Бит1ун г1олохъанлъи т1егьалеб г1ужалъ т1ад ярагъ борчине ккана Хунзахъа Къебедов Х1амидицаги. 18 соналъул г1умруялда вук1ана гьев 1941 соналъул июналда Ват1ан ц1унизе axlapaб мехалъ. Рагъулаб хъулухъ гьабизе ккана 18 армиялъул 318 кьвагьдохъабазул дивизиялъул 1339 полкалъул автоматчиказул ротаялде. Гьев вук1ана х1инкъи-къай гьеч1ев, тирияв, лебалав, командованиялъул буюрухъ т1ад калам бук1унаредухъ т1убазабулев рагъухъанлъун. Къокъаб заманалда Къебедов вахъана ротаялъул старшиналъун.
1943 соналъул 10 сентябралда Новороссийск тушманасдаса эркен гьабизе 18 аб. армиялъ Ч1ег1ераб ралъдал раг1алде десант рехана. Гьеб десанталда гъорлъ вук1ана маг1арул ях1ги, намусги чорхолъ бессарав старшина Къебедовги. Ралъдал раг1алда решт1аралго, нилъер десантникал тушманасул щулалъабазде гьужумалъ ана. Фашистаз нилъерал гор свериялде ккезаруна. Ункъго сордо-къоялъ нилъераз тушманасулгун гьоркьоса къот1ич1еб рагъ гьабуна ва камиги ккеч1ого, десантникал горсвериялдаса къват1ире рорч1ана.
Оборонаялъул министерствалъул Подольскиялда бугеб музеялъул архивалдаса бач1араб бая-налда хъвалеб буго:
-«Тушманасдаса Новороссийск эркен гьабизе рехараб десанталъул автоматчиказул старшина Къебедов Х1амидица тушманасул солдатазул ва офицерзабазул 15 чи ч1вана ва танкабазде рехулеб гранатаялъ цо автомашинаги кьвагьизабуна»-абун. Гьел ва цойгидалги бах1арчиял рагъулал хъулухъазе г1оло Къебедов Х1амидил каранда гвангъана «Баг1араб ц1ва» орден.
1944 соналъул 28 январалдаги 1339 аб. кьвагьдохъабазул полкалъул автоматчиказул десант рехана Югалъулаб Крымалде, гьелда гъорлъ вук1ана нилъер маг1арулавги. Севастополалъул районалда нилъер десантникал, гьаб нухалъги, тушманасул горсвериялде ккана. Гьенив зах1матго лъукъана Х1амид ва гьевги цадахъ рук1аралги асирлъиялде ккана. Ват1алъана гьев гъежалдаса.
Ват1анияб рагъ лъуг1улеб мехалъ Х1амид вук1ана асирлъиялде ккарал рагъухъабазул лагералда Франциялъул Лиль шагьаралда. Гьеб лагералдаса Къебедов эркен гьавуна Америкаялъул аскараз ва 1945 соналъул 13 августалда Германиялъул Торгау шагьаралда бук1араб фильтрационнияб пункталда асирлъиялде ккеялъе г1иллабиги мух1кан гьарун, Къебедов Х1амид жиндирго г1агараб росулъе-Хунзахъе т1ад вуссинавуна.
Ват1анияб рагъдаса хадуб школазда малъулеб бук1ана рагъулаб г1елму (военное дело). Г1араниб гьоркьохъеб школалда гьелъул дарсал кьолаан рагъул инвалид «гъеж гьеч1ев Х1амидица». Рагъулаб къаг1идаялъ кьварун рет1а-къарав гьес цо квералъ х1алаан волейбол, гьев к1анц1улаан борхалъудеги ва халалъухъеги, гамач1ги рехулаан районалдаго бищунго рик1к1аде. Дарсаздаги гьес ц1алдохъаби куцалаан солдатал г1адин рук1ине ва гьеб рахъалъ бигьалъаби гьарулароан лъиениги, я ясазе, я васазе. Гьесул къадру бук1ана учительзабазул, умумузул коллективазда гъорлъги. Гьес х1аракатаб г1ахьаллъи гьабулаан районалъул общественнияб г1умруялъулъги, жамаг1атазул ишазулъги.
Рагъулал нухазда бихьараб зах1малъи-къварилъиялъ ахир-къадги жиндирабго гьабич1ого теч1о. 1965 соналда г1исинал лъималги, г1олохъанай лъадиги, хадуб г1олеб г1елалъе мисалияб лъалк1ги нахъе тун, абадияб рукъалде вуссана Х1амид. Алжан насиб гьабун батаги гьесие.
|