10 июналда Хунзахъ т1обит1ана, Муг1рузул территориалияб округалъул СМИязул вакилзабиги г1ахьаллъун, семинар-совещание. Гьелда г1ахьаллъи гьабуна Дагъистаналъул Бет1ерасул муг1рузул территориалияб округалда полпред И. Ибрагьимовас, республикаялъул печаталъул ва информациялъул министр А. Аджиевас, гьесул заместитель М. Муслимовалъ, «Дагправда» газеталъул бет1ерай редактор Б. Гокболатовалъ, «ГТРК» телевидениялъул директор Л. Г1алихановалъ, цо-цорайоназул бут1рузул муниципалиял СМИязул нухмалъулез. Данделъиялда к1алъарал А. Аджиевас, республикаялъул информациялъул агентствоялъул директор М. Мух1амадовас, М. Муслимовалъ, Г1. Камаловас рихьизабуна республикаялъулгун районазул газетазул, телевидениязул, администрациязул сайтазул х1алт1ул лъик1ал ва квешал рахъал, к1вар буссинабуна х1алт1ул даража борхизабизе ккеялде, ах1ана цадахъ рекъараб, г1аммаб информационнияб х1алт1и гьабизе ккеялде. Щивав к1алъазе вахъарас абулеб бук1ана лъик1аб бук1инаанин цого т1алъи ва нухмалъулел реццарал макъалаби хъван теч1ого, цо-цониги г1унгут1абазулги бицунебани, халкъалъе пайдаял, г1олеб г1елалъе патриотикияб тарбия кьурал, экстремизм-терроризмалде данде рагъбарал материалал ц1ик1к1инарунани. «РИА Дагестаналде» кьолел материалазул къадаралъул рахъалъ лъабго лъик1аб районалде гьоркьобе ккана нилъер районги, гьеб г1уц1иялъул нухмалъулес лъик1аблъун бихьизабуна районалъул пресс-хъулухъалъул х1алт1иги. Амма СМИязда ц1акъ дагьал гурого гьеч1о росдал маг1ишаталъул, Дагъистан лъик1аб, цебет1еялъул рахъалъ бихьизабурал материалал, г1одобег1анаб даражаялда буго республикаялъул телевидение-газеталгун районазул СМИязул бухьен.

Официалияб «гургинабстолалдаса» хадуб х1урматиял гьалбадерил къокъа ва Хунзахъ администрациялъул вакилзаби ун рук1ана Россиялъул къо-12 июналъул х1урматалда 450 кв.м жинда т1ад бугеб федералияб байрахъ т1ибит1изе. Гьебги лъугьана районалде рач1аралщинал бат1и-бат1иял миллатазул цолъиялъул ва гьудуллъиялъул символикияб г1аламатлъун. Гьелдаса хадуб печаталъул басмабазул республикаялъул газетазул редакторзаби бат1аго данделъун рук1ана жидерго х1алт1ул ва гьеб цебет1еялъе рихьулел нухазул бицине. Министрасул заместитель М. Муслимовалъ г1одорч1аразул суалал ва гьариял хъвана на, жидедасан бач1араб кумек гьабилилан. Данделъи г1уц1аразе, гьалщинал гьалбал къабулгьабураб райадминистрациялъе рак1-рак1алъулаб баркалаги кьун, рикьа-рихана мухбирзаби гьеб пайдаяб семинаралдаса гьебкъоялъ.

Ф. Мух1амадова.