Рохула, г1олохъанаб г1елалъ, х1укуматалъул х1алт1и гьеч1ин, кинабго квеш бугин теч1ого, жидеего бет1ербахъиялъе, хъизам-агьлу хьихьиялъе предпринимательлъиялъул нухал ралагьун, росдал маг1ишат бахъинабиялъе ц1иял, лъик1аб идеял кьун ч1аголъи гьабулеб бихьидал.
Гьанжег1агар дир лъай-хъвай ккана Моч1охъа Г1абдулкъудусова Пат1иматилгун. Бет1ергьанчи Муслимгун цадахъ г1олохъанаб хъизамалъ рагьун буго форель ччуг1аялъул лъабго тайпа г1езабизе рак1алда бугеб маг1ишат. 2 гектар ижараялъе босараб ракьалда жидерго къуваталдалъун рос-лъадуца гьабун буго к1иго х1ор, лъабго искусственияб бассейн, бачун буго лъим. Жидеца байбихьи лъураб ишалдехун к1удияб рокьигун Муслимица бицана лъаг1елг1ан заманалда жаниб Кисловодскалдаса заказ гьабун 50000 т1инч1 икра босанила жидеца, гьезул бащдалг1аги рахъинаризе, к1удиял г1езаризе к1вани, 20-25 тонна ччуг1илг1аги лъаг1алие щвезе рак1алдаги бугила. Гьанжег1агар 300 азарго гъурщиде садокал лъезеги рак1алда бугила жидеда, амма киналъего г1арцулал ресал г1унт1улел гьеч1елъул, ц1ияб рагьараб иш цебет1еялъе пачалихъияб кумек-квербакъи щвеялдеги к1удияб хьул бугила. Районалъул нухмалъиялъул кинаб бербалагьийин нужер х1аракатчилъиялде бугебан ц1ехедал, г1олохъанал маг1ишатчаг1аз бицана, дагьав цеве Моч1охъе вач1арав районалъул нухмалъулев Саг1ид Юсуповас маг1ишаталда унел х1алт1аби рихьун кутакалда жидер рак1 батизабун, кинабго рахъалъулаб кумек гьабилин раг1и кьун бугилан. Гьелъухъ гьесие рак1-рак1алъулаб баркалаги загьир гьабулеб бук1ана Г1абдулкъудусоваз. Макъалаялъул ахиралда гьаризе бокьун буго г1олохъанал предпринимателазе гьабулеб ишалъе Аллагьасулги пачалихъалъулги кумек, гьабулелъулъ къуват ва, гьабсаг1ат браконьерлъиялъулаб къаг1идаялъ ккун форель лъуг1изабураб мач1хъадерил х1оринибе гьазул гьит1инаб маг1ишаталъ г1езабун кьураб ччуг1аги биччан, доб коч1олъ г1адин нилъер т1абиг1ияб х1ор Дагъистаналдаго, улкаялдаго ц1ияб къуватгун машгьурлъагиян. Амин.
Ф. Мух1амадова.
|