24 марталда районалъул г1уц1абазулгун предприятиязул х1алт1ухъабазул жигараб г1ахьаллъигун т1обит1ана киназего г1аммаб субботник. Цебе-цебе райцентралъеги аслиял къват1азеги рац1а-ракъалъи гьабун лъуг1улеб бук1ун батани, гьаб нухалда гьелъул масштаб к1удияб лъугьана: цо къокъа ана Заг1ибехун нух, г1урул мухъ бац1ц1ад гьабизе, цойгидал мусоралъул полигоналде щвезег1ан Илълъа росдал раг1аллъаби, т1аде рач1арал гьалбал суратал рахъизеги х1ухьбахъи гьабизеги унеб плато мусоралдаса бац1ц1ад гьабизе, лъабабилел – аэропорталъул мухъ Т1ануси, Ц1ада, Г1обода бак1аризе, ункъабилел Гьоц1алъ ГЭсалда сверухъ бак1 бац1ц1ад гьабизе. «Рац1ц1алъи иманалъул бащалъи» ян буго х1адис. Рек1елъ иман бук1инч1ебани субботникалда к1вах1 тун х1алт1илароан, жидедаго т1адал хъулухъалъулал ишалги тун, гьелда г1ахьаллъаралщинал. Аллагьас кирилъун хъвайги нужее багъарараб квер, ракьцоял.
Амма дида бич1ч1уларо, щай цояз чорок гьабун цойгидаз бак1аризе кколебали, щай экологиялъул (сверухълъи ц1униялъул) саламатаб бак1 ккурал законалги рук1аго, т1абиг1ат чорок гьабулел тамих1алде ц1ач1ого тезе кколебали. Нарул къоги бихьун ветеринарияб управлениялъулги, пенсионияб фондалъги, Г1арани школа лицеялъулги САХалъулги, редакциялъулги ва гь.ц. г1уц1абазул х1алт1ухъабаз щай бац1ц1ад гьабизе кколеб Илълъа-лъар, добе мусор балел цойгидалги рук1ун?! Гьединго, интелигенциялъул чаг1ийищ Гьоц1алъ ГЭсалдеги, Заг1ибехунги муссор базе ун рук1арал?
Щай барабилан к1алги гьикъун, законияб къаг1идаялъ цо нухалъниги «чвантида кьабани», ялъуни бак1аризе жалго т1амуни гьабулареб заралха доз доб т1абиг1аталъе! Къойил субботникал т1орит1аниги х1ал кколаро лъайги-г1акълуги гьеч1ел г1адамазда хадуб магъакь бак1арун, гьезда жидедаго пластикаялъулги полиэтиленалъулги гъонода гъоркь жалго т1ерхьинехъин рук1ин, г1умру гьабун ругеб бак1 лъималазе хвезабулеб бук1ин бич1ч1ич1они.
Кин бук1аниги, лъик1аб иш – субботникал т1орит1и г1адаталде сверизабуна С. Юсуповас.
Цойгидал районазде данде Хунзахъ район буго г1езег1ан бац1ц1адаб, нечолареб х1алалъ. Амма к1очон тезе бегьуларо магъакь –к1ачар сан гьабич1ого къват1ибе балареб бак1алда бак1аризе жоги бук1унареблъи. Лъик1аб гьабизе, квешаб тезе тавпикъ кьеги Аллагьас.
Ф. Мух1амадова.
Пикру гьабунани…
1.СШАялда щибаб саг1аталъ къват1ибе рехулеб буго 3 млн. плстикаялъул шиша. Пластик хвезе байбихьула 500 соналдасан.
Америкаялда хадур гъезе нилъер хут1араб щиб?
2.Санайил Дунялалъулаб океаналде рехулеб буго 6 миллиардалдасаги ц1ик1к1ун мусоралъул.
Бац1ц1адаб лъим гьеч1ого хут1иладай?
|