Инсанасул багьа учузлъунилан, г1аданлъи чилъиялъул къимат хванилан, кинабго г1арцуцаги, ришватазги борцунеб бугилан г1емерисез бицунеб гьаб заманалда, ратулел руго цо-цо г1адамал, нилъер ц1ар арал умумузул ях1-намус борхатго ккурал, жидеда т1адал хъулухъалъул, ишал рак1бац1адго ва махщалида т1уразарулел. Гьереси щай гьединал г1адамал дандч1вайдал ч1ух1изе бач1уна, рек1ее лъик1аб асар лъугьуна, бук1инеселде божилъи гьабизе бач1уна.
Гьединазда гьоркьов рехсезе бегьула Мах1ачхъала шагьаралда г1умру гьабулев вугев, республикаялъул урологиялъул централда врач анестезиолог - реаниматологлъун х1алт1улев вугев Мусаев Х1ажидада Иманг1алиевич.
Гьавуна Х1ажидада Хунзахъ росулъ 1955 соналъ. Г1агараб росулъ 10 класс лъуг1ун хадуб гьев ц1ализе лъугьана Дагъмединституталде лечебный факультеталде. Гьеб лъуг1ун хадув 1979 аб. соналдаса 1983 соналде щвезег1ан Х1ажидада х1алт1изе вит1ула Пенза областалъул Никольск шагьаралде врач терапувтлъун. Гьесдаго цадахъ гьение ана медучилище лъуг1арай гьесул г1умрудул гьудал Багьжатги. Гьенив гьезие гьавуна вас Мух1амадги.
Х1алт1ул байбихьудаго Х1ажидадаца живго вихьизавуна, т1аса бищараб махщел бокьулев камилав врачлъун. Гьелъие нуг1лъи гьабула больницаялъул нухмалъиялъ х1алт1улъ щварал бергьенлъабазе г1оло Х1ажидадае кьурал грамотабазги.
Коллективалъул гьариялда рекъон бихьизабураб болжалалдаса ц1ик1к1ун гьенивги х1алт1ун, 1983 аб. соналда Х1ажидада т1ад вуссана Дагъистаналде ва х1алт1изе лъугьана Кизилюрт шагьаралъул централияб больницаялде врач анестезиолог реаниматологлъун.
Рагьарал рак1азул, гьобол-гьудуласул х1урмат гьабулеб г1олохъанаб хъизан, роххун къабул гьабуна Кизилюрт шагьаралъул сахлъи ц1униялъул коллективалъ. Гьенив 20-г1ан соналъги х1алт1ун, 2002 аб. соналдаса жакъа къоялде щвезег1анги Х1ажидада х1алт1илев вуго Мах1ачхъала шагьаралда республикаялъул урологиялъул централда врач анестезиолог – реаниматологлъун. Киб бак1алда х1алт1аниги Х1ажидадаца живго вихьизавуна х1алт1и лъик1 лъалев, сабурав врачлъун вук1ин.
Махщалил ц1убай, лъадари, врачасул т1адег1анаб ц1аралъе мустах1икълъи, жиндие Кизилюрт шагьаралда х1алт1улаго щвараблъун рик1к1уна Х1ажидадаца. Рак1алдаса унарел лах1затал х1алт1улъ кинал рук1аралалилан ц1ехедал, Х1ажидадаца бицана гьел г1емерал рук1анилан. Бищун рак1алдаса унареблъун хут1анила Кизилюрталда х1алт1улаго ккараб гьадинаб х1ужа. Больницаялде ах1ун бач1анила рокъой зах1матго унтарай, лъимер гьабулей г1адан йигилан. Хехаб кумекалдалъун бригада гьенибе щведал, гьей киениги ягъаризайизе бегьулареб х1алалъ зах1матго унтун ятула. Гьеб мехалъ Х1ажидадалги цадахъ рук1аразулги пикру ккола, лъимадулги эбелалъулги г1умру хвасар гьабизе минутал гурел секундал хут1ун рук1инги х1исабалде босун гьенибго столалда т1ад операция гьабизе. Гьеб кинабго лъик1ги ккун эбелги васги гьез хадур больницаялде рачуна. Лъимер гьабурай г1аданалъ жиндирго васасда ц1арги г1умру хвасар гьабурав врач Х1ажидадаян лъола. Цоцада релъарал рук1инч1ониги инсан хвалил к1ич1икьа вахъиялъе гьарурал операциялги, врачазе, унтаразе гьабураб кумекалги г1емер бук1анилан бицуна гьес.
Больницаялде регун сах гьарулезги, нилъер гьаниса эхере гьеб централде регизе аразги к1удияб адаб- х1урматалдалъун бицуна гьес гьабураб кумекалъул. Гьев лъалелщиназ хинал раг1абаздалъун рехсола гьесул ц1ар. Х1ажидада вуго Гиппократил гьаялъе хилиплъич1ев врачазул цояв. Нилъ ч1ух1арал руго лъик1аб рахъалдасан район машгьур гьабулел гьединал ракьцояздаса.
Бокьун буго профессионалияб байрамги баркун Х1ажидадае ва Багьжатие рак1-рак1алъго щулияб сахлъи, талих1, х1алт1улъ бергьенлъаби гьаризе.
Гьединавлъун хут1аги мун, Х1ажидада Иманг1алиевич кидаго.
У. Къурамух1амадова.
|