Къанаг1ат гурони Дагъистаналда раг1ич1еб машгьурлъич1еб спорталъул тайпаялда районцояз г1ахьаллъи гьабун гуребги бергьенлъаби росиялъги рохизарула, Г1иц1го спорт бокьулел гурелги, т1олалго районцоялги. Х1ариколо росулъа Ибрагьимов Х1ажимурад Г1абдурах1манович ккола Дагъистаналда цого-цо вахъарав Бразилиялъул Джиу-джитсу спорталъул ч1ег1ераб рачлил бет1ергьан. Джиу-джитсуялъул Бразилиялъул тайпаялъе ругьун гьавизе Х1ажимурад хьвадула Буйнакскиялъул «Checkmat Dagestan» клубалде СШАялъул лъабц1ул чемпион Марко «Шарпей» Мачадода цеве.
Исана Санкт-Петербургалда «Волна» спортивияб к1алг1аялда т1обит1араб Бразилиялъул Джиу-джитсуялъул «Короли-Партера» абураб рагьараб чемпионаталда чанги х1албихьи бугел спортсменазде дандеги вахъун, гьеб спорталъул к1иго тайпаялда призерлъун вахъана нилъер ракьцояв. Кимоно рет1ун гугарулеб тайпаялда гьев мустах1икълъана к1иабилеб бак1алъе, кимоно рет1инч1ого-лъабабилеб бак1алъе. Гьел бергьенлъабаз рес щвана 22 сон бугев г1олиласе дагьайги ч1ах1иял къецазда г1ахьаллъизе. Гьал къоязда Х1ажимурад т1адч1ун х1адурулев вуго Абу-Дабиялда т1обит1изе бугеб Джиу-джитсуялъул дунялалъул чемпионаталда г1ахьаллъизе. Нижецаги, районцоязул рахъалдасан, гьарула Х1ажимурадие гьев г1ахьаллъарал киналго чемпионатаздаса бергьенлъабигун т1ад вуссине.
|