23 сентябралъ т1обит1ана районалъул фермеразул данделъи. Жалго фермерал гуребги гьелда г1ахьаллъана Россиялъул ва Дагъистан республикаялъул росдал маг1ишаталъул министерствабазул консультациялъул отделазул нухмалъулел Н. Александрова, М. Г1абдулаева, районалъул бет1ер С. Юсупов, гьесул заместителал ва цогидалги мурад цоял г1адамал. Россиялда ва гьелдаго гъорлъ Дагъистаналдаги рекьарухъабазулгун фермерлъиялъул г1уц1абазда бугеб ах1вал-х1алалъул, гьезда цере ч1арал масъалабазул, г1олел-г1оларел рахъазул ва жакъасеб къоялъ улкаялда т1олабго росдал маг1ишаталъул к1варалъул бицун халатбахъараб к1алъай гьабуна т1адег1анаб идараялъул вакилалъ.
Къват1исел пачалихъаз Россиялъулгун экономикиял гьоркьорлъабазда гьарулел х1аяз бихьизабулеб буго к1алдибе борта баг1араб г1ечан ч1еч1ого, нилъ кинабго-бак1аб, т1адагьаб промышленность цебет1езабиялде русине кколеблъи,-ян байбихьана Наталья Петровнаялъ жиндирго к1алъай.
-Ахираб заманалда т1олгодунялалъул дармилаб г1уц1иялде (В.Т.О) унел цо-цо улкабаз хвезаруна Россиялъулгун дармилал гьоркьорлъаби. Дагьаб бук1аниги хъат1ич1ого хут1ич1о гьеб росдал маг1ишаталдаги. Масала лъаг1алие улкаялда х1ажалъулеб буго 2 миллион тоннаялдаса ц1ик1к1ун гьан, Евросоюзалдаса босун буго гьелъул 300 азарго тонна. Гьединго буго цогидал ниг1матазде нилъер къват1исан х1ажалъи. Хадубги гьелъ т1адч1ей гьабуна росдал маг1ишаталъул техника г1олеб гьеч1олъиялда. Бицана базаралъулал гьоркьорлъабазул. Гьоркьорхъабаз фермеразухъа продукция учузго бичун босун к1иго багьаялъ хираго бичулеб бук1иналъул, къват1исел улкабазда гьелъул т1убанго бат1ияб х1ал бук1иналъул. Къват1иса босулеб продукция гьукъиялъ киназулго рах1ат хвезабулеб буго лъугьараб дефицит сунца бахъинабилебан абураб суалалъ. Сундасаго цебе х1икъулел руго ч1обоголъарал тукабаздаса ва росдал маг1ишаталъул ниг1матазул багьаби ц1ик1к1иналъукьа. Фермераз къват1иса гьукъаралъул ками бахъинабизе ккани гьезие х1ажалъула заманги пачалихъалъул рахъалъ аслиял ниг1матал г1езарулел чаг1и жал кколин абураб гарантияги. Фермерлъи цебет1езе ккани т1оцебесеб иргаялда х1ажалъула ч1ара-хьараб хайир кьолеб ва конкуренция х1ехьолеб бизнесги гьоркьохъанлъи гьеч1ого жидерго продукция бичулеб базарги. Москваялдаса х1акимги вач1ун т1обит1изе бугилан гьеб тадбирилан районалъул фермеразул г1уц1иялъул нухмалъулев М. Макъсудовас х1аракат бахъулеб бук1ана гьеб г1уц1адго иналъе. Мух1удадаца лъаг1алица гьабураб-таралъул х1исаб кьезе х1адурун докладги бук1ана, г1ахьаллъулезул къадарги г1езег1анго бук1ана, бицине-гьикъизе жоги г1емераб бук1ана гьезул. Амма министерствалъул вакилалъул харбида къокълъизе теялъ колхозчаг1азул собраниего г1адин ч1амуч1лъана гьеб.
К1алъазе рахъарал фермерал М. Макъсудовас, З. Мух1амадовас, П. Мух1амадовас ва цогидазги бихьизабуна жидерго маг1ишатазда дандч1валел зах1малъаби, фермер цеве т1езе ккани кумек щолеб гьеч1олъи бук1ана киназулго аслияб унти. Ахиралда Наталья Петровнаялъ фермеразул г1емерал суалазе кьуна данде кколел жавабал.
|