26-27 ноябралда районалда т1орит1ана лъималазулгун г1олилазул спортивияб школалъул группабазда гьоркьоб волейболалъул рахъалъ къецал. Гьел г1уц1ун рук1ана районалъул волейболалъул федерациялъул ва ДЮСШялъул х1аракаталдалъун. Къецазда г1ахьаллъи гьабуна 2002 соналъ гьарурал ва жеги гьит1инал г1олилал ясалгун васаз. Ясазул х1аял т1орит1ана Ц1ада ва гьениб г1ахьаллъи гьабуна 5 командаялъ. Ясазда гьоркьоб чемпионлъун бахъана Г1обода росдал команда. К1иабилеб ва лъабабилеб бак1ал росана Гьамущи ва Т1ануси росабазул командабаз. Васазда гьоркьор х1аял т1орит1ана Хунзахъ ва Т1ануси. Гьенибги г1ахьаллъана 11 команда. Х1алуцарал х1аязул х1асилалда бергьенлъи босана Т1анусдерил командаялъ, к1иабилеб ва лъабабилел бак1ал щвана гьамщадерил ва г1абадерил волейболистазе. Бергьарал ва призалъулал бак1ал ккурал командабазе кьуна дандрекъон кколел даражаялъул грамотабиги. Гьаб турниралъ рак1ч1езабуна районалда волейболалъул бук1инесеб лъик1аб бук1иналда.

Республикаялъул чемпионаталда г1ахьаллъила

26-27 ноябралда Хунзахъ т1орит1ана волейболалъул рахъалъ республикаялъул чемпионаталъул зоналиял х1аял. Г1аммаб къаг1идаялъ гьениб г1ахьаллъи гьабуна муг1рузулаб округалда гъорлъе унеб 8 районалъул командаялъ. Х1алуцарал рук1ана х1аял, киназго х1аракат бахъулеб бук1ана жидерго махщел-гьунарги бихьизабун, дандиязда т1ад бергьенлъи босизе. Гьединал х1аязул х1асилалда финалалде рач1ана Болъихъ ва Хунзахъ районазул командаби. Финалияб х1аялда дандиязда т1ад 2-0 х1исабгун рак1ч1араб бергьенлъиги босун нилъер командаялъе рес щвана 16-18 декабралда Мах1ачхъалаялда т1обит1изе бугеб Дагъистаналъул чемпионаталъул финалияб бут1аялда г1ахьаллъизе. Нилъер волейболистазе жеги лъик1ал х1асилалги гьарулаго, баркула гьезда иргадулаб бергьенлъи.

И. Мух1амадов.