Бокс
1999 соналда Америкаялда т1обит1араб дунялалъул чемпионалда Гьоц1алъа Тимур Гайдалов вахъана чемпионлъун. Тимур ккола Северияб Кавказалъул т1оцевесев чемпион, гьев лъабго нухалъ вахъана Россиялъул чемпионлъунги. Гьабсаг1ат Тимурица нухмалъи гьабулеб буго Москва шагьаралъул студентазул боксалъул федерациялъе. 2014 соналдаса нахъе ккола Мах1ачхъалаялъул администрациялъул спорталъул, туризмалъул ва г1олилазул ишазул комитеталъул председателасул заместительлъун. Ккола спорталъул мустах1икъав мастерлъун.
Гьоц1алъа Х1ажиев Х1амид ккола боксалъул СССРалъул чемпион. Халкъазда гьоркьосеб турниралъул «А» классалъул г1арцул призер, клубазда гьоркьов Германиялъул чемпион, Россиялъул г1арцул призер. Гьев вуго халкъазда гьоркьосеб классалъул спорталъул мастер.
Гьоц1алъа Мух1амад Г1абдулх1алимовас 2005 соналда «Динамоялъул» ЦСалъул Россиялъул боксалъул первенствалда бергьенлъи босана. Гьебго соналъ гьев вачана Россиялъул сборная командаялде гъорлъе.
Боксалъул рахъалъ спорталъул мастер ккола Г1ахьалч1иса Г1абдурашид Г1абдурашидов.
Боксалда ц1айи бугеб бут1а лъолеб буго нилъер ясазги. Т1анусиса Саг1адат Г1абдулаева яхъана Южная Кореялда т1обит1араб боксалъул Дунялалъул чемпионаталъул г1арцул призерлъун. Гьал къояз Волгодонскалда т1обит1араб Россиялъул чемпионаталда бергьенлъиги босун, Саг1адат лъабабилеб нухалъги яхъана Россиялъул чемпионлъун. Исана ноябрь моц1алда Саг1адат г1ахьаллъизе йиго Болгариялда т1обит1изе бугеб боксалъул Европаялъул чемпионаталда.
Бокс цебет1еялъулъ гьал ахирисел соназ к1удияб бут1а лъолеб буго Харахьиса г1олилаз. Гьедин гьениса Мух1амадов Руслан вахъана боксалъул Россиялъул лъабц1ул чемпионаллъун. Мух1амадов Мух1амадг1али ккола боксалъул Россиялъул Югалъул ункъц1ул чемпион. Кват1ич1ого гьев г1ахьаллъизе вуго Россиялъул чемпионаталда. Мух1амадг1али ккола 9 классалъул ц1алдохъан. Боксалъе ругьун гьавулев вуго Новороссийск шагьаралда
Г1орот1а, Х1ажидибиров Х1ажидибирица тайский боксалъул Россиялъул чемпионаталда босана к1иабилеб бак1.
Волейбол
Амма киналдасаго цебе (лъеберабилел соназдаса байбихьун) гьаниб волейбол машгьурлъана. Районалде х1алт1изе вач1арав гlypyc учителас цадахъ босун бач1ана сеткаги торг1оги. Гьебго заманалда шагьаразул ц1алул заведениязул студентал, ракьцоял Дибировас, Г1алибег Г1умаровас, Гелегаца, Myxlaмад Давудовас, Мух1амад Сулеймановас, Мух1амад Г1абдулмаликовас, Ахъберди Ахъбердиевас, Мух1амад Мирзоевас, Расул Саг1идовас, XIамид Эльдаровас ва цогидазги г1езег1ан квербакъулаан районалда спорталде рокьи бижизабизе. Киназго цадахъ лъугьун Г1урдада майданалда волейболалъул площадкаги гьабун, районалъул команда г1уц1ула. Гьездаса мисал босула росабалъги. Дагь-дагьккун махщел камиллъизе лъугьарал волейболистал Унсоколо, Гъуниб, Хьаргаби т1орит1улел къецазда г1ахьаллъула. Гьезул т1оцересел бергьенлъабазул цояб ккола 1939 соналда Г1арани т1орит1арал гьудуллъиялъулал къецазда гъунисезда т1ад босараб бергьенлъи.
К1удияб Ват1анияб рагъул заманалда, фронталде командаялъул г1емерисел членалги
ун, гьоркьоб къот1ун бук1араб спорталъул иш, гьелдаса хадуб ц1илъула. Гьелъул х1асилалда, 1950 соналда т1орит1арал республикаялъул риидалил спартакиадаялъул къецазда (М. Х1асанов, Д. Дибиров, Г1. Мух1амадов, XI. Атаев, Г1. Х1усенов, С. Дибирчуев, М-Р. Къебедов) районалъул команда чемпионлъун бахъана.
Амма районалъе ва республикаялъе к1удияб асар гьабураблъун ва рак1алдаса унареб рохеллъун бук1ана 1954 соналда Воронежалда т1обит1араб Россиялъул чемпионаталда районалъул командаялъе т1оцебесеб бак1 щвей. Гьелда х1алел рук1ана Х1осенх1ажи Атаев, Х1асан Г1умаров, Мух1амад Г1аликулов, Абус Х1айдарбегов, Гъази Myxlaмадов, Х1ажидада Асадулаев, Мах1ач Г1алиев, Х1амзат Юсупов.
Лъабкъоабилел соназул волейболисталги (Ах1мади Абакаров, Пайзудин Myxlaмадов, Мух1амад Ч1ег1еров, Г1убайдула Мух1амадов, Мух1амад Качалов, Юсуп Мух1амадов ва Шагьидав Гьиматов), гьезул нухдаса ун, республикаялъул ва улкаялъул даражаялъулал къецазда цересел бак1азда рук1унаан. Гьанжеги, ц1ик1к1ун гурел, дагьлъулел гьеч1о волейболистазул кьерал. Жакъа къоялда гьезда гьоркьоса бищун камилаб махщел К1ахъа Мух1амад Ах1мадовасул бугилан рик1к1уна. Республикаялда гьев машгьурав вуго «Хвалчен» абураб т1ок1ц1аралда гъоркь. Районалда ва республикаялда волейбол цебет1еялъе г1оло гьабураб х1алт1ухъ Мух1амад мустах1икълъана «ДРялъул физкультураялъул ва спорталъул мустах1икъав х1алт1ухъан» абураб ц1аралъе. Гьанжег1агар гьев тана районалда рагьараб Волейболалъул федерациялъул президентлъун.
Гьес ругьун гьарурал руго «Каскадалда» х1алел рук1арал Г1араниса Мух1амад Гъайирбегов, Т1агьадаса Мух1амад Х1асанов ва Дагъистаналда бищун лъик1ав нападающийлъун рик1к1унев вук1арав Шамил Сайгидов.
Росабазе хасиятаб гьеч1ониги, пляжалъулаб волейболалъул рахъалъги рахъана районалда Россиялъул чемпионал - Г1ободаса вацал Мах1ач ва Шамил Мух1амадовал. Дагьал церег1ан соназ Гьамущиса Мух1амадова Г1айшат яхъана пляжалъулаб волейболалъул Россиялъул чемпионлъун.
Республикаялъул Бет1ер Рамазан Х1ажимурадович вач1аралдаса волейболалде кьолеб буго к1удияб к1вар. Рамазан Х1ажимурадович ккола Дагъистаналъул Волейболалъул Федерациялъул х1урматияв президент, гьесул вац Раджаб Х1ажимурадович ккола гьебго федерациялъул хал кколеб Советалъул председатель. Дагъистаналъул волейболалъул тарихалда Дагъистаналъул команда 2015 абилеб соналъ борч1ана т1адег1анаб лигаялъул «А» классалде ва т1оцебесеб соналъго ккуна гьениб лъабабилеб бак1. Лъаг1илухъ росулъа Гъайирбегов Мах1ач х1алев вуго Дагъистаналъул волейболалъул сборная командаялда гъорлъ «А» классалда. Гьев вахъана Россиялъул чемпионлъун. Гьединго гьанжег1агар Мах1ачхъалаялда рагьун буго волейболалъул школа-интернат. Руго гьеб интернаталда ц1алулел нилъер районалъул ц1алдохъабиги – Т1анусиса вацал Мух1амад ва Мух1амадсайгид Хат1иповал. 2015 соналъ Москва областалъул Раменское шагьаралда т1обит1араб волейболалъул Россиялъул чемпионаталда Т1анусиса Хат1иповал ва Асадулаев Мух1амад рахъана г1арцул призераллъун.
2015 соналъ волейболалъул ветеран Мух1амадов Мух1амад (Левша), Саг1идов Мух1амад ва Х1айдарбеков Г1абдукъадир рахъана волейболалъул Россиялъул кубокалъул чемпионаллъун, исана гьезие гьебго чемпионаталда щвана к1иабилеб бак1.
2012 соналъ Туриналда ветераназда гьоркьор т1орит1арал Олимпиялъул х1аязда нилъер волейболистал – ветеранал Г1алибегов Г1амир, Зайирбегов Асх1абг1али ва Мух1амадов Мух1амад рахъана 4-лел призераллъун.
Каратэ
Каратэялъул рахъалъ Северияб Кавказалда вахъарав РСФСР т1оцевесев чемпион ккола Гьоц1алъ росулъа Мух1амадов Шарапудин.
Гьанжесел г1олилазулги руго каратэялъул рахъалъ бергьенлъаби. Гъоркьколоса Г1абдусаламова Салтанат яхъана киокушинкай каратэялъул Европаялъул чемпионлъун. 2012 соналъ Турциялда гьелъие щвана Дунялалъул кубок. Салтанат ккола Россиялъул ункъц1ул чемпионкаги. Каратэялъул рахъалъ лъабц1ул Россиялъул чемпион ккола Г1орот1а росулъа Ризванов Мух1амад.
Пулевая стрельба.
Пулевая стрельба нилъер районалъе ккола цебе гьаниб бук1инч1еб спорталъул ц1ияб тайпалъун. Исана лъабабилеб сон буго Г1арани школа-интернаталъул директор Мух1амадинов Мух1амадсайгидица гьелъие ц1алдохъаби ругьун гьарулел ругелдаса. Араб соналъ гьесул ясал Мадинаца ва Загьидатица Дагъистаналъул командаялда гъорлъ г1ахьаллъи гьабуна Краснодаралда т1обит1араб VII – леб ц1алдохъабазул Россиялъул риидалилспартакиадаялда. Гьенибги бергьун СКФОялъул командаялда гъорлъ ясал г1ахьаллъана Москваялда т1обит1араб Т1олгороссиялъул спартакиадаялъул финалалда. Осетиялъул, Кабардино- Балкариялъул, Черкессиялъул, Ингушетиялъул спортсменазда т1ад бергьенлъабиги росун, ясал рач1ана бищун къуватал 20 спортсменазул сиях1алде гъорлъе.
Кверзул рагъ (Армреслинг)
Гьамущиса, Руслан Маликов вахъана армреслингалъул Дунялалъул чемпионаталъул к1иабилев призерлъун. Гьев вуго Европаялъул чемпион, Прикаспиялъул пачалихъазул спартакиадаялъул чемпион, Россиялъул Югалъул чемпионаталъул к1иабилев призер, Россиялъул чемпион. Русланккола халкъазда гьоркьосеб классалъул спорталъул мастерги..
Гьоц1алъа Саг1адулаев Ах1мадица ч1ах1иял бергьенлъаби росана армспорталда. 2000 соналъ гьев вахъана армреслингалъул дунялалъул вице-чемпионлъун. Гьев ккола Европаялъул чемпионатазул призер, армреслингалъул Россиялъул чемпионги. Армспорталдаса цебе Ах1мад машгьуллъун вук1ана боксалде. Гьелдаги гьес лъик1ал х1асилал росана. Ах1мад вахъана Литваялъул чемпионаталъул г1арцул призерлъун. Гьев ккола боксалъул рахъалъ спорталъул мастер ва армреслингалъул халкъазда гьоркьосеб класалъул спорталъул мастер. Гьабсаг1аталда Ах1мад х1алт1улев вуго Москваялда физкультурнияб институталда.
Дзюдо
Дзюдоялъул т1адег1анал х1ок1азде рахана Шагьадаса вацал Хъазанби ва Мурад Хъазанбиевал. 1991 соналъ г1умруялъул 22 соналда нагагьаб балагьалдалъун нилъедаса ват1алъана халкъазда гьоркьосеб классалъул спорталъул мастер Мурад Хъазанбиев кколаан Франциялда, Турциялда ва Болгариялда т1орит1арал халкъазда гьоркьосел турниразул чемпион.
Хунзахъа Шамил Дарбишевасеги щвана 1998 соналда Россиялъул къецазда к1иабилеб бак1.
Ц1ельмес росулъа Х1амзат Зайибрегов – дзюдоялъул Дунялалъул кубокалъе г1оло т1орит1арал х1аязул лъабабилев призерлъун вахъана. Гьев ккола дунялалъул первенствоялъул к1иабилев призер ва Европаялъул первенствоялъул лъабабилев призер, Россиялъул чемпион. Ккола халкъазда гьоркьосеб классалъул спорталъул мастер.
Гугари
Лъабкъоабилел соназда гугари цебет1еялъе кьуч1 лъуна хадуб гугарухъабазул чанго г1ел куцарав Шапиг1 Дибирчуевас. Гьесул жиндиргоги рук1унаан лъик1ал х1асилал.
Гьеб рахъалъ спорталъул мастераллъун рахъана Хунзахъа Зайирбег Г1аммаев (СССРалъул студентазулал къецазда – II бак1), К1ахъа Мух1амад Х1анапиев (Россиялъул югалъул чемпион, ДРялъул мустах1икъав учитель), Лъаг1илухъа Х1адис Х1адисов ва Гьамущиса Арсен Г1абдулх1анапиев, Гьац1алухъа Г1абдулкъадир Х1усенов.
Халкъазда гьоркьосел классалъул спорталъул мастераллъун ккола Бакьагьеч1иса вацал Расул ва Сайгид Катиновасовал. Г1олилазда гьоркьов Европаялъул чемпионлъун вахъана Г1ободаса Мух1амад Мух1амадов.
2000-2016 соназдаги дагьал рахъинч1о нилъер районалда спорталъул эркенаб гугариялъул мастералги, халкъазда гьоркьосеб классалъул спорталъул мастералги.
2000, 2001, 2002 соназ Россиялъул Югалъул чемпионлъун ва Россиялъул призерлъун вахъана спорталъул мастер Мухтар Г1исаев.
Гьелго соназ Дагъистаналъул, Россиялъул Югалъул, Россиялъул чемпионлъун ва призерлъун вахъана Хунзахъ росулъа спорталъул мастер Мух1ам ад Х1айбулаев. Гьединго 2005 соналъ Мух1амад вахъана Россиялъул абсолютнияв чемпионлъун.
Г1оч1ло росулъа Х1амзатов Х1амзат ккола Россиялъул чемпион (2013 с.) Гьевги ккола спорталъул мастер.
Спорталъул мастер, 2016 соналъ Дагъистаналъул чемпионлъун вахъарав Гозоло/коло росулъа Г1алиев Х1ажимух1амад ккола чанго нухалъ Россиялъулги, халкъазда гьоркьосел турниразулги призерлъун ва чемпионлъун.
Бакьагьеч1и росулъа халкъазда гьоркьосеб классалъул спорталъул мастер Арсен Къурамух1амадов 2013 соналъ вахъана Россиялъул, Россиялъул Югалъул чемпионлъун. Гьебго соналъ гьев вахъана Европаялъул 2-абилев призерлъун. Гьединго Арсен ккола чанго халкъазда гьоркьосел турниразул чемпион ва призер.
| 
