Киналго школаздаго гlадин, Тlануси гьоркьохъеб школалдаги бихьизабун букlана февраль моцlалъ Ватlаналдехун гlун бачlунеб гlелалъул цlикlкlараб рокьи бижизабиялъул хlалтlи гьабизе. Гьелда хурхун хlадурараб планалда рекъон школалда  тlоритlана лъималазе гlемерал кlвар бугел тадбирал. Исана Кlудияб Ватlанияб рагъда бергьенлъи босаралдаса 70 сон тlубалеб букlинги хlисабалде босун, аслияб кlвар буссинабун букlана рагъулаб тематикаялде.

Вожатая Хlажиев Патlиматил нухмалъиялда гъоркь Ленинградалъул блокада бахъаралдаса 71 сон тlубаялъул хlурматалда гьабуна литературиябгун музыкалияб вечер. Жиб - жиб классалда гьаруна гара- чlвариял, лекциял, рихьизаруна документалиял ва художествениял фильмал. Мисалалъе, 10 абилеб классалда «Дагъистаналъул бах1арзал Дагъистаналъул литератураялда» абураб бах1арчилъиялъул дарс кьуна авар мацlалъул мугlалим Гьадигат Хlажиевналъ, гьединалго дарсал кьуна тарихалъул мугlалимзабазги.

Планалда бихьизабун букlана киналниги классал Хунзахъе районалъул музеялде рачине, гьенисан Кlудияб Ватlанияб рагъда гlахьаллъарал районцоязул хlакъалъулъ дагьабги цlикlкlун материал лъазабизе мурадалда. Музеялде иналде лъана гьениб цlиял залал рагьун рукlин. Гьеб хабаралъ нижер лъималазул цlакъго гъира цlикlкlана. Битlараб бицани, ккун букlинчlо лъималаз кlудияб кlварго кьелин музеялъул тlагlалабазде,-ян, амма лъималазе лъазе бокьун букlана кинабго, историялъул, культураялъул ва рукlа-рахъиналъул жиб- жиб алат кинан щиб гьабизе хlалтlизабулебали. Залазда жаниб бугеб квачалъухъ балагьичlого лъималаз жигар бахъулеб букlана кигlан кlваниги цlикlкlун жо лъазабизе. Рагъулаб реццалъул залалъги, районцояз Кlудияб Ватlанияб рагъда гьабураб гlахьаллъиялъул хlакъалъулъ бечед гьабуна  лъималазул лъай.

Амма, бищунго цlикlкlун нижер цlалдохъабазе асар гьабизе бугеб зал жеги цебе букlана. Гьеб букlана рухlчlаголъабазул зал. Залалде жанире лъугьаралго киналъулго цадахъ хал гьабизеги бокьун, лъималазул берал бит1ахъе хенана. Гидалда яги биологиялъул мугlалим Зульфия Мухlамадовнаялда цlехолеб букlана цо гьоркьоб течlого рухlчlаголъиялъул хlакъалъулъ. Ц1алдохъабаз жиб- жиб залалда рахъана гlемерал суратал.

Музеялдаса хадуб гьел рачана Хlажимурадил аллеялде, гьезие бицана районалдаса Шамил имамасул наибзабазул хlакъалъулъ. Гьениб нижер лъималазе цо хасаб асар гьабуна имамасул низамал хъварав Тlанусиса Мухlамадил монументалде аскlоре щварабго.

Газетаги гьоркьоб ккун бокьун буго гьеб аллея гьабизе кlудияб квер бакъарав районалъул бетlер Сагlид Камиловичасе , гьеб проект ургъаразеги ва гьеб кинабго хlалтlи гьабуразеги кlудияб баркала загьир гьабизе. Гьединго кlудияб баркала кьезе бокьун буго музеялъул киналго хlалтlухъабазе. Хlалчlахъаги гьезул гьабураб к1удияб хlалтlухъ.

Нижер лъимал гlемералго унтана музеялде гьабураб экскурсиялдаса хадуб, гьениб букlараб квачаялъ. Гьелдасаги ракl унтизабураб жо ккана музеялда бугеб язихълъиялъги, 20 соналъгlаги бихьун батиларо гьелда ремонт. Нилъер некlсияб тарих ва культура жаниб цlунараб хъала гьединаб хашаб хlалалда батиялъ рекlекълъана ниж. Гьединлъидал киналго Тlануси гьоркьохъеб школалъул цlалдохъабазулги мугlалимзабазулги цlаралдасан районалъул нухмалъулезда гьаризе бокьун буго, чlунтизе биччаге гьеб гьайбатаб некlсиялъул нугlлъи жаниб цlунараб кlалгlа,-ян.

Хlурматияв Сагlид Камилович, нижер дуде кlудияб хьул ва божлъи буго, гьал росабалъ рагьулел ругел гьалбадерил рукъзабаздего гlадаб кlвар дуца музеялдеги буссинабилилан.

Хlалимат  Хlажиевна