Главврачасул т1оцебесеб макъала… Баркала. Лъала, Мун  гьелде рег1ун вук1унареблъиги,(обход гьабизецин рег1уларев чи макъалаби хъвазе кинха рег1илев?!) лъала, унтаразухъе рокъове хьвадизе Дуда т1адаб гьеч1олъиги. Гьеб гьедиг1ан «к1вар кьун» Дуца ц1алараб макъалаялда дица рехсонги, Дуе баркала кьунги бук1ана. Амма 24 саг1аталъ аск1ов  вугесда цо «х1унчизе» рач1араздаса  лъик1 лъалеб батила  унтарасул ах1вал-х1ал. Гьелде т1адеги, Дур больницаялде къабулги гьайич1ого дир к1ицул инфаркт ккарай эбел Республикаялъулаб сахлъи ц1униялъул г1уц1и -кардиоцентралда гьей жаний паракъат гьаюлелъул, гьелъул  сахлъиялъе характеристика кьураб, т1ад иту бахъун бит1изабураб гуребха, х1акъикъияб документги, тохтурзаби-специалистазул «гьадинаб зах1матаб х1алалде ккезег1ан щай унтарай дора ругез тарай?» ан суалалги руго. Гьебги г1еч1они, ц1ехе щиб х1алалда «в неотложной медицинской помощи не нуждается» ян нужеца бигьаго къот1арай унтарай йик1арабали, гьелдаги гурх1ун централда  гьей нахъ т1амун теч1ого егизаеян буюрухъ кьурав Дагъистаналъул сахлъи ц1униялъул министр Танка Ибрагьимовасда. Додиг1ан бигьаго т1олабго халкъалъул менталитеталъе къимат кьезе лъалевги, Гиппократил гьаялъе рит1ухъавги чиясда цох1о лах1заталъг1аги рак1алде ккезе рекъараб бук1ана гьабщинаб хабаралъ, унтун «гьеч1илан» къот1иялъ инфаркт ккаралде щиб асар гьабизе рес бугебали. Цин 200/90, хадуб 100/45 давление, циндаго босун унеб лъай, бач1унеб х1ехьезе к1олареб унти… Гьеб киналъго батила дицаги эмоциязда, ццим бахъун гьеб нужее лъиениги рек1ее г1еч1еб, амма г1адатал  г1адамаз баркала кьураб статья хъвараб. Батизе бегьула медиказул гьеб т1олгоязде ц1аялъе ва ургьиб рекъеч1олъиялъе г1иц1го к1иго г1илла («лъил паст1анибе бугеб ч1имихали» ц1ар рехсеч1ониги макъалаялда  бич1ч1изабун бук1аниги):  ялъуни гьал руго мунагь-хат1аго кколарел, зодоса рещт1арал малаикзаби, ялъуни гьаб бак1алда х1алт1изабизе  рекъараб буго «ц1огьорасул г1адалъ ц1а» ян маг1арул кици. Воре, лъицаниги жидедего ц1аге, к1алъалей йиго образал гьарун, художественнияб х1алалъ, Дуца рехсовухъе «приукрашенно». «Органазде хъваян» абулеб буго Дуца. Гьеб х1ажат бук1арабани, редакторлъун х1алт1араб микьго соналда жаниб, мун божа, бач1ана гьанибе чанги кагъат, медицинаялда х1алт1улезе баркала кьурал гурел, наг1ана кьуралги. Амма дица гьел рахъич1о, гьоркьор инаруна. Рахъана г1иц1го т1оцебесеб тайпаялъул, нужеца гъираялда къабул гьарулел одабигун дифирамбаби. Гьединлъидал батила,  гьаб нухалда дица лъик1лъиялъе нигатгун хъвараб, ц1ар рехсеч1еб, лъиданиги бугьтан лъун, рогьрал рач1еб «Редакторалъул калам» къабуллъич1ебги. Цо г1акъилас абун буго: «Бадибе раг1и абулес дуе зарал гьабуларин, х1инкъайин  нахъасан х1алт1улел, руц1ц1ун ч1аразукьа» ян.

Гьединха, х1урмат т1адег1анав Мух1амад Шайихг1алиевич, дицаги хъван  бук1араб Духъе бугеб  г1унгут1иялъул Дуца гьеб  лъуг1изабизеян, нахъасан х1алт1улез органазде кьезе г1ураб т1ат1ала лъезе теч1ого, Дуца, гьит1инаб бук1аниги, квешаб лъуг1изабизеян. Дой данде яч1арай г1аданги ургъун  яхъарай йик1инч1о, ц1арги бугей, к1алги бугей, г1езег1ан къамарт1ай г1адан йик1ана. Жий щокълъун гьезухъе ккедал, гьез бец1изе бугилан, гьардон рехсеч1о гьелъул ц1арги. Г1адатай мухбиралъе щайха чияр сахлъиялъулги х1акъ т1аде босун.  Гьедин, нужеде, нужер кумекалде кколелъулилан кинабгоги х1ехьон руц1ц1ун ч1ун руго, доб Дуца менталитеталъе гьаваялдасан къимат кьурал, г1адатал г1адамал Макъалаялъул маг1наги бук1ана Дур  коллектив инжит, х1акъир гьаби гуреб,  унтаразул нужедасаго рак1буссине биччагеян Дуде гьабураб къварилъиялде ккаралъул гьари. Аманат. Щиб гьабилеб, гьеб лъиданиги бич1ч1ун батич1о. Унтаразда хут1изег1ан. Гьединлъидал, сахлъи ц1униялда х1алт1улезе баркалаби (гьаб Дуда рихараб газеталдасангиха) кьолелги, гьезие сахлъи гьарулелги рук1арал, амма хадубккун гьелго тохтурзабазда рак1буссинабурал унтаразда  цере г1айиб «гьеч1еблъунги», медицинаялъул этика хвезабуразе  г1адлу-низам гьабизе кколареблъунги, квешаб какизе кколареблъунги, доб г1айнулмалъаяб этика хвезабуразг1аги (т1олго больницаялъ гуро!)т1огьиса к1алалъг1аги унтаразда т1аса лъугьаян гьаризе  бегьулареблъунги  бихьулеб бугелъул, дица  гьарулеб буго Дуда т1аса лъугьаян. Г1илла Дуего бокьараб балагье. Халкъалъ кьела киналъего къимат, Аллагьас борцина кинабго, иншаАллагь.

Гиппократил гьаялъе рит1ухъаздехун, жидее кьолел баркалаялъулал, реццалъулал раг1абазе унго-унголъунги  мустах1икъаздехун кидагосеб адабгун, рак1буссарай пациенталъул яс Фатима Мух1амадова.