Нилъерго г1акълуялдалъун, нилъерго рокьиялдалъун

Дагъистан цебет1езабиялъе ва т1егьазабиялъе ургъарал приоритеталъулал проектазда гьоркьоб к1вар бугеб бак1 кколеб буго «Г1олилазулаб Дагъистан» подпроекталъги. Дагъистаналда бук1ине кколеб къаг1идаялда х1алт1изабулареб ресурслъун лъугьун буго экономикияб къаг1идаялда бет1ералде босун иш гьабулеб г1олохъанаб г1ел. Х1ажат буго жидерго жан-жигарги, къуватги, г1акълуги х1алт1изабун гьел х1алт1уде гъорлъе ц1азе.

Гьеб к1вар бугеб ишалда хурхун кинаб х1алт1и районалда гьабулеб бугебали лъазелъун жакъа ниж дандч1вана районалъул г1олилазда гьоркьоб х1алт1и гьабиялъул комитеталъул председатель Мух1амадов Мух1амад Шапиюлаевичгун. Гьесдаги нижедаги гьоркьоб ккана гьадинаб гара-ч1вари.

-Дагъистан цебет1езабиялъе ургъарал проектазда, г1олилазул бицунелъул Дагъистаналъул бет1ерас к1вар буссинабулеб буго, Дагъистаналъе ц1ияблъун кколеб, волонтеразул багъа-бачариялде. Нилъер районалда кинаб ах1вал-х1ал бугеб гьелда хурхун?

-Абизе ккола нилъер районалдаги г1уц1араб къаг1идаялда унеб бугин волонтеразулаб багъа-бачариян. Кинаб х1алт1и районалда гьабулеб бук1аниги, г1олилал кибго церехъабилъун ч1ола. Нилъер г1олилал жидеего бокьун уна К1удияб Ват1анияб рагъул г1ахьалчаг1азухъе, зах1маталъул ветераназухъе щвезе. Х1ажат батани гьабула гьезие кумек г1азу рехизе бук1аниги, цойги кинаб бук1аниги гьез т1адкъараб иш т1убазе. Г1олилал жалго лъугьун г1ахьаллъула экстремизмалде, терроризмалде данде ч1арал ва г1емерал цогидалги тадбиразда. Гьелъие г1оло районалда г1уц1улел руго волонтеразул централ. Гьел церет1езариялъе, кинаб къаг1идаялда гьеб х1алт1и бачинебали малъизелъун, нижеца т1орит1ула семинарал, тренингал.

Гьезда гьоркьоре рачуна жидеего бокьун х1алт1и гьабизе, ай г1олохъанаб г1елалъулгун бич1ч1и кьеялъулаб, сахаб, заралиял пишаби гъорлъ гьеч1еб г1умру гьабиялъул къаг1идаби лъазаризе бокьарал г1адамал.

-Г1олилазе бич1ч1и кьеялъулаб х1алт1и кинаб къаг1идаялда унеб бугеб?

-Г1олохъанаб г1ел школаги лъуг1ун шагьаралде ц1ализе араб мехалда ккола эбел-инсул рокъоб рук1аралдаса т1убанго бат1ияб ах1вал-х1алалде. Жеги г1умрудул х1албихьи щвеч1ел, жидерго цо ккураб пикру гьеч1ел г1олилал, жалго г1адал г1олохъанал, амма баракат гьеч1ел пишаби гьарулезда гъорлъе ккани, хехго  итизарун гьезул рахъалде ккола. Гьедин, ахирияб заманалда г1олилал чанго бат1ияб бут1аялде рикьарал г1адин, цоял дин-исламалдеги руссун бит1араб нухдасан унел руго, цойгидал нилъеца вагьабиялин абулезул кьеразулъе лъугьунел руго, лъабабилел наркотикал х1алт1изарулезда, гьекъолеб жо гьекъолезда гъорлъе кколел руго. Гьединаб ах1вал-х1алалде ккараб мехалда к1удияб к1вар бук1уна г1олохъанаб г1елалда гьоркьоб гургинал столал, семинарал, бат1и-бат1иял гара-ч1вариял гьарун гьел бит1араб нухде ц1аялъул. Гьеб мурадалда нижеца т1орит1ула г1олилазулгун г1емерал бич1ч1и кьеялъулал х1алт1аби. Гьедин, г1олилазе ц1акъго пайда ц1ик1к1араллъун рук1ана «Дун Россиялъул гражданин» абураб акция, РФялъул пачалихъияб  байрахъалъул къоялде, Россиялъул къоялде, РФялъул ва ДРялъул  Конституциязул, Пачалихъиял символикабазул къоязде дандеруссинал.

К1вар буго бата-батараб гьабулел къват1ахъ теч1ого, г1олила пайдаяб  ишалде руссинариялъулги. Нижеца зама-заманалдасан г1олилазда гьоркьоб т1орит1ула рагъулабгин спортивиял «Зарница» х1аял, «Жея, васал!», «Жея ясал!» конкурсал.

Г1ун бач1унеб г1елалъе рагъулабгин Ват1ан бокьиялъулаб  тарбия кьеялъул мурадалда т1орит1ула К1удияб Ват1анияб рагъул г1ахьалчаг1азулгун дандч1ваял, г1уц1ула Ват1ан ц1унулезул, Бергьенлъиялъул къоязул х1урматалда  диспутал, г1ахьаллъула Бергьенлъиялъул ирсилазул парадалда.

К1вар буго г1олилал спорталде  руссинариялъулги.  Гьеб мурадалда районалда г1емерал т1орит1ула спортивиял тадбирал. Бук1ана школлъималазда гьоркьоб волейболалъул, теннисалъул  первенстваби, лъималазда гьоркьоб спортакиада, «Папа, мама и я спортивная семья» конкурс, районалъулаб туристазулгин край лъазабиязул слет.

- Республикаялъул бет1ерасул проекталда ц1ик1к1араб к1вар буссинабулеб буго пагьму-гьунар бугел г1олилал загьир гьариялде, гьезул рахъ ккун гьел церет1езариялде.

- Г1ун бач1унеб г1ел – нилъер бук1инесеб кколеблъидал, районалда ц1ик1к1араб к1вар кьола пагьму гьунар бугел ц1алдохъаби, г1олилал к1одо гьариялде, гьел халкъазда гьоркьосел, россиялъулал, республикаялъулал конкурсазда, выставкабазда, фестивалазда, олимпиадабазда г1ахьал гьариялде. Районалда т1обит1ула пагьму-гьунар бугел лъималазул ассамблея. Бергьаразе кьола рак1алде щвеялъул сайгъатал, рит1ула бат1и-бат1иял конкурсазда г1ахьаллъизе. Гьел церет1езариялъе кигалго нухал  ралагьула.

Гьедин, нилъер районалъул г1олилал г1ахьаллъана республикаялъул «Вера, надежда и любовь» абураб конкурсалда, халкъазда гьоркьосел бат1и-бат1иял форумазда, «Россиялъул  г1олилазул къо», «Нилъер районалъул г1олилал», «Георгиевская ленточка»,  «Х1ажат гьеч1о наркотикал!», «Ниж сахаб г1умруялъе г1оло» акциязда.

- Кинаб бут1а лъолеб бугеб г1олохъанаб г1елалъе район цебе т1езабиялъе гьабулеб х1алт1улъ?

- Жакъа нилъер г1олилаз жигараб г1ахьаллъи гьабулеб буго районалда гьабулебщинаб кинабго к1вар бугеб х1алт1улъ. Гьез жигар бахъулеб буго жидерго г1умру берцинаблъун ва г1ажаибго интересаблъун гьабиялъе. Нилъ руго бечедаб культураялъул ва т1адег1анаб г1амал-хасияталъул г1адатазул г1адамал. Гьединлъидал, г1олилаз жигар бахъула нилъер умумузул бах1арчияб мисалалда церехун ине, нилъер улкаялъул, республикаялъул ва районалъул бук1инеселъе г1оло жавабчилъиялда х1алт1изе. Г1олилазулгун гьабулеб кинабго х1алт1и данд бала районалъул администрациялъул бет1ер Саг1ид Юсуповасулгун. Кинаб х1алт1и гьабулеб бугониги, гьес нижер рахъ ккола, кумек гьабула, г1акълу кьола. Гьединаллъун рук1ана г1олилазул стратегиялъулаб сессия «Г1олилал – район цебет1езабиялъе г1оло», «Ниж бац1ц1адаб районалъе г1оло», «Нилъер районалъул г1олилал» абурал тадбирал.

- Мух1амад, баркала гара-ч1вариялъухъ, нужер гьабулеб х1алт1иялъе х1ал кьеги. Рак1алда ругел мурадал т1урайги.

- Дуеги баркала, заманги батун нижехъе яч1аралъухъ.

Гара-ч1вари гьабуна Н. Г1алиевалъ.