14 июлалда
Макьасда «Родина» рестораналъул территориялда т1обит1ана исанасел медалистал
к1одо гьариялъул тадбир. Гьелда г1ахьаллъи гьабуна районалъул нухмалъиялъ,
нилъер ракьцояв меценат Загьид Хучбаровас, цо-цо школазул директорзабаз ва
цогидазги.
«Рак1-рак1алъул
баркиялда цадахъго к1удияб баркала кьезе бокьун нужее, нужер муг1алимзабазе ва
эбел-инсуе. Жакъа нужеца рихьизарурал х1асилал рик1к1ине бегьула унго-унгояб
бах1арчилъилъун ва ниж кутакалда рохарал ва ч1ух1арал руго нужедаса.
Х1акъикъаталдаги, нуж ккола районалъул меседилал г1олилаллъун. Дир хьул буго
т1адег1анаб лъайги щун, нуж районалде т1ад руссинин ва нужерго росу-ракь
цебет1еялъе х1алт1илилан. Бицунеб раг1ула жакъа ЕГЭ кьун бажаруларин абун. Амма
нужеца бихьизабуна гьел харбал кьуч1 гьеч1ел рук1ин. Жакъа нижер х1алт1улъ
бищунго аслияб бут1а ккола лъай кьей ва нижеца кинабго къуват рехулеб нужее
лъай босизе х1ажатал шарт1ал г1уц1иялъе. Дун ц1акъго вохана исанасел
медалистазда гъорлъ г1иц1го райцентралъул ва гьелда аск1орго ругел росабазул
школаздаса гурелги, рик1к1адисел росабазул школазул выпускникал рук1иналъги. Гьелъ
бицунеб буго нилъер т1олабго муниципалитеталда лъай кьей цебет1ун бач1инеб
бук1ин», - ян абуна районалъул бет1ер Нурмух1амад Задиевас.
«Жакъа буго нужер
г1умрудул кутакалда жавабчилъи ц1ик1к1араб лах1зат – нужеца лъолеб буго ц1ияб
г1умруялде т1оцебесеб гали. Нахъа тана 11 сонил школа. Цебе буго т1адег1анаб
лъай щолеб 5 сон. Гьелдаса хадуб байбихьизе буго зах1малъабазул ц1ураб ч1ах1ияб
г1умру. Нуж гьелде х1адурун рук1ине ккола. Нужедаго масъала цебе лъезе ккола г1адатаб
халкъалъе пайда бугеллъун рук1ине. Гьелъие киналго ресал ругеб заман бач1ун
буго жакъа. Гьеч1о я кванил, я рат1лил г1унгут1и. Кинабго буго гьарзаго.
Г1иц1го х1ажат буго гьеб гьарзалъиялдаса бит1ун пайда босизе. Амма киг1ан
борхалъуде раханиги, к1очон тезе бегьуларо нужерго росу-ракьги, муг1алимзабиги,
мадугьаллъиги. Цоги к1очон тезе бегьуларо нужее кумекалъе ратарал чаг1азе
баркала кьезеги», - ян абуна Загьид Хучбаровас. Жалго медалистазул рахъалдасан эбел-инсуеги учительзабазеги баркалаги кьун
к1алъай гьабуна Гьамущи гьоркьохъеб школалъул меседил медалистка Пат1имат Г1абдурах1мановалъ.
Медалистазул эбел-инсул ц1аралдаса к1алъана Хунзахъа Аминат Мах1мудова ва Г1ахьалч1иса Хадижат Х1ажиева. Гьединго к1алъаял гьаруна райсобраниялъул
председатель Мух1амад Мух1амадовас,
лъай кьелъул отделалъул начальник Пат1имат
Х1амзатовалъ, районалъул лъай кьеялъул бут1аялъул ветеран, профсоюзазул
нухмалъулев Г1абдулпатах1 Х1амзатовас,
исана 4 медалист (11 выпускникасда гьоркьоб) вахъараб Гьамущи гьоркьохъеб
школалъул директор Т1агьир Аминовас,
Т1ануси гьоркьохъеб школалъул директор Мурад
Г1абдулкъадировас ва цогидазги.
Медалазда цадахъго выпускниказе ва гьезул эбел-инсуе кьуна райадминистрациялъул
рахъалдасан баркалаялъул кагъталги. Загьид Хучбаровас киналго медалистал к1одо
гьаруна г1арцулал сайгъатаздалъун. Меценатас хасаб къимат кьуна профилияб
математикялъул ЕГЭялда 76 балл босарав Г1ахьалч1и гьоркьохъеб школалъул
медалист Сайгид Хъазанбиевасе.
«Математика
буго сундулго аслу. Гьеб г1елмуялъул кьуч1алда г1асрабаз рана шагьаралгун
кьоялги цогидал ч1ах1иял объекталги. Жакъа раккулел руго т1адеялдаса т1аде
зах1матал технологиял, амма гьел кидаго г1уц1ун рук1уна мух1канал г1елмабазул
кьуч1алда. Гьанже аслияб жо буго дуца дурго лъаялдаса пайда босизе рес бугеб иш
т1аса бищи. Нижеца дуда квер ч1вазе буго», - ян т1адеги жубана гьес.
Гьедин, меседил медалал щваразда гъорлъ руго:
Белолюбская
Каролина Павловна (Г1арани гьоркьохъеб школа); Г1абдурах1манова Пат1имат Мух1амадовна
(Гьамущи гьоркьохъеб школа);
Мух1амадова Сафият Шамиловна
(Гьамущи гьоркьохъеб школа); Сулейманов Мух1амадрасул Мух1амадович
(Гьамущи гьоркьохъеб школа); Х1ажиева Фатима Г1абдулаевна (Г1ахьалч1и гьоркьохъеб школа); Хъазанбиев Сайгид Мух1амаддибирович
(Г1ахьалч1и гьоркьохъеб школа); Муртазаг1алиев
Саг1ид Шамсудинович (Г1ахьалч1и гьоркьохъеб школа); Ижарукъова Пат1имат Мух1амадовна (Гьоц1алъ гьоркьохъеб школа); Г1абдусаламова Муъминат Давудовна (Т1агьада гьоркьохъеб школа); Г1умаров Къурбан Х1ажиевич (Т1ануси гьоркьохъеб школа).
Г1арцул медалистал: Мух1амадова
Сакинат Камильевна (Г1арани гьоркьохъеб школа-Интернат); Мух1амадг1алиева Фатима Х1амзатовна (Г1арани гьоркьохъеб школа-Интернат); Г1ащикъова Шамсият Мух1амадовна
(Гьамущи гьоркьохъеб школа);
Гъайирбекова Аминат Мух1амадовна
(Буц1ра гьоркьохъеб школа № 2); Х1асанова Камилла Мух1амадовна (Буц1ра гьоркьохъеб школа № 2); Гьиматдибирова Рабият Мух1амадовна (Г1обода гьоркьохъеб
школа); К1ушк1ант1иев Х1ажи Ах1мадович (Г1обода
гьоркьохъеб школа); Дибирова Саг1адат Камиловна (Хунзахъ
гьоркьохъеб школа № 1); Мух1амадова
Мадина Мух1амадовна (Х1ариколо гьоркьохъеб школа);
Гьединго экзаменазда баллал г1еч1олъиялъ медалал щвеч1ого хут1ана жеги
ункъго ц1алдохъан. Амма экзаменазул пересдачаялъул х1асилазда рекъон гьезулги
жеги рес буго медалисталлъун рахъине:
Г1умарова
Пат1имат Х1ажимурадовна (Хунзахъ гьоркьохъеб школа № 1); Г1абдулаев Г1абдул Мух1амадг1алиевич (Т1ануси гьоркьохъеб
школа); Х1ажиева Марьям Мух1амадовна (Буц1ра
гьоркьохъеб школа № 2); Мух1амадова Асият Жамбулатовна
(Бакьагьеч1и гьоркьохъеб школа).
И.
Мух1амадов.
| 
