Гьал
къоязда байбихьана Дагъистан республикаялъул Бет1ерасулгун Х1укуматалъул
Администрациялъ Украинаялда унеб бугеб хасаб рагъулаб операциялъул
г1ахьачаг1аздагун ветераназда гьоркьоса махщел камилал нухмалъиялъул кадрал
х1адуриялъул мурадалда г1умруялде бахъинабулеб бугеб «Доблесть гор» абураб
программаялъул лъабабилеб модуль. Гьелъул модератораллъун ккола улкаялъул
Президентасда цебе бугеб Россиялъул халъкъияб маг1ишаталъулгун пачалихъияб
хъулухъалъул пачалихъияб управлениялъул т1адег1анаб школалъул (РАНХ и ГС)
экспертал, ай программаялъул г1ахьалчаг1азе лъай кьолеб буго улкаялъул бищунго
лъик1ал муг1алимзабаз. Гьедин, к1иго анкьица халат бахъине бугеб модулалда
рекъон гьелъул г1ахьалчаг1аз камил гьабизе буго регионалиябгун муницалияб
нухмалъиялъе жидерго бугеб бажари.
Рехсараб
программаялда г1ахьаллъи гьабулеб буго нилъер ракьцояв, Хунзахъ росулъа Т1алх1ат Мух1уевасги. Конкурсалъул
х1асилазда рекъон байбихьудасанго гьелда г1ахьаллъарал 1500 ялдасаги ц1ик1к1ун
чиясда гьоркьосан гьев ворч1ун вуго т1аса рищарал финалистазул 35 чиясдасан
г1уц1араб сиях1алде.
Т1алх1ат
Мух1амадович гьавуна Хунзахъ росулъ 1990 соналда. Г1агараб росдал школалдаса
хадуб, Дагъистаналъул пачалихъияб аграрияб университетги (ДагГау) лъуг1изабун,
гьес жиндирго г1умру бухьинабуна рагъулаб хъулухъалда. Хъулухъ гьабуна
разведкаялъул подразделениялда. СВО байбихьарал т1оцересел къояздаса нахъе
жигараб г1ахьаллъи гьабуна Ват1аналъул х1инкъи гьеч1олъи ва интересал ц1унун
т1обит1улеб къеркьеялъулъ. Г1ахьаллъана Запорожь областалъул территория эркен
гьабиялъулъ ва бихьизабураб бах1арчилъиялъухъ мустах1икълъана «За отвагу»
медалалъе. Амма рагъулал тунка-г1усиязда ругъунги щун, хадубккун хъулухъ
т1убазе сахлъи гьеч1олъиялда бан, гьениса нахъе вилълъине ккана.
Рагъулаб
хъулухъалдаса хадуб Т1алх1атица жиндирго профессионалияб х1аракатчилъи
бихьизабулеб буго гражданазулаб бут1аялда. Гьабсаг1аталда х1алт1илев вуго
республикаялъул Ралел бак1азулгун, архитектураялъул ва ЖКХялъул министерствоялде
гъорлъе унеб «Дирекция единого государственного заказчика-застройщика»
г1уц1иялъул нухмалъулесул заместительлъун. «Программа байбихьулаго, дун
х1алт1улев вук1ана министерствоялъул г1уц1иялда. Конкурсалда анкета ц1олаго,
рак1алде ккун бук1инч1о гьелъул программа гьадиг1ан г1ат1идаб батилилан. 1500
г1ахьалчиясда гьоркьоса т1аса вищарав 35 финалистазул сиях1алде ворч1изеги
расги бигьа бук1инч1о. Х1акъикъаталдаги, программа буго г1ат1идаб ва г1емер
рахъал жанире рачараб. Гьеб г1уц1ун буго 4 модулалдасан ва гъорлъе рачун руго
пачалихъияб нухмалъиялъул киналго рахъал. Модулазда гьоркьобин абуни,
теориялъулаб бут1аялда щвараб махщелгун лъай щула гьабула практикаялда. Ц1али
г1уц1ун буго Дагъистаналъул бат1и-бат1иял территориязе хасиятал х1акъикъиял
кейсазул гьабураб анализалъул кьуч1алда. Руго ц1акъ лъик1ал шарт1ал ва жидер
бечедаб х1албихьи бугел республикаялъулгун т1олабго улкаялъул бищунго лъик1ал
экспертаздасан лъай босизе ч1езарун руго киналго ресал. Щивасда хадув
вухьинавун вуго республикаялъул Бет1ерасулгун Х1укуматалъул администрациялъул
кураторги»,
- ян бицана нижее гьес. И. Мухlамадов.
| 
