Ц1ох1о Мух1у Гьиматовичасул ц1аралдалъун гуро машгьурал ругел Т1анусги, Хунзги, дагъистаниялги улкаялда. Г1алиевазул хъизамалдаса ккола Мух1ул гьит1инав вац, ц1ар раг1арав г1алимчи, техникиял г1елмабазул доктор, Космонавтикаялъул Академиялъул х1урматияв академик Шамил Гьиматович Г1алиев. Ц1акъго г1ат1идаб, гъваидаб буго Ш. Г1алиевасул г1елмияб ц1ех-рех. Гьелъ гъорлъе рачуна бат1и-бат1иял г1елмиял рахъал. Лъадалъ рукъун хьвадулел аппаратал ургъиялдаса, гьел океаналъул к1удиял гъварилъабаздасан роржине риччаялъулъ дандч1валел зах1малъабазде щунги Шамилил пикру г1унт1ич1еб, гьес х1ал бихьич1еб бут1аго хут1ун батиларо. Торпеднияб яргъил гьанжесел специалистазда гъорлъ бищунго къадру бугев махщалиласул Россиялъул г1алимзабазул сверуда ва Оборонаялъулгун промышленнияб комплекссалда гуребги т1олго дунялалъул г1алимзабазда гъорлъги к1удияб адаб-х1урмат гьабула.
Г1алимчи х1исабалда гуревги машгьураб буго Ш. Г1алиевасул ц1ар. Гьес к1удияб к1вар кьола г1унбач1унеб г1елалъе лъик1аб тарбиягун-лъай кьеялде, улкаялъул бук1инесеб, пагьму-гьунар бугел г1олилал т1асарищиялде, гьезие жиндасан бач1араб кумек гьабиялде. Ш. Г1алиев ккола Дагъистаналъул пачалихъияб техникияб университеталда «Технические комплексы и САПР» кафедра рагьаравги рагьаралдаса гьелъул заведующийги. Шамиль Гьиматович ккола жамг1иябгун политикияв х1аракатчиги. Гьес к1удияб х1алт1и гьабула дагъистаниязулги улкаялъул цогидал регионазул халкъазулъги гьоркьорлъаби щула гьаризелъун.
2009 соналъул 6 августалда Халкъазда гьоркьосеб Астрономиялъул союзалъ ва Россиялъул Г1елмабазул Академиялъ (РАН) х1укму гьабуна доба анкьзобалазда галактикаялда Марсалдаги Юпитералдаги гьоркьоб бугеб гьит1инабго планетаялъе Шамил Гьиматович Г1алиевасул ц1ар кьезе. Астрономиялъул каталогазда гьанжеялдаса гьеб планета бук1ине буго «ALIEV» абураб ц1аралда гъоркь. Гьелъие хъвараб свидетельствоялда гъулбасун буго РАНалъул вице-президент, Нобелил премиялъул лауреат академик Ж. И. Алферовас.
Пикрабалъ цебеч1езабуни дунялалъулго роцада к1одо гьабураб Шамил Гьиматовичасул г1елмияб цебет1еялъул х1асилалда гьанжеялдаса Дагъистан абадиялъ анкьзобалазде бахинабуна.
| 
