Инсанасул чорхол бищун цебе доб дуниялалде щиб унебали лъалищ нужеда, хириял газета ц1алулел? Т1оцебесеб иргаялда нилъ рехун толел руго цаби-г1усаз. Г1умруялъулго т1аг1ам жал гьеч1они лъуг1улел-г1иц1го кваназе гурел, г1адамалгун гара-ч1варизе, разилъи загьир гьабизе, кканани-нилъго ц1унизеJ х1ажалъулел гьел рокьол органазул г1умру бук1уна ц1акъго къокъаб. Гьеб халалъизеян абуни рес буго г1иц1го г1ужда саламатав г1усал-цабзазул тохтур дандч1вани. Дир талих1 къосиналъ нилъер районалъул Гъонохъ росулъа Дайтбегов Сулейманх1ажи дида лъана ц1акъго кват1ун-к1алдиб бугебщинаб г1ус-цаялда хириял клиникабазул тохтурзаби квалун хадуб. «Ч1ег1ераб» къоялде танщинал гъурщаздаса ят1алъи гурони, доз раг1и кьураб «голливудалъул» гьимиги дие щвеч1о.

Кабинеталде жание лъугьарайго бадибч1вай гьабуна ракьцояс, «Маг1арухъ х1ат1азда гъорлъ г1урччинаб аптекаги бук1ун, жиндихъе ккезе нечоларищан». Гьеб дие бук1ана г1ажаибаб х1ужалъун-щай гурелъул аск1оре анщинал стоматологаз т1убан бат1ияб «бакъанлъидал» дие бачун бук1араб. Доб мехалъ дирго к1иго лъаг1алил харжги т1ад хвезабун моц1иде бортараб «гьимиялъеги» тохтурас раг1а-ракьанде щвараб къимат кьуна. «Киг1ан хашабги нилъерго г1ус г1адаб жо бук1унаро. Гьеб бокьухъе бахъинабизе жакъасел технологиязда к1везеги к1ола. Бищун цебе дур ца-к1ал дихъе ккун бук1арабани, дица киданиги биччазе бук1инч1о, ругел цабиги ххун лъуг1изарун, гьаб искусство т1ад лъезе-янги абун тударулеб сурк1инибе бортун ана 50 азарабго гъурущ (2003 соналъ гьеб квешаб г1арац бук1инч1о). Прием лъуг1изег1ан ц1амуца, ромашкаялъ г1ус-к1ал хулиялъул бугеб пайда хайиралъул бицунеб бук1ана тохтурас бац1ц1адаб,унго-унгояб хундерил мац1алъ. Г1ажаибго квер т1адагьав чигиха Сулейманх1ажи вугев! Гьесул малъа-хъваяз ругънаде ц1ам щвалеб бук1ана дир, 70 сонил ригьалда холелъулцин жиндирго 32 г1ус к1алдиб бук1арав мунагьал чураяв эменги рак1алде щун. Досги цаби ц1амуца чурулаан. Гьелдаса хадуб чан нухалъ тохтур-стоматолог Дайтбегов х1алт1улеб клиникаялде дун щваниги, дида кидаго гьесухъе батулаан к1удияб ирга, г1емерго Хунзахъ мухъалдаса г1адамал жинда ч1араб. Щивха кколев, г1усал-цабзазул сахлъи ц1униялъул, гьими бикьиялъул удаманлъун жив рик1к1унев Сумах1ажи (гьедин абула гьесде божилъи-адабгун районцояз)? Дайтбегов Сулейманх1ажи Мух1амадович гьавуна 1952 соналъул 22 октябралда гьит1инабго Гъонохъ росулъ. Г1агараб росдал байбихьул школалдаса хадуб ц1алана Хунзахъ гьоркьохъеб школалда. Гьеб лъуг1араб 1971 соналъ ах1ула Советияб Армиялда т1адаб рагъулаб борч т1убазе. Хъулухъ гьабула Азербайджан СССРалъул Кировобад шагьаралда. Армиялдаса вуссун хадуб лъаг1елг1ан заманалъ х1алт1ула Хизроевасул ц1аралда бугеб колхозалъул комсомол г1уц1иялъул секретарьлъун. 1974 соналъ Сулейманх1ажи ц1ализе лъугьуна Дагъистаналъул Пачалихъияб Медицинаялъул институталъул стоматологиялъул факультеталде. Диплом кодобе кьураб 1979 соналъ тохтур Дайтбегов х1алт1изе вит1ула Марий АССралъул Йошкар-Ола шагьаралде. Гьенив х1алт1ула шагьаралъул стоматологиялъул поликлиникаялда, ортопедиялъул отделениялда. Жиндихъе рач1арал пациентал рази-ракиго, мурад т1убан нахъе ин бук1анила, чияр ракьалда х1алт1улаго, жиндир аслияб мурадилан бицана Сулейман Мух1амадовичас дида. 1988 соналъ гьев нахъвуссана ват1аналде ва гьале жакъа къоялде щвезег1анги дагъистаниязе гьимигун сахлъи бикьулев вуго.

Х1алт1ана тохтур-стоматологлъун Шамхалалда, Мах1ачхъалаялъул «Мечта», «стомадент» поликлиникабазда. Ахирисел соназ х1алт1улев вуго «ЦУМ»алда аск1об бугеб «Дентал-центр» стоматологиялда. Маг1арухъа г1едег1ун рач1унел пациентал рич1ч1ун, Сулейманх1ажица цаби-г1усал унтарал къабул гьарулел руго рокъорги. Т1убарал сардал-къояз свак лъач1ого дару-сабабазда гъорлъ вук1унев инсудасан мах1 ч1вайдал, «Пугь, больницаялъул мах1» илан гьит1инай ч1ужу ясалъ абулеб бук1араб куцги бицун велъана Сумах1ажи дие, лъимерлъуда рук1аго жиндасан ч1вараб мах1 рихиналъ, цонигиял лъимал медицинаялде разаризе к1веч1илан. Кидаго рази-ракияв, к1вар кьун жиндихъе рач1аразухъ г1енеккулев, г1адатав инсанги вуго тохтур Дайтбегов. Гьес х1аракат бахъула жинда к1олеб бак1алдасан районцоязе скидка, кумек гьабизеги. Г1адада хвараблъун батугеги гьесул гьеб. Жиндица т1аса бищараб иш рак1бац1ц1адго, унтаразул божилъи бижизабуледухъ т1убазабулев, маг1арул иман-ях1ги чорхолъа лъуг1изе теч1ев инсан вуго нилъер районцояв. Гьесул адаб гьабулеб буго цадахъ х1алт1улел г1исинал пишацоязги, нухмалъиялъги, жалго пациентазги. Жеги рик1к1ен тун соназ г1адамазе гьимиял рикьизе щулияб сахлъиги, тавпикъги, х1алт1улъ бергьенлъабиги гьарула дица гьев унго-унгояв махщалиласе.

Ф. Мух1амадова