1 октябралда райадминистрациялъул данденлъабазул залалда т1обит1ана районалъул лъайкьеялъул г1уц1абазул нухмалъулезулгун данделъи. Гьединго данделъиялда г1ахьаллъана районалъул нухмалъулесул ишал т1уралев Нурмух1амад Задиев, гьесул заместителал Шамил Г1аммаев ва Асадг1али Г1абдуразакъов, лъайкьеялъул отделалъул начальник Залимхан Г1умаров.
Гьениб аслияб гьоркьоб лъураб суал бук1ана хасел т1аде щвелалде районалъул лъайкьеялъул г1уц1абазда отоплениязул ругел г1унгут1алаби лъуг1изари. Данделъиялда г1ахьаллъарал школазул директорзабазул ва садиказул заведующиязул раг1абазда рекъон г1езег1ан лъайкьеялъул г1уц1абазда руго г1унгут1аби. Мисалалъе, Буц1ра гьоркьохъеб школалда хисизе кколеб буго котел. Гьединго х1алт1аби гьаризе кколел руго Г1ахьалч1и, Бакьагьеч1и ва Г1обода росабазул школаздаги. Жеги директорзабаз бицана школазул «зеленкаби» гьариялда хурхун бугеб ах1вал-х1алалъулги. Г1орут1а школалъул раг1уларо кинал рук1аниги документал, Г1арани лицеялъул директорасул г1арз бук1ана жидер пищеблокалъул кванил хут1елал нахъе росаралъухъ ц1акъго ц1ик1к1ун г1арац унеб бугилан, Х1ариколо школалъул спортзалалда раг1уларо отопление ва ц1а ккеялдаса ц1унулеб сигнализация хун раг1ула. Школазул отоплениязул бицунаго Нурмух1амад Задиевас абуна щиб гьабунги т1аде щолеб бугеб хасел т1амулеб х1ал гьабун гурони, ц1иял котелал лъеялъул маг1на гьеч1ин, щайгурелъул, т1асияб соналде газ бач1индал, киналго котелал хъах1илаб ц1атариялде руссинаризе кколилан. Залимхан Г1умуровасул раг1абазда рекъон райценталда ва аск1орго ругел росабалъ 25 лъайкьеялъул ва культураялъул учреждениял газалъул отоплениялде рачине руго.
Жиндирго школалда бугеб ах1вал-х1алалдаса рази гьеч1оан Нак1к1икь байбихьул школалъул директор Г1абасова Марьям. Гьелъ абуна жиндирго сурсатазухъ «зеленкаги» цогидал х1ажатал документалги гьарун, гьанже г1урал лъимал гьеч1инги абун жидер школалда цо-цо классал къалел ругилан.
Цоги данделъиялда борхун бук1ана школазде ва садиказде бач1унеб т1орччода сверухъ г1адлу-низам ва мух1канлъи ц1унизе ккеялъул суалги. Цо-цо кколел руго х1ужжаби, документазда бихьизабуралдаса х1акъикъаталда бач1араб т1урччи дагьаб батарал.
Х1акъакъаталда киг1анасеб къадар т1орччол бач1арабали лъазе квал-квал гьабулеб буго районалда гьеб ц1азе бак1 гьеч1олъиялъги.
Залимхан Г1умаровас рехсана районалъул бищун лъик1ал школазул рейтингалда цебесеб кьерда ругел школалги. Гьелги ккола Г1обода, Бакьагьеч1и, Лъаг1илухъ ва Хунзахъ № 2 школал.
Данделъиялъул ахиралда райадминистрациялъул экономикияб отделалъул х1алт1ухъан Гьит1инов Зайнудиница лъайкьеялъул учреждениязул нухмалъулезда бич1ч1изабуна лъималазе хинаб квен щвезе заявкаби ц1езе ккеялъул суалги.
И. Мух1амадов.
|