Гиничукь байбихьул школалъул учительница Абакарова Султану Х1асановна районалъул  байбихьул классазул муг1алимзабазда гьоркьой  бищунго лъик1аздасан цояйлъун рик1к1уна. Гьелда цере ц1алулел ц1алдохъабазул г1емерисел г1иц1го «ункъилал» ва «щуйилал» къиматазда  ц1алула ва лъик1аб тарбия щварал рук1уна. Гьей т1убараб жавабчилъиялда х1алт1ула  ц1алдохъабигун. Султануца абула: «Дихъе эбел-инсуца  ва жамг1ияталъ божилъи гьабун буго бищунго жидее хирияб, гьезул лъимер – дит1е божилъи гьабун буго нилъер Ват1аналъул бук1инесеб.  Дида т1адаб буго лъик1 х1алт1изе, нилъер улкаялъул мустах1икъал г1адамал куцазе».

Султану Х1асановнаялъул гьит1инаб къоялдаса нахъего анищ бук1ана учительницалъун яхъине. Буйнакскиялъул педагогическияб училищеги лъуг1изабун т1ад юссарай Султану, 8 соналъ х1алт1ула Г1орут1а гьоркьохъеб школалда байбихьул классазул учительницалъун, гьелдаса хадуб, гьале 40 сон буго гьелъул  Гиничукь байбихьул классазул учительницалъун х1алт1улей. Жинда цебе ч1езабизе к1оларилан абула гьелъ школаги, лъималги гьеч1еб г1умру. Жиндие гьел жиндирго лъимал г1адин рокьулила. Лъималазе учительницаги йокьула, щай гурелъул гьей гьелгун кидаго х1ал рекъезабун, гьезул бергьенлъабаздаса йохун, ч1ух1ун йик1унелъул.

Султануца лъималазе дарсал кьола гьезул ц1алуде гъира, рокьи баледухъ, гьезда ч1алг1инаредухъ.  Дарсилъ г1енеккун бергьенлъи босарал гьелда к1одо гьаризеги к1очон толаро. Гьединлъидал гьелъул ц1алдохъабиги кидаго цересезул  кьеразулъ бук1унеб.

25 маялда Султану Абакаровалъ к1одо  гьабулеб буго жийги гьаюраб къо. Бокьун буго районалъул лъай кьеялъул отделалъул, лъималазул ва гьезул умумузул рахъалдасан Султануда гьаюраб къо баркизе, гьаризе гьелъие чорхое щулияб сахлъи, х1алт1улъ ч1ах1иял бергьенлъаби ва тарбия, лъай щварал лъимал.

Р. Атаева, районалъул лъай кьеялъул отделалъул методист.