Дагъистан республикаялъул х1укуматалъул председателасул
заместитель Ш. Шариповасул, х1укуматалъул маг1ишатияб управлениялъул начальник
К. Ясуловасул, районалъул нухмалъулев С. Юсуповасул, росдал маг1ишаталъул
управлениялъул начальник М. Г1алиевасул, Ц1ада ОПХялъул директор Н.
Патах1овасул ва цогидал жавабиял г1адамазул г1ахьаллъигун ц1игьулдерил
хъутаналда х1алт1изе биччана ц1ияб автоматикияб линия. Г1адатияб къаг1идаялъ абуни гьеб ккола
ражидул бут1рулги рихизарун, гьит1инаб-к1удияб бат1а гьабун сорталги гьарун,
заралиял х1ут1азде данде дару гьабун бакъвазеги гьабун гьелъул бекьизе хьон
х1адур гьабулеб автоматикияб линия.
«АгроИнвест» ОООялъул генералияв директорасул заместитель
Х1ажимурад Х1ажиевасул раг1абазда рекъон гьеб ккола Италиялъул агромодулазул
кьуч1алда Дагъистаналда «АгроДагИталия» агротехнопарк г1уц1и ва хадубккун гьеб
цебет1езаби.
-Хурухъанлъиялъул агромодулазул х1албихьизе ракьал
щунгут1иялъ гьеб иш 2017-18 соназ раг1алде бахъинабизе х1исабалде босун
бук1инч1о республикаялда, амма районалъул ва Ц1ада ОПХялъул нухмалъулезул
х1аракаталдалъун агромодуль 3 соналъ цебе х1алт1изе кьезе рес щвана.
Испаниялъул J.J.Broch компаниялъухъа босана ражи бекьизе
х1адур гьабулеб технологиялъул линия, бекьулеб ва гьелъие хъулухъ гьабулеб
техника, трактор ва цогидабги х1ажатабщинаб.
Дагъистаналда гьеб ц1илъи г1умруялде бахъинабизе биччалеб
буго 14 миллиардалдасаги ц1ик1к1ун гъурущ, х1адур гьабизе буго ракь, щвараб
продукция къач1ан хадуб, гьелъул хут1елал (отход) рук1ине гьеч1о,-ян бицана Х1.
Х1ажиевас.
|