22 сентябралъ райадминистрациялда т1обит1араб данделъиялда г1ахьаллъаразул халгьабиялде росарал суалазул аслияблъун бук1ана муниципалиял г1уц1аби бач1унеб хасалоде х1адур гьариялъул суал. Данделъиялда г1ахьаллъана райадминистрациялъул бет1ер С. Юсупов, данделъи бачарав гьесул заместитель С. Батиров, райадминистрациялъул аппараталъул жавабиял х1алт1ухъаби, росабазул бегавулзаби, школазул директорзабигун школалда цебесеб лъайгун тарбия кьеялъул, ай ясли-ахазул заведующиял ва цогидалги мурадцоял г1уц1абазул вакилзаби. Рехсараб суалалдасан г1ат1идаб к1алъайгун данделъаразда цеве вахъарав ЖКХялъул бет1ерав специалист Мух1амадов Шамилица бицана жакъа къоялде районалъул учрежденияздагун организациязда хасалоде гьабулеб бугеб х1адурлъиялъул. Т1адч1ей гьабуна гьеб жавабияб ишалъулъ ругел г1оларел рахъазда. Гьениб ц1ик1к1араб к1вар буссинабун бук1ана хасало школал хинлъизариялде, росабалъе рач1унел лъел мухъал ц1орозе тунгут1иялде, хасалил шарт1азде данде кколедухъ нухал ва токалъул мухъал къач1ан рахъинариялде. Ш. Мух1амадовасул к1алъаялдаса хадуб жиде-жидер щколалда хасалоде гьабулеб бугеб х1адурлъиялъул, гьеб ишалъулъ дандч1валел зах1малъабазул бицун к1алъана г1емерисел школазул директорзаби, ясли-ахазул заведующиял. Хасало лъелгун токалъул бук1унеб къварилъи загьир гьабуна цо-цо росабазул бегавулзабаз.

Бицаралъул х1асилги гьабун, бугеб ах1вал-х1алалъе къимат кьун, малъа-хъвай, кколезе бадибч1вай гьабун, тасамах1лъи биччараздаса кьварун т1алаб гьабун к1алъана районалъул нухмалъулев Саг1ид Юсуповги. Халгьабиялде росарал суалазе рекъон кколел х1укмаби къабул гьаруна  данделъиялъул ахиралда. Гьеб ана г1ахьаллъаразе пайдаяб, цоцазда рич1иялъул ах1вал-х1алалда.

Х1урматиял ясли-ахазул х1алт1ухъаби!

Рак1-рак1алъ баркула Нужеда воспитателасул ва киналго школалда цебесеб лъай кьеялъул х1алт1ухъабазул къо.

Гьаруна, нужее, чорхое щулияб сахлъи, даимаб рохел, хъизан-рукъалда талих1.

Биччанте къойидаса къойиде ц1ик1к1ине нужеда цере сахлъи щулияб, бицунелде рокьи, гъира бугел лъимал.

Биччанте кидаго зоб роц1ц1ун бук1ине,

Биччанте кидаго бук1ине бакъ,

Биччанте кидаго бук1ине рекъел.

Х. Г1амирханова. Районалъул лъай кьеялъул отделалъул школалда цебесеб лъай кьеялъул методист.

Субботник т1обит1ана

Райадминистрациялъул бет1ер Саг1ид Юсуповасул х1укмуялдалъун Къурбан байрамалда цебесеб къо-23 сентябрь районалда лъазабун бук1ана субботникалъул къолъун. Гьелда г1ахьаллъана районалъул нухмалъулел, райадминистрациялъул, цогидал г1уц1абазул х1алт1ухъаби, росабалъ г1адамалгун школлъимал. Райцентралда ва росабалъ хирияб къоялде рац1ц1а-ракъалъи бук1инабиялъе х1аракаталда х1алт1ана киналго.