Г1адамазул парахалъи ц1унун

Гьал г1агарал къоязда Россиялда, гьелдаго гьоркьоб Дагъистаналда ва нилъер районалда к1одо гьабуна, цебе милициялъул къолъун рик1к1унеб бук1араб, гьанже жанисел ишазул х1алт1ухъанасул къоялде сверизабураб полициялъул х1алт1ухъанасул рохалилаб байрам.

Октябралъулаб революция бергьун хадуб киса-кибго улкаялда т1ибит1ана такъсирчилъи, т1егьан бач1унеб бук1ана ц1огь, ч1вай-хъвей, бикъа-хъами. Х1ажат бук1ана гьелда данде рагъ гьабизе хасаб г1уц1и. Гьеб мурадалда улкаялда г1уц1ун бук1ана улкаялъул жанисел ишазул органлъун кколеб г1уц1и-милиция. Гьелдаса нахъе ана 95 сон. Амма гьаб жакъа къоялдаги камун гьеч1о такъсирчаг1и, бикъа-хъамулел, экстремистал, террористал, ч1ук1начаг1и ва гь.ц.

Гьединаб ах1вал-х1алалда нилъер районалъул полициялъул х1алт1ухъабаз рак1 бац1ц1адго т1убазабулеб буго жидедаго т1адаб налъи. Гьел х1алт1улел руго демократиялъул, рагьун бициналъул кьуч1алда зах1матчаг1азе кумекалъе ратизе, г1адамазул ихтиярал ц1унизе, такъсирчилъи гьукъизе. Полициялъул х1алт1и т1ей гьеч1ого бухьараб буго политикиял, экономикиял ва рух1иял бут1абазда. Къо бахъанаг1ан полициялъул х1алт1ухъабаз щула гьарулел руго зах1матчаг1азулгун бухьенал, ц1ик1к1унел руго гьезул интересал ва ихтиярал ц1унун гьабулеб х1алт1и.

Полициялъул х1алт1ухъабазул лъик1аб г1адатлъун лъугьунеб буго зах1матчаг1азул мурадал ц1униялъе г1оло, гьелгун дандч1ваял, х1исабкьеял, гьезул суалазе ч1ванкъот1арал жавабал кьеял т1орит1и. Гьез ц1унула къват1ахъ, транспорталда ва общественныял бак1азда г1адлу-низам, х1аракатаб къеркьей гьабула гьекъон-мехтун транспорт бачунездехун, гьебго г1иллаялдалъун г1адамазул рах1ат, х1алхьи хвезабулездехун.

Гражданазул ихтиярал ва законалъулал т1алабал хвезаризе риччангут1иялде к1варги кьолаго, полициялъул х1алт1ухъабаз мух1канго т1орит1ула оперативиялгун ц1ех-рехалъулал х1алт1аби, т1атинарула т1олгороссиялъул ц1ех-рехалда ругелгицин. Гьедин, нижеда кквезе к1вана гьабураб такъсиралъе г1оло Мах1ачхъалаялда жанив т1амунги вук1ун, т1урун унев вук1арав Гумбет районалдаса г1олохъанчи, т1атинаруна бикъа-хъамиял гьарурал ц1огьал, т1аг1инаруна Гьоц1алъ ва Г1орут1а ратарал блиндажал. Гьелъ нилъер районалда такъсирчилъи рагьиялъул иш республикаялъулалдаса г1емерго ц1ик1к1унеб буго.

Ахириял соназда г1емерго борхана г1аммаб буголъи ц1униялъул, бикъа-хъамиялде данде рагъ гьабиялъул, уголовныяб розыскалъул, патрулазулгин постазулаб хъулухъалъул, ц1ех-рехазулаб аппараталъул х1аракатчилъи. Полициялда х1алт1улеб буго кинологиялъулаб хъулухъ. Буго цо г1адамал, цогидаб ярагъ т1атинабизе к1олеб к1иго гьой.

Гьебго заманалда полициялда ц1ик1к1араб к1вар кьолеб буго х1алт1ухъабазул х1алт1ул шарт1ал лъик1лъизариялдеги. Бан лъуг1улеб буго киналго шарт1алги жанир ругеб мина. Бихизабизе буго гьабсаг1аталда ниж жанир ругеб мина ва гьелъул бак1алда гьабизе буго санаг1атаб площадка. Буго г1ураб къадаралда транспорт.

Гьел лъик1ал рахъазда цадахъго, камун гьеч1о полициялда г1унгут1абиги. Байрамалъулаб къоялъ загьир гьарич1ониги, нижеда гьел лъала, рич1ч1ула. Нижер т1олабго коллектив къеркьолеб буго гьел т1аг1инаризе. Полициялъул х1алт1ухъанасе зах1малъула гражданазул кумек, квербакъи гьеч1ого такъсир т1атинабизе. Гьединлъидал, гьари буго районалъул росабалъ бук1аниги, райцентралда бук1аниги, щаклъи бугел г1адамал рихьани, хех гьабун полициялда лъазабеян. Нужеца гьеб гьабун бук1ин лъидаго лъазабизе гьеч1о. Гьеб рахъалъ нужее кинаб бук1аниги х1инкъи бук1ине гьеч1о.

Гьабсаг1аталда полициялда унеб буго «Лъазабе, киб ричулел ругел хвалде ах1улел» абураб операция. Дагьал гьеч1о гьаб ахирияб заманалда наркотикал х1алт1изарулел, гьел ричулел. Гьелъ аслияб къаг1идаялда хвалде бачунеб буго г1олохъанаб г1ел. Гьединлъидал нилъер щивасул налъилъун ккола гьел хвалде г1адамал ах1улел наркотикал г1езарулел, ричулел къват1ир ч1вазари.

Цойги, полициялда унеб буго «Выкуп» абураб операцияги. Нилъер г1адамазухъ буго кинаб г1иллаялдалъун щун батаниги, г1емераб ярагъ. Нилъеда лъала рагъалъ вас гьавулареблъи, ярагъалъ г1адамал лъик1алде рачунареблъи. Гьеб кодоб бук1уналдаса, бук1инч1ого г1емерго лъик1 буго. Гьединлъидал, полициялда унеб буго ярагъ кодоб бугел, амма бичизе бокьарал г1адамазе, бичулеб бугони, гьеб босулеб тадбир. Кьола щибаб ярагъалъухъ кколеб мухь.