Т1оцебе вас гьавураб мехалда эбел-инсуда рахьи бала вас иман-иях1 бугевлъун, бах1арчиявлъун, къуватавлъун, росдал ц1ар борхатго ц1унаравлъун лъугьагиян. Гьеб гьара-рахьи рит1ухъ гьабураб г1адин, рек1елъ къвак1и бугев, къуватавлъун г1ун вач1ана Г1амикь росулъа Х1анапиев Мух1амадил ва Сакинатил вас Г1умар.

70 килограмм гурони жиндирго чорхол ц1айи гьеч1ониги, къуваталъул рахъалъ ц1ар арав чанц1улго Гиннесил т1ехьалде жив восарав, Г1умар лъаларев чи нилъер районалда ва Дагъистаналда ватизе ц1акъго зах1мат буго.

Гьит1инаб мехалдасанго рек1елъ къвак1и бугев, х1инкъи- къай лъаларев васлъун г1ун вач1ана Г1умар. Черх лълъадаризелъун, гьев г1емер хьвадулаан х1ат1ида г1иц1го ракьалдасан, ц1орораб лъеца черх чурулаан, рогьалилъго векерулаан. Школалда ц1алулелъулги гьесие кидаго           бокьулаан физкультура ва спорт. Т1оцебе Г1умарица жиндиpгo махщалиде байбихьана х1ат1ид гlицlгo эхетарал маг1азда т1ад вахъун ч1еялдасан, г1исиназдасан байбихьун, бищунго ч1axlиязде щвезег1ан маг1ал кьуриялдасан, дагь-дагь ккун ц1айи ц1ик1к1инабун, гираби рорхиялдасан. Хасго Г1умарил махщел камиллъун бач1ана Азербайжаналъул тахшагьар Бакуялда Г1али Г1абдулх1усеновасул нухмалъиялда гъоркь т1орит1арал тренировкабаздаса хадуб.

Г1умар XIанапиев жиндирго къуват ва гьунар бихьизабизе зама-заманалдасан цеве вахъуна республикаялда гуревги РФялъул шагьаразда, областазда, х1атта, къват1исел улкабаздацин.

Гьес балагьарал х1айран гьаруна цоцаздаса рик1к1ад ч1езе гьарурал 2 автомашина рукьалда рарал квараз цоцазде аск1оре ц1аялъ, ц1ик1к1араб ц1айиялъул г1олохъанчи бак1ида г1одов вук1инеги гьавун, цабзаз гьевги кодове восун кьурдиялъ, Г1умар XIанапиевас Мах1ачхъалаялда ч1езабураб иргадулаб рекордалъ. Мах1ачхъалаялъул ччуг1ил порталда спортсменас ралъдал цо бак1алдасан багъаризабуна ва 15 метралъул манзилалъ добег1ан ц1ана 567 тонна т1ад бугеб танкер. Къуватав спортсменас гьеб ц1ана бурлакас г1адин, квераз гуреб, танкералъул тросалда бараб квар жиндирго цабзазги ц1ан. Гьединго Х1анапиевас 10-12 метралъул манзилалда цебехун ц1ана к1иго 150 тонна т1ад бугеб локомотив. Гьебго къаг1идаялъ Г1умарица цо бак1алдаса 7 метралъул манзилалда багъаризабуна Т-154 самолетги.

Гьел ва гь.ц. Гиннесил т1охьоде росарал ва росич1ого хут1арал х1икматал жал ва къуват бихьизаби Г1умарил г1емерал рук1ана. Лъида лъалареб Хасавюрт шагьаралде жанире лъугьунелъул нухда раг1алда «Хасавюрт» абун хъвараб маххул угольникал квералъ кьурун гьес ч1вараб иг1лан. Гьединго Хунзахъе рач1унезда Иги раг1алда бихьун батила «Хунзахъ» - илан хъвараб иг1лан.

Жиндир г1умруялъул сонал 50-ялдаса аниги Г1умарица Дунялалда т1ад ч1езабуна 50-ялдасаги ц1ик1к1ун г1ажаибаб рекорд. «Маххул чанагъ» ц1аралъул къвак1арав  бет1ергьанасе нилъецаги гьарила жеги гьедиг1аналго соназ нилъ х1икмалъизаризе щулияб сахлъи.

Н. Г1алиева.