Т1олабго Северияб Кавказалда, хасго Дагъистаналда цебе ч1араб масъала ккола терроризмалдегун динияб экстремизмалде данде къеркьей ва халкъалъе х1инкъи гьеч1еб парахатаб г1умру ч1езаби. Дагъистаналъул бет1ерлъуде Рамазан Г1абдулат1ипов вач1аралдаса нахъе, ц1айи бугеб х1алт1и гьабулеб буго гьеб суалалда хурхун. Ч1еч1ого т1орит1улел руго школлъималазулгун ва студентазулгун дандч1ваял, гьабулеб буго халкъалда гьоркьоб бич1ч1икьеялъул х1алт1и. Гьединаб х1алт1ул х1асилалда республикаялда къот1ана террактал, дагьлъана такъсирчилъи, к1вана г1олилазул пикру бит1араб рахъалдехун хисизабизе.
Гьедин, 2 ноябралда Хунзахъ росулъ Ш. Шамхаловасул ц1аралда бугеб культураялъул к1алг1аялда т1обит1ана «Терроризмалъулгун экстремизмалъул идеологиялда данде къеркьей г1олилазе рух1иябгун моралияб ва патриотикияб тарбия кьей-Дагъистан цебет1еялъул к1вар бугеб бут1а» абураб темаялда конференция. Гьелда г1ахьаллъи гьабуна республикаялъул х1укуматалъул, муфтияталъул вакилзабаз, муг1рузулаб территориалияб округалде гъорлъе унел районазул имамзабаз, районалъул росабазул дибирзабаз ва цогидалги жамг1иялгун диниял х1аракатчаг1аз. Тадбир рагьана ях1-намусалъул эркенлъиялъул ва диниял г1уц1абазулгун х1алт1и гьабиялъул рахъалъ республикаялъул комитеталъул председатель Мух1амад Г1абдурах1мановас. Гьес бицана жакъасеб жамг1ияталъе терроризмалъул бугеб балагьалъул ва жидерго комитеталъул нухмалъиялда гъоркь гьабулеб бугеб х1алт1ул. Бицана гьединалго конференциял Северияб ва Югалъулаб территориалиял округаздаги т1орит1анилан. Терроризмалде данде къеркьеялъул мурадалда муниципалитеталда гьабулеб бугеб х1алт1ул бицана Хунзахъ районалъул бет1ер Саг1ид Юсуповас: Дун районалъул бет1ерлъуде вач1аралдаса нахъе, дир командаялда цебе лъураб аслиял масъалабазул цояблъун ккола г1олилазда кверч1вай, гьел церет1еялъе шарт1ал г1уц1и. Районалда ралел ругел спортивиял площадкабиги паркалги, капиталиял ремонтал гьарун къач1алел ругел школалгун спортивиял залалги руго г1олилал церет1езелъун, гьез мекъаб нухде гали т1амич1ого бук1инелъун г1олохъанлъиялъулаб жан-жигар бит1араб рахънибе буссине гьабулел х1алт1аби. Санайил т1обит1ула районалъул г1олилазулгун студентазул форум, гьениб ц1алулъгун спорталъулъ т1ок1лъи бихьизабурал г1олилал сайгъатаздалъун к1одо гьарула. Гьединго артисталги ах1ун к1одо гьабула г1олилазул къоги. Зама-заманалдасан районалда т1орит1ула терроризмалда данде ч1арал акциял, киналго школазда т1орит1ула гьеб темаялда бич1ч1икьеялъулал х1алт1аби. Жакъасев г1олилав вук1ине ккола сундаго хадув гъуравлъун, ч1еч1ого жиндирго лъай-г1акълу борхизабун, жиндаго т1ад х1алт1улевлъун, жиндирго ц1иял идеяби ва хасал пикраби ругевлъун. Гьелдаго цадахъ к1очон тезе бегьуларо кидаго нилъер умумузе хасиятаблъун бук1араб ях1-намус ва къох1ехьей. Киг1анго бокьич1ониги абизе кколеб буго жакъа районалда 33 чи профучеталда лъун вугилан, гьезда гьоркьоса 14-яв г1умру гьабун вуго районалда, анц1гояв ц1ан вуго тамих1алде, ич1гояв улка бахун къват1ирехун руго». Гьеб суалалда хурхун к1алъай гьабуна муфтияталъул Муг1рузулаб территориалияб округалда вугев вакил Х1асан-х1ажи Мух1амадовас. Гьес абуна вагьабизмалде гъорлъе лъугьарал рикьулин к1иго бат1ияб тайпаялде: жеги кант1изарун бажарулелги, кант1изарун бажариялдаса аралги. Нилъеца х1алт1и гьабизе кколила т1оцебесеб тайпаялъулал хвасар гьаризе ва к1иабилездаса рик1к1алъизе. Гьединго г1олилал терроризмалде данде къеркьезе ах1арал к1алъаял гьаруна муфтияталъул вакил Г1исаев Рамазаница, республикаялъул бет1ерасул кумекчи, АТКялъул аппараталъул вакил Сайпов Сайпудиница, Муг1рузулаб территориалияб округалде гъорлъе унел районазул имамзабаз ва цогидазги. Ахиралда районалъул нухмалъулев Саг1ид Юсуповас баркала кьуна тадбир г1уц1аразе.
И. Мух1амадов.
|