Цебеккун лъазабун бук1ахъе, 9-10 августалда Хунзахъ росулъ т1обит1ана росдал администрациялде гъорлъе унел росабазда гьоркьор спортивиял къецал. Къецал ана ц1акъ интересаб ах1вал-х1алалда.

Хунзахъ росдал администрациялде гъорлъе г1езег1ан росаби унел рук1аниги, спартакиадаялда г1ахьаллъи гьабуна г1иц1го лъабго росдал командабаз: Хунзахъ ва Гъонохъ росабазул к1и-к1и ва Заг1иб росдал цо командаялъ. Къецазул г1ахьалчаг1и саназухъ ралагьун рикьун рук1ана лъабго къукъаялде: ич1абилеб классалде щвезег1ан, 9-11 классазул ц1алдохъаби ва ч1ах1иял.

Спартакиада г1уц1ун бук1ана  микьго спорталъул тайпаялдасан: рекери (кросс), лъедей, ядро рехи, турникалда ц1ай, гиря борхи, волейбол, футбол, канат ц1ай.

Х1алуцарал, интересал, ралагьаразул гъира базабулел къецазда т1оцересел бак1азе мустах1икълъана бищунго лебалал, махщел камилал спорт бокьулел.

Кроссалда т1оцересел бак1ал щвана 9 классалде щвезег1ан ругезда гьоркьоб Хунзахъа Х1асанов Мух1амадие, 9-11  классазул ц1алдохъабазда гьоркьоб – Хунзахъа Алхасов Шамилие ва ч1ах1иязда гьоркьоб – Гъонохъа Мух1амадов Мух1амадрасулие.

Лъим ххан цересел бак1азе мустах1икълъана Хунзахъа Г1амирханов Мух1амад (9 классалде щвезег1ан) ва Къурамух1амадов Мурад (9-11 кл.), Заг1иса  Мух1амадов Ах1мад (ч1ах1иял).

Ядро рехиялда дандиязда т1ад  ч1ел босана Хунзахъа Нуричуев Юсупица.

Турникалда ц1аялда бищун  лъик1ал х1асилал рихьизаруна Хунзахъа Къадиев Х1асаница. Бищун г1емер гиря борхана Хунзахъа Гьиматов Х1амзатица.

Командаялъулал х1аяллъун ккола  волейбол, футбол х1ай. Волейбол х1ан т1оцебесеб ва лъабабилеб бак1ал щвана  гъанхъадерил к1иябго командаялъе, к1иабилеб бак1 щвана хунздерие. Футболалда т1алъи босана хунздерица – гьезие щвана т1оцебесеб ва к1иабилеб бак1ал, лъабабилеб бак1 щвана гъанхъадерие.

Интересал рук1ана канат ц1аялъул  къецалги. Гьезда т1оцебесеб бак1 босана Заг1иб росдал командаялъ, к1иабилеб бак1 щвана гъанхъадерие ва лъабабилеб бак1 – хунздерие.

Къецал къалаго г1ахьалчаг1азда районалъул бет1ер С. Юсуповасул ва жиндирго рахъаздасан бергьенлъабиги баркун  к1алъана Хунзахъ росдал  бегавул Т1алх1атов Хизри ва бет1ерав судья Малачиев Шамил. Спартакиадаялда бергьарал к1одо гьаруна грамотабаздалъун ва г1арцулал сайгъатаздалъун.

Къецазда шварал бергьенлъабаздасаги, бищун аслияб бергьенлъилъун ккола, спартакиада сабаблъун, росабазул г1адамазда гьоркьоб лъугьарал гьуинлъи-вацлъиялъулал гьоркьорлъаби. Цогидал росабазги бокьилаан гьединал тадбирал т1орит1изе.

П. Гунашева.