Дагъистан Республикаялъул бет1ер Р. Х1. Г1абдулат1иповасул 70 сонилаб юбилеялде гьал къоязда Ц1ада росулъ т1орит1ана районалъул росабазда гьоркьоб волейболалъул рахъалъ къецал. (Живго Рамазан ккола Дагъистаналда волейбол цебет1еялъе мух1канаб ва к1удияб бут1а жинца лъурав спорталъул ветеран). Къецазда г1ахьаллъизе рач1ун рук1ана районалъул анкьго росдал командаби. К1иго къоялъ халат рахъарал х1алуцарал х1аял ана г1уц1адго ва т1адег1анаб даражаялда. Балагьарал разияб х1ай бихьизабуна бекьеч1дерил г1олохъанаб командаялъ. Цебегоялдаса рахъун рук1инч1о бекьеч1 гьадинаб х1адурлъигун цере. Турниралда ункъабилеб бак1 ккуниги бихьулеб бук1ана команда жеги цересел бак1азде бачине рес бугел г1олохъабаздасан г1уц1ун бук1ин ва гьезул бергьенлъаби жеги цере рук1ин. Кидагог1адин хехаб ва лебалаб х1ай бихьизабуна лъег1елдерил командаялъ. Цо-цо машгьурал игрокал гьоркьоса камун рук1аниги командаялда к1вана жиндиего хасиятаб, бат1и-бат1иял комбинацияздалъун бечедаб х1ай бихьизабизе ва бач1ана лъабабилеб бак1алде.

Гьай-гьай, бищунго х1алуцараблъун бук1ана хунздерида ва т1анусдерида гьоркьоб т1оцебесеб бак1алъе г1оло х1ай. Х1ай байбихьилалде, г1емерисел балагьаразул пикруялда рекъон, хунз бергьине кколаан 2:0 х1исабгун. Гьединаб рак1ч1еялде рачунел рук1ана финалалде рач1унаго хунздерица рихьизарурал х1аязги, жибго команда х1албихьи бугел, махщел камилал игроказдасан г1уц1ун бук1иналъги. Гьеб рак1ч1ей бук1анин ккола жалго икроказулъги ва щулалъанин ккола т1оцебесеб партиялда бергьараб мехалъ. Т1анусдерил командаялда рук1ана г1емерисел г1олохъанал, цебеккун росдал командаялда х1ан х1албихьи гьеч1ел игрокал. Амма, гьез мух1канго т1уразарулел рук1ана тренер Г1абдулхаликъовасул малъа-хъваял ва т1адкъаял. Жидеего хасиятаб, риха-хочи гьеч1еб, таваккалаб х1ай бихьизабуна гьез ва 2:1 х1исабалда бергьана.

Х1аязул х1асилал, гьайгьай, данде росила жив-жив игрокасги, тренерзабазги ва хьул буго хадусел х1аязде гьел рач1инин жеги ц1ик1к1араб махщалилаб х1адурлъигун. Мух1канаб пас кьей, таваккалаб гьужум гьаби, командаялъе бищунго пайдаяб х1ай гьаби г1адал рахъалъ ч1ч1ел босараллъун комиссиялъ рик1к1ана:

1.Хатипов М.-Т1ануси;

2.Мух1амадов Г1.-Т1ануси;

3.Нуричуев Ш.-Хунзахъ.

Турнир къалаго ц1игьулдерил ц1игьабун къач1араб волейболалъул площадкаялда к1алъана районалъул администрациялъул бет1ерасул заместитель Г1аммаев Ш. М. Гьес бицана Республикаялъул бет1ер Р. Г1абдулат1иповас Дагъистаналда спорт цебет1езабиялъулъ лъолеб бугеб к1удияб бут1аялъулги ва районалъул администрациялъ гьелде кьолеб кидагосеб к1варалъулги. Ахиралда Ш. Г1аммаевас баркана г1олохъабазда бергьенлъаби ва кьуна г1арцулал сайигъатал.

Г1. Мух1амадов.