Араб анкьалъ райадминистрациялда т1обит1ана росабазул поселениязул бут1рулги администрациялъул отделазул нухмалъулелги г1ахьаллъун иргадулаб данделъи. Данделъиялда гьоркьор лъун рук1ана кват1ич1ого т1орит1изе ругел росабазул бут1рузул рищиязул, ракьазул актуализация гьабиялъул, налогал рак1ариялъул ва цогидалги к1вар бугел сулал. К1алъазе вахъарав районалъул администрациялъул юрист Г1абдулаев Х1асаница баян кьуна исана рищиял т1орит1изе ругеб къаг1идаялъул. Бицана исана «Единая Россия» партиялдасан рищиязда г1ахьаллъулезда гьоркьор 30 % г1олилазул ва 20% руччабазул рук1ине кколин. Гьединго лъазабуна рищиязда г1ахьаллъулел кандидатазул 19 июлалде киналго документал х1адурун рук1ине кколиланги.

Ахиралда ц1алана рищиязда хурхун гьабураб постановлениеги.

Ракьазул актуализация гьабиялъул х1асилазда хурхун к1алъазе вахъана районалъул бет1ерасул заместитель Саг1адула Батиров. Жиндирго докладалда гьес бицана ракьазул актуализация гьабиялъул ва налогал рак1ариялъул рахъалъ т1оцебесеб бащдаб лъаг1алил план т1убазабиялъул. Гьесул раг1абазда рекъон районалда физическиял лицабазул налоговияб базаялъул актуализация гьабиялъул т1оцебесеб бащдаб лъаг1алил план т1убан буго 64,2%, лъаг1алил-29,6%. Ракьул участкабазул актуализация гьабиялъул бащдаб лъаг1алил план т1убан буго 215,6%, лъаг1алил 107,6%.

Районалъул бюджеталдасан налог бак1ариялъул бащдаб лъаг1алил план т1убан буго 119%, росабазул поселениязул налогал рак1ариялъул бащдаб лъаг1алил план т1убан буго111%. Ахиралда гьес ц1алана ракьазул актуализация гьабиялда хурхун къабул гьабураб постановлениеги.

К1алъазе рахъаразе г1одор ч1араз кьуна жидерго суалалги. Данделъиялъул ахиралда районалъул нухмалъулес гьоркьор лъурал суалазда хурхун заместителазе кьуна хасал т1адкъаял ва киналго ах1ана цадахъ рекъон район т1егьазабизе х1алт1изе. Хьул буго гьаб данделъиялъул х1асилалда районалъул ракьазул актуализация гьабиялъул ва налогал рак1ариялъул рихьизариял дагьалги лъик1лъилилан.

И. Мух1амадов.