5 февралалда Хунзахъ лъималазул библиотекаялда т1обит1ана г1ун бач1унеб г1ел терроризмалъулгун экстремизмалъул идеологиялдаса ц1унизелъун, лъималазда гьеб 21 г1асруялъул вабаълъун рик1к1унеб терроризмалъул бицараб дандеруссин. Тадбир г1уц1ун бук1ана лъималазул библиотекаялъул ва Хунзахъ т1оцебесеб школалъул учительница Гъаирбегова Зайнабил цадахъаб х1аракаталдалъун. Гьениб г1ахьаллъи гьабуна рехсараб школалъул ц1алдохъабаз, районалъул терроралде данде къеркьеялъул комиссиялъул ва ихтиярал ц1унулел г1уц1абазул вакилзабаз ва цогидазги. Хунзахъ № 1 школалъул 7 «а» ва 10 «б» классазул ц1алдохъабаз рик1к1ана ва ах1ана терроризмалда хурхарал куч1дул, ц1алана жидецаго хъварал сочинениял. АТКялъул специалистал Махулова Сидратица ва Дибирдадаев Къебедица жидерго к1алъаязда бицана терроризмалъул тарихалъул ва гьелдалъун г1адамазде т1аде рач1ине бегьулел балагьазул. Бицана терроризм цебет1еялъе квербакъулел г1иллабазулги. Лъимал ах1ана ц1алуда т1ад ч1езе ва умумуз гьабулеб батараб диналъул нух кквезе. Жаваб кьуна лъималазул суалазеги. Районалъул ОМВДялъул х1алт1ухъаби Ах1мадов Рамазаница ва Г1алимух1амадов Мух1амадица к1варбуссинабуна лъималаз гьабизе кколеб ц1одорлъиялде. Мисалалъе, доба-гьаниб лъун бихьараб пакеталда яги цогидаб лъалареб жоялда хъвазе бегьуларин бицана гьез. Гьединго малъана г1емерал г1адамал рак1арараб бак1алда терракт ккани жалго ц1унизе кинал тадбирал гьаризе кколелалиги. Ахиралда библиотекаялъул нхмалъулей Къебедова Написатица баркала кьуна тадбиралда г1ахьаллъи гьабизе рач1аразе.
|
