Цебеккун районалъул басмаялъ лъазабухъе, араб анкьил шамат къоялъ Дагъистан Республикаялъул Бет1ер Рамазан Г1абдулат1ипов х1алт1улаб сапаргун вач1ун вук1ана Хунзахъе. Гьесдаго цадахъ нилъехъе  бач1ун бук1ана республикаялъул т1алъиялдаса саламатаб делегацияги.

Рехселин гьезул цо-цоял: ДРялъул Х1укуматалъул Председателасул т1оцевесев заместитель А. Карибов, Муг1рузул территориалияб округалда Дагъистаналъул Бет1ерасул вакил  Г1. Г1абдулмуслимов, республикаялъул маданияталъул министр Зарема Бутаева, хъвадарухъабазул союзалъул председатель М. Ах1мадов, нухазул Агентствалъул нухмалъулев  З. Хочбаров ва гь.ц.

Т1оцебесеб иргаялда  республикаялъул нухмалъулев щвана «Хъах1ал къункъраби» мемориалияб комплексалде, хал гьабуна суратазул галереялъухъ, гара-ч1варана халкъгун. Гьелдаса хадуб гьалбал къокъана Ц1адаре. Гьениб дунялалдаго гьеб гьит1инаб росу  раг1изабурал шаг1ирзаби Ц1адаса Х1амзатил ва гьесул вас Расулил памятниказда цере т1угьдул лъуна, хинал раг1абаздалъун рак1алде щвезабуна гьез инсанияталъе тараб рух1ияб ирс. Цинги республикаялъулги районалъулги нухмалъулез г1ахьаллъаразул хъатч1ваялда гъоркь рагьана цойги машгьурав ц1адасев, долго Х1амзатовазул хъизамалъул вакил, г1алимчи, филологиял г1елмабазул доктор, академик Х1ажи Х1амзатовасе бараб памятник. Гьелдаса хадуб киналго щвана росдал  лъай кьеялъул г1уц1абазде – байбихьул школалде ва ясли-ахалде. Лъималгун накъит гьабун, гьезие сайгъатал кьун рохизаруна Г1абдулат1иповас ц1игьулдерил г1олеб г1елги.  Влейболалъул площадкаялда ратарал жиндиргун гьеб  спорталъул тайпаялде рокьи г1ахьал гьабулел г1олилазе тарг1алги кьуна ДРялъул Бет1ерас. Киса-кибего  лъик1аб ремонт гьабун, т1егь-хер ч1ун берцинлъи г1уц1ун , лъугьун бугеб ч1аголъиялъеги къимат кьуна республикаялдаса гьалбадерица. Лъик1го г1адатал г1адамалгун харбидаги вук1ун, республикаялъул нухмалъулес сапар бухьана райцентралде – хунздерил Бах1арзазул паркалде (сверуда).

Ниж руго зах1маталъ берцин гьарурал г1адамал

Лъабго зах1маталъул ва цо рагъул Бах1арзазул ц1аралда бугеб паркалъги к1удияб асар гьабуна Рамазан  Х1ажимурадовичасе. Рак1алде щвезабилин, гьеб, 240 кв. метралда бугеб, райцентрго берцин гьабураб гъут1бузул «ч1инк1иллъи» къач1аялъе кумек гьабуна сахаватчи Гъази Малачиевас. Кинабниги 1.8 млн. гъурущ харж гьабун буго росуцояс гьеб берцинлъи нилъее сайгъат гьабиялъул  мурадалда. Гьесул лъик1аб иш  бихьич1ого хут1ич1о республикаялъул нухмалъулесда – «Г1агараб ракьалде бугеб рокьиялъухъ» медаль, гьеб паркалда жанир рук1аго, бана сахаватчиясул каранда. Районалда лъугьунеб бугеб цебет1еялъулъ «жакъасел т1алабазе жаваб кьолев, ц1одорав, х1алт1улев нухмалъулев» -  Саг1ид Юсуповасул к1вар ц1ик1к1араб х1алт1уеги къимат кьуна  Г1абдулат1иповас. Районалъул больницаялде щун, гьанжег1агар х1алт1изе кьезе бугеб поликлиникаялъул корпус бихьидалги, «москваялъул роцадулаб» ян т1адег1анаб къимат кьуна гьес, нилъер сахлъи ц1униялда  батараб ах1вал-х1алалъе. Рецц-бакъ гьабулаго, иргадулаб нухалъги гьоркьор теч1о Бет1ерас нужер мут1иг1ал чукъби – газеталъул х1алт1ухъабиги. Бац1ц1адаб рахьдал мац1алда халкъалдехун к1алъалаго, гьес зах1маталъ берцин гьаруразда гьоркьор рехсана: районалъул гьанжесев  нухмалъулевги, туризмалъул ва халкъиял промыслазул министр Мух1амад Г1исаевги, «кьоязулгун – нухазул Наполеон» Загьид Хочбаровги, нижги. Узухъда, гьеб ккола районалъул мухбирзабазе щвараб к1удияб божилъиялъул къарз. Щибаб къойил гурелъулха республикаялъул нухмалъулес «Росдал зах1матчи» кодобе босун ц1алулеб ва х1алт1уе гьединаб къимат  кьолеб ?!. Паркалда лъик1аб х1ухьбахъи т1обит1изе к1очонгеян живгун дандч1вазе рач1аразе махсаро-хоч1ги гьабун, АРГ-ги х1алт1улаб къокъаги ана  Россиялъул халкъазул традиционияб культураялъул централде.

Хъах1аб рокъоса байбихьун – щибаб росулъе

«Дагъистан Республикаялда маданияталъул бугеб ах1вал-х1ал ва гьеб цебет1еялъе нухал» абураб суалгун т1обит1араб данделъи  халалъана лъабгоялдаса ц1ик1к1ун саг1аталъ. Гьелда  республикаялъул Бет1ерас бицана Дагъистаналда  регионалияб, культурияб политикаялъул концепция х1адурун ва гьелъ жиндаса байбихьун бищун рик1к1адаб росулъе щун х1алт1и гьабизе бук1иналъул.  Бих1изабизе ккола, РФялъул субъектазда гьоркьоб Дагъистаналда т1оцебе къабул гьабун буго гьединаб документ. Оптимизация т1обит1улебан, росабалъа г1олохъанаб г1ел нахъе унеб х1ал гьабизе бегьулареблъиги бихьизабуна регионалъул нухмалъулес.

«Г1уц1аби къай гуреб, сурсатал х1алт1изари хисизабун, х1алт1и ц1и гьабун, х1ажаталъуб – рагьунцин бачине ккола х1алт1и» - ян абуна гьес.

Библиотекабазул х1алт1ул бицунаго, Г1абдулат1иповас т1адч1ей гьабуна гьанжесел т1алабазде данде кколел шарт1ал, т1адег1анаб даражаялъул материалиябгун техникияб хьезари жаниб ч1езабурал маданияталъулгун лъай борхизабиялъул централлъун лъугьине кколин гьелан.

Муниципалиял нухмалъулез бак1азда ругел памятникал ц1униялде буссараб цо къадаралъул х1алт1и гьабизе ккеялдеги к1вар кьуна Рамазан Х1ажимурадовичас. Культура цебет1езабиялъе жиндаго рихьулел  нухазул, х1алт1ул иналъул бицун к1алъана гьеб бут1аялъул министр Зарема Бутаеваги. Данделъиялъул ахиралда «Г1агараб ракьалде бугеб рокьиялъухъ» медалалдалъун к1одо гьаюна бащдаб г1асруялдасаги ц1ик1к1ун заманалъ г1олеб г1елалъе тарбиягун лъай кьеялда х1алт1арай  Гусева Маргарита Петровнаги.

Цояб – нухазул Агентствоялъгун районалъул бет1ерас, цойгияб – Х1укуматалъул нахърателалдасан

Х1алт1улаб сапаралъул цо пунктлъун бук1ана республикаялъул нухмалъулес г1адатал г1адамал къабул гьариги.

Г1араниса пенсионер Мух1амад Т1алх1атовас гьарана  ДРялъул Бет1ерасда Илълъа росулъе рачунеб нух ва кьо къач1аялъулъ, автостанциялда сверухъ бак1алде хъил т1еялъулъ кумек.

Гьеб бак1алдаго республикаялъул  нухазул Агентствоялъе ва  районалъул нухмалъулесе т1адкъай гьабуна Г1абдулат1иповас гьеб суал т1убазе.

Лъаг1илухъа Мух1амад  Загьидовасул Лъаг1илухъ ва Ц1ельмес росабазул ясли-ахазе ремонт гьабизе кумек гьарараб суалалъейин абуни, ДРялъул  Х1укуматалъул резервалъулаб фондалдаса г1арац биччазе буюрухъ кьуна республикаялъул нухмалъулес.

Гьединаб пайдаяб, г1одобкъо бук1аниги, ч1агояб бук1ана Дагъистаналъул т1алъиялъул Хунзахъе сапар.

Ф. Мух1амадова