Республикаялъул ц1иял харбазул выпусказухъ  г1енеккулаго, дун кидаго йохулеб х1ужа бук1ана г1унгут1аби ккаралъуве республикаялъул нухмалъулес вит1улев гьесул вакил Г1алибег Г1алиев лъил бук1аниги г1арзаялдалъун Хунзахъ районалде вач1инч1олъиялдаса. Амма 19 июналъ РГВКялдасан кьолел ц1иял харбазда бихьизабураб сюжеталъ дун нечезаюна. Дагъистаналъул халкъияв шаг1ир Г1абасил Мах1амадги гьесул хъизан Савдат-эбелги дагьаб к1вар кьеч1ого рехун тун ругин росу-жамаг1аталъан, школалъе сайгъатлъун бук1ине Г1абасилас банкьураб бассейнги агъаз гьабич1ого, жанибе лъимцин биччач1ого тун бугилан бицунеб бук1ана республикаялъул мухбиралъ. Гьадинал г1адамазул мисалалда куцазе кколин г1ун бач1унеб  г1елилан, республикаялъул нухмалъиялда Г1абдулат1ипов г1адав президентги, районалда Саг1ид Юсупов г1адав бет1ерги вук1аго, халкъиявги гьесул г1умруялъул гьудулги къварид гьаризе, гьезда рек1еда балеб жогьабизе толарилан кьварун лъазабуна Г1алибег Г1алиевас школалъул нухмалъиялда. Х1акъикъаталдаги, цебеккунго районалъул нухмалъулесги гьабун бук1ана гьединабго маг1наялъул данделъи ва лъазабун бук1ана  даг1ба-раг1и лъуг1изабеян, амма дида лъаларел г1иллабаздалъун, питнадул хур бекьулелги, гьелъул бач1ин бак1арулелги г1одоре риччалел гьеч1о.

Дирго хасаб пикруялда, ц1ик1к1араб ригьалъул г1адамазда щиб г1айиб бук1аниги, гьез кинаб калам гьабуниги, цодагьал г1олохъаназ гьездехун сабруги гьабизе, «уха, у» янгьел г1одоре риччазаризеги рекъараб буго. Г1абасил Мах1амадги гьесул Савдатги цоц1улг1аги рихьаразда лъанги бихьунги батила киг1ан г1адан хириялги, т1аде рач1унел гьалбал рокьулелги чаг1и гьел ругебали. Киг1анго жиндаго к1веч1ониги гьалбадерида сверун лъугьун, гьезие квалулей йик1уна Савдат, сах гьеч1ониги т1аде рач1аразулгун накъиталде жувала Г1абасилав. Дида бич1ч1уларо, щай гьедиг1ан районалъулго, республикаялъулго творческиял г1адамазе, т1адчаг1азе хириял гьел рос-лъади г1агараб росдал цо къокъаялъ сан гьарич1ого толелали! Инкар гьабула бич1ч1изе! Гьаб бак1алда рак1алде бач1ана «Что имеем – не храним, потерявши – плачем» ан г1урусазул кици.

Унго-унголъунги абадиялъ ч1аго  рук1инел г1адин бук1ине кколеб, т1адег1анаб адаб гьабуларо нилъеца нилъерго шаг1иразул, муг1алимазул, г1алимазул, х1атта, эбел-инсулцин! Гьел гьеч1ого хут1идал, лъугьун батула г1умруялда якъинго бихьулеб цо к1удияб ч1обоголъи, араб нахъ буссинабизе, т1аса лъугьаян гьаризе рес гьеч1олъиялъ чара къосин. Гьеб дирго мисалалда лъала. Гьединлъидал, х1урматиял, лъик1 гьеч1ищ нилъее, Дагъистаналъул халкъиял шаг1ирал, базе бак1 т1аг1арал, свин гьеч1еб хазинаги гурелъул, гьел рази гьариялъе нилъедасан бач1арабщинаб х1аракат бахъизе.  Бокьиларо, къадру-къиматалда рехсолеб районалъул ц1ар сурараб маг1наялъул сюжетазда гъоркьги, кодоб кквезе г1оркь гуреб, г1одоб лъезе т1ину гуреб харбилъги рехсезе. Вассалам, вакалам.

Ф. Мух1амадова