16 апрелалда Мах1ачхъалаялда «Гьудуллъиялъул рокъоб» т1обит1ана Хунзахъ районалъул г1олилазул лъабабилеб форум. Жеги районалъул бет1ерлъун Х1ажияв Дарбишев вук1аго байбихьараб, санайил гьединал форумал т1орит1и лъик1аб г1адатлъун лъугьана. Форумалъул аслияб масъалалъун бук1ана г1елму-лъаялде ва спортивиябгун жамг1ияб г1умуялде ц1айи бугел районалъул г1олилазда кверч1вай. Форум байбихьилалдего «Гьудуллъиялъул рукъалъул» жанах1алъуб г1уц1ун бук1ана гьоц1дерил художественнияб т1аг1ел-г1уч1алъул, Дагъистаналъул мустах1икъав художник, Шотот1аса Г1амирхан Мух1амадовасул суратазул выставка. Гьенибго бихьулаан маг1арулазул нек1сияб росдал, маданияталъул ва квен-т1ехалъул бок1онги.
Форум байбихьана «Макьасда» кинофильм бихьизабиялдасан. Гьениб г1ахьаллъи гьабизе рач1ун рук1ана районалъул, Дагъистаналъул х1укуматалъул нухмалъулел, ДРялъул парламенталъул членал, хъвадарухъабазул ва журналистазул союзазул вакилзаби, ВУЗазул ва СУЗазул студентал, аспирантал ва цогидалги х1урматиял гьалбал.
Тадбир нухда бачана Дагъистаналъул г1олилазул ишазул рахъалъ министр Заур Къурбановас. Гьес бицана республикаялъул Бет1ер Рамазан Г1абдулат1иповас г1олилазде кьолеб бугеб к1удияб к1варалъул, гьезде божилъиги гьабун жавабиял хъулухъазда гьел толел рук1иналъул.
Г1олилазде хит1аб гьабун к1алъазе вахъана районалъул нухмалъулев Саг1ид Юсупов. Гьес жиндирго к1алъаялда бицана жакъа къоялъ районалъул нухмалъиялъ г1олилал церет1еялъе х1ажаталщинал шарт1ал ч1езаризе х1аракат бахъулеб бугин. Г1олилал ах1ана г1умрудул нухда дандч1валел зах1малъаби къезаризе.
- Нилъер буго бечедаб тарих руго, дунялалдаго ц1ар раг1арал шаг1ирзаби, хъвадарухъаби ва бах1арзал, амма гьездаса ч1ух1арал г1оларо, нужецаги х1аракат бахъизе ккола тарихалъул ц1иял т1анчал хъвазе. Жакъасел г1олилазул бук1ине ккола лъай, махщел, кидаго т1аса бищизе ккола борхалъи. Мисал босизесел г1адамал нилъер районалда г1езег1ан руго. Ниж киналго х1адур руго нужее кумекалъе. Соналдаса соналде ц1ик1к1унеб буго отличниказул къадарги. Масала, гъоркьисала вузал лъуг1улезул кьералъ 15 отличник вук1арав ватани, исана гьезул къадар бахана 27-ясде. Районалъул администрациялъ нуж ц1ализеги, ц1алун хадуб г1агараб район т1егьазабизе т1адруссун рач1инеги гъира баледухъ г1уц1изе буго х1алт1и,- ян абуна Саг1ид Камиловичас жиндирго к1алъаялда.
Форумалъул г1ахьалчаг1азе ДРялъул халкъияб собраниялъул председатель Хизри Шихсаг1идовасул хит1абалъул кагъат ц1алана гьесул заместитель Сайгидах1мад Ах1мадовас.
К1алъазе рахъарал республикаялъул жамг1ияб палатаялъул председатель Х1амзат Х1амзатовас, академик Шамил Г1алиевас, Дагъистаналъул аграрияб университеталъул ректор Зайдин Жамбулатовас, счетнияб палатаялъул председателасул заместитель Хъазанби Хъазанбиевас, Мах1ачхъала шагьаралъул Ленинский районалъул бет1ер Х1ажияв Дарбишевас, Дагъистаналъул муг1рузул районазул территориалияб округалъул полпред Мух1амадх1ажи Зайнулг1абидовас, ДРялъул транспорталъул ва нухазул маг1ишаталъул агентствоялъул нухмалъулев Загьид Хучбаровас ва цогидазги жидерго к1алъаязда к1вар буссинабуна районалъул г1олилазул централъе ругел ресазде ва гьездасан пайда босизе ккеялде. Студентазул ц1аралдасан к1алъазе яхъарай Дагъистаналъу халкъияб маг1ишаталъул университеталъул студентка Камила Ибрагьимовалъ г1олилазде кьолеб бугеб к1варалъухъ ва гьезда хурхун гьабулеб бугеб х1алт1ухъ районалъул ва республикаялъул нухмалъиялъе баркала кьуна. Раг1и кьуна гьединаб к1варалъул кумекалдалъун хадубккунги районалъул байрахъ борхатго кквезе бугин жидецаян.
Форумалъул официалияб бут1аялъул ахиралда х1урматиял гьалбадерица районалъул 70-го ялдасаги ц1ик1к1ун ц1алулъ ва спорталъулъ бергьенлъаби росарал студентазе дипломалги бат1и-бат1иял сайгъаталги кьуна. Гьезда гьоркьоса 5 курсалъул 27 выпускниказе кьуна «Apple» планшеталги. Районалъул г1олилазул рахъалдасан Саг1ид Юсуповас гьит1инабго сайгъат кьуна Заур Къурбановасеги.
Данделъиялъул ахиралда Х1ажилав Х1ажилаевас, Шамил Ханакаевас ва цогидалги Дагъистаналъул машгьурал коч1охъабаз, гьединго «Лезгинка» ансамблялъги кьуна г1ат1идаб программаялъул концертги.
И. Мух1амадов.
|