6 апрелалда районалъул бетlерасул заместитель Тlалхlат Гlамиргlалиевасул нухмалъиялда гъоркь райадминистрациялда тlобитlана гlовул гlужде рахинчlел лъималазул ишазул ва гьезул ихтиярал цlуниялъул рахъалъ комиссиялъул иргадулаб данделъи.
Гьелда гlахьаллъи гьабуна гlовул гlужде рахинчlел лъималазул ишазул ва гьезул ихтияр цlуниялъул рахъалъ жавабияй секретарь Патlимат Асаевалъ, Хунзахъ районалъул КЦСОНалъул директорасул заместитель Гlабдумалик Гlабдумаликовас, Россиялъул МЧСалъул Дагъистаналда бугеб халгьабиялъул отделалъулгун профилактикияб хlалтlи гьабиялъул (ОНДиПР) кlудияв инспектор Хlамзат Сагlидовас ва цогидалги жавабиял хlалтlухъабаз. Данделъиялда гьоркьор лъун рукlана гlовул гlужде рахинчlел лъималазул ва гьезул законниял вакилзабазда хурхун административиял ихтиярал хвезариялъул, законги хвезабун яргъид гlуцlаразул къокъаялъул (НВФ) балугълъичlел лъималазулгун профилактикияб хlалтlи гьабиялъул ва районалъул лъай кьеялъул учреждениял цlа ккеялдаса цlуниялъул суалал. “Лъималазул ва гlун бачlунеб гlелалъул ихтиярал хвезаричlого рукlиналда хурхун профилактикияб хlалтlи тlобитlулеб буго комплексалъулаб къагlидаялда рекъон. Лъай кьеялъул гlуцlабазда аслияб кlвар кьолеб буго захlматаб ахlвал-хlалалде ккарал цlалдохъабазулгун профилактикияб хlалтlи гьабиялде, гьелъ гъорлъе бачуна психологиялъулаб кумекги. Хасаб кlвар кьезе ккола лъималазул сверухъ бугеб дунялалдехун лъикlаб пикру бижизабиялде ва эбел-инсулгун хlалтlи гьабиялде”, - ян абуна Тlалхlат Гlамиргlалиевас. Данделъиялда халгьабуна ихтиярал хвезарурал балугълъичlел лъималазда ва букlине кколедухъ жидедаго тlадал ишал тlуразаричlел эбел-инсуда хурхун гlуцlараб 3 административияб материалалъулги. Щибалда хурхун тlобитlана бичlчlикьеялъулаб хlалтlи ва законалда рекъон къотlана хlукмуги. Гьединго цо хъизан лъуна профилактикияб учеталдаги.
И. МУХIАМАДОВ.
|