Нилъер улкаялдаго г1адин, районалдаги руго пачалихъияб гуреб, г1адамал бет1ергьанал бак1азда (тукабазда, кофеязда, гь.ц.) х1алт1улел г1адамал. Г1иц1го кодобе щолеб мухь гурони, т1ок1аб хайир гьединаб х1алт1ул бук1унаро. Бищунго квешаб - пенсия бахъулелъул пачалихъияб гуреб бак1алда х1алт1араб заман стажалде гъорлъе бачунаро. Формалияб гуреб х1алт1ул х1акъалъулъ суал гьоркьоб лъураб данделъи т1обит1ана 22 июлалда райадминистрациялъул данделъабазул залалда. Гьелда г1ахьаллъана районалъул т1алъи, предпринимателал, росдал маг1ишаталъул бут1аялда х1алт1и гьабулел ва цогидалги.
Данделъи бачарав районалъул бет1ерасул заместитель С. Батировас бицана Россиялдаго кризис бук1иналда бан, бюджеталде жанибе г1арац бач1инабизе бажарараб х1алт1и гьабизе кколилан. ДРялъул х1укуматалъул 2014 соналъул 19 сентябралда бахъараб № 298-р бихьизабиги кьоч1ое босун, районалдаги х1алт1аби гьаризе руго пачалихъиял гурел х1алт1абазда ругел г1адамал т1атинаризе, гьезул х1алт1и законалда данде кколедухъ гьабизе. Ай, тукабазул, кафеязул ва цогидалги бак1азул бет1ергьабаз х1алт1ул законалда дандекколеб къот1и-къай гьабизе кколеб буго х1алт1изе тарал г1адамазулгун. 1166 чиясулгун х1алт1ул къот1и-къаял гьареян бихьизабун буго районалъе. Х1алт1ул къот1и-къайги гьабич1ого х1алт1ухъан х1алт1изавулев ватарасда бихьизабун буго г1ак1а бахъизе (щтраф). Цо бак1алда хъизаналъул чаг1и х1алт1улел ругони, гьезулгун х1алт1ул къот1и-къай гьабизе кколаро. Къот1и-къай гьабизе ккола г1иц1го бат1ияв чи х1алт1изе восун вугони. Х1алт1ул къот1и-къай хъваялъул маг1на буго х1укуматалъул бук1а бат1ияб бук1а х1алт1уда вугев х1алт1ухъан вугин, гьесие рук1ине кколел шарт1алги ч1езаризе кколин абураб, ай г1адамал бет1ергьанаб бак1алда х1алт1улезулги зах1маталъул книжкаялда хъвай-хъваг1ай гьаби ва гьеб пенсия бахъулелъул рик1к1ин.
Районалъул бет1ер С. Юсуповасги данделъаразда бич1ч1изабуна «конверталда» жаниб щолеб харж-мухьалдаса «хъах1аб» харжил т1ок1лъиялъул. Гьес предпринимателазда лъазабуна х1ажатал документалги рук1инареян, налогалги кьеян, жидерго тукабазда сверухъги рац1ц1а-ракъалъиги ч1езабеян.
Данделъиялде рач1аразул суалазе жавабал кьуна бат1и-бат1иял г1уц1абазул специалистазги.
П. Гунашева.
|