Араб анкьалда райадминистрациялъул данделъабазул залалда Муг1рузул территориалияб округалъул зампред Г1амирхан Мух1амададаевасул, миллияб х1инкъи гьеч1олъиялъул министрасул заместитель Зикрула Ильясовасул, печаталъул министрасул заместитель Зубайру Зубайруевасул ва цойгидалги республикаялъул жавабиял ишазда ругел х1урматиял гьалбадерил г1ахьаллъигун т1обит1ана 17 районалъул вакилзаби жинда г1ахьаллъараб семинар-совещание.
Социалиябгун экономикияб цебет1еялде республикаялда х1инкъи гьеч1олъи бук1инабиялъул ва ч1ара-хьараб ах1вал-х1ал Дагъистаналда бук1иналъул инвесторазе бугеб к1варалъул бицараб к1алъай гьабуна Г1. Мух1амададаевас, Дагъистаналъул г1емермиллатазулаб халкъалъул парахалъиялъе г1оло «Х1инкъи гьеч1еб Дагъистан» проект г1умруялде бахъинабиялъе киналго къеркьезе ккеялде ах1ана З. Ильясовас, халкъияб информациялъул алатазги профилактикиялгун баян кьеялъулал х1алт1аби жеги ц1ик1к1араб къадаралда т1орит1изе ккелин т1адч1ей гьабуна З. Зубайруевас.
Данделъиялдаго г1енеккана Муг1рузулаб территориалияб округалде гьоркьоре унел муниципалитетазул вакилзабазул х1исабкьеязухъги.
Такъсирчилъиялдехун, экстремизмалдехун ц1айи бугел г1олилазда гьоркьоб бич1ч1икьеялъулаб х1алт1и гьабиялде, халкъиял дружинаби г1уц1изе ккеялде ах1ана республикаялъул т1алъиялъул вакилзабаз районазул нухмалъулел. Х1инкъи гьеч1еб Дагъистан-цебет1еялъулги, г1аммаб парахалъиялъулги аслу бук1ин к1очене бегьиларо иш т1аде кколел идарабазда.
| 
