Умумузул аби буго жамаг1аталъул газа кьурдаги рек1унин абураб. Гьеб абиялъе рит1ухъал, ккаралъуб цадахъ рахъун х1алт1улел, цоцазе кумек бугел г1адамал ратана дида Х1ариколо росдал администрациялъул бет1ерлъун вищарал т1оцересел къояздасанго к1ахъиязул жамаг1ат. Цадахъ лъугьун г1аммаб, къуваталдалъун гьаризе х1алт1абийин абуни гьенир г1езег1ан рук1ана. Масала, росу бакьулъ бугеб кьо, мажгиталъул т1ох къач1ай г1адал х1алт1аби рук1ана бищунго аслиялги рес гьеч1олъиялъ нахъ рахъун таралги. Кьодул ц1иял сакал гьарун гьеб къач1азе бук1иналъул бицен гьабидал Мах1ачхъалаялда г1умру гьабун вугев Г1абдурах1манов Мух1амадица (Маккал) т1аде босана гьелъие х1ажалъулеб г1арцул суал. Къокъаб заманалда сакал гьаризе гамач1ги, гьезда сверун кквезе къоноги, х1ажатаб къадаралда цемент-салиги кьода аск1об ч1езабидал г1олохъабиги балагьун ч1еч1о. Х1ажатаб данделъарабго жидерго бригадаги г1уц1ун х1алт1улъе журана вацал Г1абдурах1ман ва Сайгид Г1абдурах1мановал, Мух1амадов Дибир, Гъазиев Х1ажи, Г1абдулаев Ах1мад, Мух1амадов Шарапудин ва цогидалги. Гьанже росу бакьулъ бугеб кьо ц1игьабурабг1анги берцин лъугьана, кват1ич1ого саказда гьоркьор лъезе руго махул решеткабиги.
Мух1амадов Дибирил х1аракаталдалъун байбихьана мажгиталъул т1охда басралъараб шиферги бахъун ц1ияб чердак гьабизе. Гьесул рахъ ккуна вацал Наби ва Камил Малламух1амадовазги цадахъго т1адехун рехсарал г1олохъабазул бригадаялъги. Г1еч1елъубе т1адеги росдадаса бак1арана ресалда рекъараб г1арацги. Цолъун гьабураб х1алт1и цебеги т1ола баркатги лъола.
Г1емер мех иналдего чердакалда гъоркь цоги этажги гьабун мажгиталъул т1охги лъуг1изабуна гьез. Руго жеги х1исабалде росарал цогидал х1алт1абиги, ресалда рекъон гьелги рахъинарила г1умруялде иншаАллагь. Рак1-рак1алъул баркала буго дица т1адехун рехсарал г1олохъабазе. Нужер гьабулелда баракатги лъеги сахлъиялдаги таги Аллагьас, нагагьал балагьаздасаги ц1унаги киналго. Нагагьлъун дихъа гьаниб рехсеч1ого хут1арасдаги гьарула т1аса лъугьаян. Цоги нухалъ баркала киназего.
С. Х1айбулаев, Х1ариколо росдал администрациялъул бет1ер.
|