Щибаб ишалъулъ бук1ине ккола жиндирго тартибги ва ахиралда нилъ щвезе кколеб цебе ч1араб мурадги. Архитектор х1исабалда дие гьаниб бицен гьабизе бокьараб суалги районалда  бак1ал раялда хурхараб буго. Районалъул бет1ер С. Юсуповасул анишги райцентр щибаб росо берцин гьаби кколелъул, т1адч1ей гьабила бищунго аслиялда.

Бак1ал раялъе ва гьел  ц1игьарун къач1аялъе, ц1ибараб бак1 х1алт1изе кьеялъе (Градостроительнияб кодексалъул 51-55 статьяби) ихтияр кьей, муниципалияб градостроительнияб хъаравуллъиялъул ишал т1уразаризе кколаан росабазул муниципалитетаз. 2016 соналъул т1цебесеб январалдаса гьеб иш т1аде ккана райадминистрациялде.  Районалъул нухмалъулесги хасаб  х1укмуги гьабун гьеб т1адкъан буго дида. Бак1ал раялъе яги гьел ц1игьарун къач1аялъе кьураб изну гьеч1они г1адамазул ихтияр гьеч1о гьелъие кьуч1 бухъунцин квербагъари гьабизе. Т1аде рарал яги ц1игьарун къач1арал бак1азул х1исаб нижецаги  кьезе ккола т1адехунисел идарабазде. Бич1изабизе бокьун буго рукъ базе кьураб планалда, ракьул участкаялда тукаби, ремонталъулал мастерскаял, кафе-столоваял, дармилал базаби, банкеталъулал  (ихтилат-сух1маталъул) залал яги г1и-боц1ул фермаби разе бегьулареблъи. Гьединго градостроительнияб кодексалъ гьукъараб буго  т1адехун рехсарал бак1аз ьосараб ракьул участкаялда (план)  г1адамал жанир ч1олел минаби разеги.

Муниципалияб градостроительнияб хъаравуллъи ккола бак1ал раялъе, гьел ц1игьарун къач1аялъе ва ранги  къач1анги лъуг1ун гьел х1алт1изе  ричаялъе ихтияр кьурал документазул кьуч1алда гьабулеб контроль, ай хъаравуллъи. Муниципалияб граджостроительнияб хъаравуллъиялъул комиссия х1алт1ула районалъул бет1ерас прокурорасулгун дандги бан халгьабиялъе х1адур гьабураб  списокалда рекъон.

Т1адехун рехсарал документал х1адур гьариялъе къвариг1унебщинаб бихьизабун буго райадминистрациялъул сайталда – Документы – административные регламенты абулеб бак1алда. Нужее бокьани рач1ине бегьула райадминистрациялъул  архитектураялъулгун ЖКХялъул, ракьазул ва мал-мулкалъул гьоркьорлъабазул отделалде. Гьениб т1оцебесеб т1алаялъул коридоралъуб буго информациялъулаб стенд. Бокьараз 2-24-46; 8-988-420-53-36 телефоназул номераздасан нижергун бухьен кквезе бегьула. Рач1а, к1алъай. Хадуб предписаниял хъвай, актал-протоколал гьарун судалде рит1ун цоцазул рак1ал  хвеялдаса байбихьудасанго роц1араб бук1ун лъик1 бак1ал раялъе гьабулеб квербагъари. Киназулго мурадал т1урайги.

М. Къебедов, райархитектор.