Г1емер т1орит1улел руго районалда ракьазул г1орхъи-рахъ ч1езабиялъул, «зеленка» гьабиялъул суалал рорхарал данделъаби. 16 июналда райадминистрациялда  Дагъистаналъул Экономикаялъул министерстоялъул, налоговияб хъулухъазул, Росреестралъул вакилзаби, районалъул нухмалъи, росабазул бегавулзаби, предпринимателал г1ахьаллъун т1обит1ана гьелго суалал гьоркьор лъураб совещание.

7 июналда гьабураб гьединабго данделъиялда районалъул бет1ер Саг1ид Юсуповас росабазул бегавулзабазе т1адкъай кьун бук1ана 7 июналде щвезег1ан 10 «зеленка» ракьул ва 10 «зеленка» ОКСалъул гьареян. Гьаб соналда жаниб жакъа  къоялде щвезег1ан районалда гьабун буго 570 ракьул ва 474 ОКСалъул зеленкаби.

Районалда зеленкаби гьари иналъул ва жиндирго т1адкъай т1убазабиялъул х1акъалъулъ С. Юсуповас ц1ехана гьелда хадуб хъаравуллъи гьабизе т1ад къарал  жиндирго заместитель С. Батировасда, архитектураялъул, ЖКХялъул, ракьул  ва мал-мулкалъул гьоркьорлъабазул отделалъул нухмалъулев Я. Г1абдулаевасда, МФЦялъул нухмалъулей  П. Батировалда, районалъул экономикаялъул отделалъул нухмалъулей П. Набиевалда, росабазул бегавулзабазда. Районалъул предпринимателазда С. Юсуповас бицана гьезие грантал щвезе бегьулел бат1и-бат1иял программаби ругилан, ах1ана гьел гьезда г1ахьаллъизе, тукаби ва гьезда сверухъ бак1ал къач1аян, рац1ц1адго ч1езареян, заманалда налогал кьеян, жидерго хъвай-хъваг1ай гьабеян лъазабуна гьезда.

ДРялъул Экономикаялъул министерствалъул финансазул управлениялъул начальникасул заместитель  Тажудин Михадовас бицана «Обеление экономики» проект г1умруялде бахъинабиялъулъ т1оцебе к1вар кьолеб бугила ракьазул  актуализация гьабиялде, - ян.

Ракьазул, минабазул зеленкаби гьаризе кьурал документазда г1емерисел гъалат1ал гьарулел руго къват1азул ц1арал, рукъзабазул номерал хъваялъулъ. Гьел ккеч1ого рук1ине «Парус» программа х1алт1изабеян абуна.

Данделъиялъул ахиралда С. Юсуповас киналго росабазул нухмалъулел ах1ана рак1 унтун, гъуждул гурун х1алт1изе.

П. Гунашева.