Баркула
Республикаялъул Бет1ерас къимат кьей
 Дагъистаналъул мустах1икъай учительница
Ц1ияб соналда цебе республикаялъул Бет1ерасул ишал т1уралев Владимир Васильевас пачалихъиял шапакъатаздалъун, х1урматиял ц1араздалъун к1одо гьаруна к1удияб къокъа дагъистаниязул. Гьелда гьоркьое кканаХунзахъ районалъул Бакьегьеч1и гьоркьохъеб школалъул директор Х1амзатова Пат1имат Х1адисовнаги.
«Дагъистаналъул мустах1икъав учитель» абураб х1урматияб ц1ар щвана педагогалъе 29 декабралда «Дом дружбы» к1алг1аялда т1обит1араб байрамалда цебесеб дандеруссиналда.
Гьединго школалъе кьуна «Газель» микроавтобус. Бергьенлъаби т1аса унгеги 2018 соналъ бекьеч1дерилги районалъулги лъай кьеялъул г1уц1абаздаса, Пат1иматиеги баракат бугеб батаги х1урматияб ц1ар, хадур г1емерлъаги щолел шапакъаталги!
***
Ц1иял идеязе, жамг1ияталъе ва республикаялъе пайдаял проектазе квербакъи бук1инабизеян, Дагъистаналъул т1алъиялъ санайил т1орит1ула бат1и-бат1иял грантазул конкурсал.
Исанаги, бат1и-бат1иял бут1абазда цебеккунго лъазабурал къецазул х1асилал дандеги росун, загьирлъана 37 грант щварав дагъистанияв.
Йиго гьезда гьоркьой районалъул газеталъул бет1ерай редактор Фатима Мух1амадовнаги. «Миллиял мац1азда хъвадарулел журналистазе - кумек» номинациялда гьелъул «Ц1адаса Х1амзат – Аваристаналъул Крылов» проект республикаялъул нухмалъулесул квербакъиялъе мустах1икъаблъун рик1к1ана.
Хадубккун г1емерлъаги дур творческияб нухда бергьенлъаби, пишацояй!
| 
