Республикаялъул т1алъиялда цойги хунзахъев
Гьаб соналъул 4 марталда гъулбасараб ДРялъул Бет1ерасул Указалда рекъон, Маламух1амадов Юсуп Мух1амадович т1амун вуго Дагъистан Республикаялъул бухьеналъул ва телекомуникациязул министрлъун.
Маламух1амадов Юсуп Мух1амадович гьавуна 1974 соналъ нилъер районалъул Г1ебут1а росулъ. 1998 соналъ «Инженер-разработчик» махщалида Москваялда лъуг1изабуна Н. Э. Бауманил ц1аралда бугеб университет. Гьелдаса хадуб-гьелъулго аспирантура. Буго РФялъул Культураялъул министерствалъул «За особые заслуги» медаль, 2-леб классалъул РДялъул пачалихъияв г1акълучиясул чин. Зах1маталъулаб нух байбихьана Бауманил ц1аралда бугеб университеталъул «МТ-2. Инструментальная техника и технологии» кафедраялъул лаборантлъун х1алт1иялдасан.
1998-2010 соназ гьебго кафедраялъул преподавательлъун х1алт1ула.
2000-2005 соназ т1уразарула Саратов областалдасан Россиялъул Федерациялъул Советалда сенаторасул кумекчиясул ишал.
2005-2011 соназ Юсуп Мух1амадович х1алт1ула В. П. Горечкинил ц1аралда бугеб Москваялъул Пачалихъияб агроинженерияб университеталъул «Технологии машиностроения» кафедраялъул доцентлъун.
2008-2011 соназ «Индустриальные метрологические системы» компаниязул къокъаялъул отделалъул начальникасул заместительлъун, 2009-2010 соназ Москваялъул культураялъул ва искусствалъул университеталъул интернет-технологиязул ва маркетингалъул отделалъул начальниклъун, цинги гьебго т1адег1анаб ц1алул заведениязул ректорасул кумекчилъун.
2012-2013 соназ Юсуп т1амула т1ехун рехсараб ВУЗалъул информационниял технологиязул управлениялъул директорлъун, цадахъго т1убазабула РФялъул Пачалихъияб думаялъул депутат Р. Х1. Г1абдулат1иповасул кумекчиясул хъулухъги.
2013 соналдаса бахъараб 2015 соналъул 4 марталде щвезег1ан т1уразаруна республикаялъул бухьеналъул ва телекоммуникациязул министрасул заместителасул ишал.
Руго хъизан, ункъго лъимал.
Районцояз рак1-рак1алъ баркулеб буго Юсупида т1адег1анаб хъулухъ. Баракат бугеб батаги гьесие министрасул чинги, Дагъистаналъе гьевги. Амин.
|