел ёлкабаз сверухълъиялъего кьун бугеб берцинлъи, Хунзахъан Ц1адаре, Г1ободе, Бакьагьеч1ибе, К1ахъе унел нухазда лъугьинабун бугеб бер т1аде ц1алеб ах1вал-х1ал. Дун щвана Харахьиеги. Гьенибги сверун къан руго хабзал, къач1ан руго нухал, ч1ун руго гъут1би. Абула ч1араб гъвет1алъ гьеб ч1арав чиясе сахлъи гьарулилан.

Сахлъиялда хут1аги нилъер районалъул киналго г1адамал. Гьел гъут1би ч1езе цебехъанлъи гьабурав Саг1ид Камиловичасеги, гьесул командаялъеги гьарула сахлъи, рохел, Аллагь разияб г1умру.

Замлу Батирова, халкъияй шаг1ир.

Дида Саг1ид Камиловичасул эменги, инсул вац Юсупов Мух1амад Саг1идовичги ц1акъ лъик1 лъалаан. Саг1идил эмен Юсупов Камил Саг1идович т1амун  вук1ана Кизилюрталъул районалда бугеб нахъе ккараб совхозалъул директорлъун. Гьес гьеб бачана бищунго лъик1ал совхозазул кьеразулъе. Гьелъие кьун бук1ана  Зах1маталъул Баг1араб Байрахъалъул орден.

Саг1ид Камиловичасул имг1ал Мух1амад Саг1идович гъоб заманалда вук1ана горисполкомалъул председательлъун. Гьес рарал рук1ана доб заманалда Мух1ачхъалаялда ругел киналго г1емерал этажазулал минаби.

Гьезул вас ва вацасул вас Саг1ид Камиловичасги нилъер районалъе гьабулеб х1алт1и лъик1аб байбихьигун гьабулеб буго.

Хал гьабе нилъер райцентралъухъ. Цо кинабалиго ц1илъи бач1инабун буго гьенибе. Культураялъул к1алг1аялда цебе бугеб Х1ажимурадил парк, Культураялъул к1алг1аялда жаниб ва щибаб росулъ рагьун руго нилъер умумузул г1адатазул ва рук1а-рахъиназул бицунеб центр, Расул Х1амзатовасул мемориалияб комплекс.

Гьединго лъик1аблъун бихьулеб буго кьоял гьариялде, нухал къач1аялде Дагъавтодоралъул нухмалъулев Загьид Хочбаровгун цадахъ гьес кьолеб бугеб к1вар.

Дун вохула нилъер районалда ва росулъ сахаватал, лъик1лъи гьабизе бокьарал, росу-ракь хириял г1олохъаби рук1иналдаса. Хунзахъа Малачиев Гъазица сурсаталги кьун гьабулеб бугилан бицана дида Хунзахъ героязул ц1аралда бугеб парк, Х1ажимурадил ц1аралда бугеб паркалъе жинда к1вараб кумек гьабун буго Мух1умаев Гъазаг1илас. Гьел ва цогидалги х1алт1аби гьарун бажарулароан, гьелъие нухмалъи гьабизе г1акъилаб бет1ер бугев  администрациялъул бет1ер Юсупов Саг1ид Камилович вук1инч1евани.

Мискинзабазул г1ет1 т1ун гьабураб х1алт1и, гьезул бугебниги буголъи данд бан г1уц1ун рук1ана колхозалъул маг1ишатал, гьанжесел СПКял.

Гьел рехун, щущан унел руго ахираб заманалда. Лъик1аб бук1инаан гьел ц1илъизаризе кинал рук1аниги ресал ратулелани, гьединго районалде газ бачиналъул суалги роц1инабуни.

Ах1мадов Халилбег Мух1амадович, Россиялъул промышленносталъул мустах1икъав х1алт1ухъан.

Махулова Пат1имат, поликлиникаялъул заведующая

Дие кутакалда рек1ее г1олеб буго Саг1ид Камиловичасул ва гьесул командаялъул х1алт1и.

Гьезие хасиятаб буго г1адамалгун г1адатияб къаг1идаялда рук1ин, ч1ах1иязул адаб гьаби, гьит1иналгун рекъон х1алт1и, г1аммаб къаг1идаялда босани, инсан вокьи.

Дие Саг1ид Камиловичасул рек1ее г1ола, дун администрациялъул бет1ер вугилан ч1еч1ого, щиб х1алт1и гьабулеб бугониги, гьев живгоги гъорлъе лъугьун х1алт1и гьабизе лъугьунев вук1ин, гьесул жиндехунго ва жиндиего мут1иг1аздехун бугеб т1алабчилъи, щибаб г1уц1иялда х1алт1и г1уц1ун бугеб куц, планалда рекъон т1уразарулел ругищ гьез жидеда цере лъурал масъалабиян халгьаби. Гъутаназде хьвадунцин, районалъул росабазул маг1ишатазда ваккунги, г1и-боц1ул бугеб ах1вал-х1ал лъазаби.

К1вар кьеч1ого толаро гьес лъай кьеялде, спорталде, районалда рац1ц1а-ракъалъи ц1униялде.  Бер г1орц1улеб гьеч1о гьес нилъер росаби къач1ан ругеб куцалъухъ балагьун.

Районалъул экологиялъул рахъазул бицани, нилъ нуг1заллъун ккола Саг1ид Камиловичас ва гьесул командаялъ т1орит1улел ругел субботниказе, нухлул раг1аллъабазда ч1олел гъут1бузе, г1адамазе, ай лъималазе, г1олилазе, ригь аразе х1ухьбахъи гьабизе гьарулел берцинал г1урччинал парказе.

Хасго к1вар кьезе бокьун буго районалъул сахлъи ц1униялде гьез кьолеб бугеб к1варалде. Сахлъи ц1униялъул ах1вал-х1ал ц1акъго к1вар бугеблъун ккола районалда. Живго Саг1ид Камиловичас к1вар кьола сахлъи ц1униялда цере ч1арал масъалаби т1уразарулел ругеб куцалде.

Гьесул нухмалъиялда гъоркь бан лъуг1изабуна централияб больницаялъул ц1ияб поликлиника. Дида рак1 ч1ун абизе к1вела нилъер районалдаг1адаб киналго квег1енлъабиги жанир ругеб берцинаб поликлиника Дагъистаналда кибниги батиларилан. Гьениб щивав унтарасе рес буго минаялъуса къват1иве вахъинч1ого киналго медицинаялъулал халгьабиялги консультациялги щвезе.

Сахлъи ц1униялъул рахъалъ районалда вугев куратор С. Батировасги х1исабалде босула районалъул больницаялда бугеб ах1вал-х1ал. Гьев г1ахьаллъула  щибаб анкьалъ больницаялда т1орит1улел совещаниязда. Г1енеккула нижер суалазухъ ва жавабазухъ.

Дица рик1к1уна Саг1ид Камиловичасда ва гьесул командаялда х1алт1изе лъалеб бугин, жидеда цебе ч1араб х1алт1и мурадалде щвезабизелъун жамг1ияталъе пайдаяллъун рук1инелъун, цере лъурал к1вар бугел масъалаби лъазе  ва гьел г1умруялде рахъинаризелъун.