18 февралалда Хунзахъ райадминистрациялъул данделъабазул залалда т1обит1ана районалъул депутатазул собраниялъул анлъабилеб ах1иялъул ункъабилеб сессия. Гьениб г1ахьаллъи гьабуна районалъул бет1ер Саг1ид Юсуповас, гьесул заместителаз, администрациялъул отделазул нухмалъулез, росабазул бут1руз, депутатаз, республикаялъул бет1ерасул  муг1рузулаб территориалияб округалда вугев вакиласул кумекчи Мух1амад Мажидовас, терроралде данде къеркьеялъул рахъалъ республикаялъул бет1ерасул муг1рузулаб территориалияб округалда вугев кумекчи Сайпудин Сайповас, районалъул жамг1иял ва диниял  х1аракатчаг1аз.

Сессиялда гьоркьор лъурал аслиял суалаздасан рук1ана Республикаялъул Бет1ерас халкъияб собраниялде гьабураб Хит1аб гьоркьоб лъей ва районалъул бет1ерас араб соналъ районалда гьабураб х1алт1ул х1асил кьей.

Сессия рагьана ва лъуг1изег1ан нухда бачана районалъул депутатазул Собраниялъул председатель Хваджаев Хваджаца. Хадуб, рехсарал суалазул бицун к1алъазе вахъана районалъул бет1ер Саг1ид Юсупов. Дагъистаналъул бет1ерасул хит1абалъул бицунаго, гьес к1вар буссинабуна ахирал соназ республикаялъул киналго бут1абазда лъугьунел ругел лъик1ал хиса-басиязде:

«Гьале лъабго сон буго республика бац1ц1ад ва ц1и гьабизе байбихьаралдаса,- ян абуна Саг1ид Камиловичас. Амма, терроризмалъул х1инкъи бук1ин жакъа къоялъги бищун аслияб  г1унгут1илъун хут1ун буго Дагъистаналда. Амма, Хунзахъ районалъул жамаг1аталда лъала терроризм, я нилъер диналде, я г1адатазде данде кколеб жо гуреблъи ва нилъ цолъун руго терроризмалъулаб идеологиялде данде къеркьеялъулъ. Гьаб сон Дагъистаналда лъазабун буго муг1рузул сонлъун. Республикаялъул бет1ерас абухъе, Дагъистаналда ругел г1унгут1абазул г1емерисел ккола муг1рузул районазде бук1ине кколеб к1вар кьеч1олъиялъул х1асил. Жакъа къвариг1ун буго муг1рузда экономика, культура ва туризм цебет1езабизе ругел ресаздаса ц1ик1к1ун пайда босизе. Хит1абалда абухъе, киналго бюджеталъулал х1укмаби улкаялъул президент Владимир Путиница рахъарал стратегиял указазде данде кквезе ккола. Гьединго,  гьоркьоб къот1изе тезе бегьуларо  «Экономика хъах1 гьаби» приоритетнияб проект г1умруялде  бахъинабизе гьабулеб х1алт1иги».

Араб соналъ районалда ккараб  аслияб лъугьа-бахъинлъун бук1ана росабазул бут1рузул ва районалъул депутатазул рищиял. Районалъул нухмалъулес т1адч1ей гьабуна гьел рищиязда жигараб г1ахьаллъи гьабунин избирателазин.

Саг1ид Юсуповас х1исаб кьуна араб соналъ районалъул социалиябгун экономикияб г1умруялда ккарал цо-цо х1асилазулги. Араб соналъ муниципалияб бюджеталде бач1ун буго налоговияб  ва налоговияб гуреб г1арцул 167 миллионгун 118 азарго гъурущ, ай план т1убазабун буго 100,8 %. Цогояб  сельхозналог  бак1ариялъул план т1убазабун буго  бихьизабуралдаса 3,3 нухалъ ц1ик1к1ун.

2015 соналда районалъул киналго тайпабазул маг1ишатазда г1езабураб росдал маг1ишаталъул валовияб  продукциялъул къадар бахана 1  миллиардгун 665 миллион гъурщиде. Хаслихъе культурабазул бач1иналъул г1аммаб къадар бахана 4500 тоннаялде,  гьоркьохъеб бач1ин 1 гектаралдаса – 17,2 центнер. Киналго маг1ишатаз цадахъ г1езабун буго ч1агояб ц1айиялда 3700 тонна гьанал, 25500 тонна рахьдал, 300 тонна квасул ва 40 тонна гьац1ул.

Гьединго, Саг1ид Камиловичас бицен  гьабуна инвестициязул проектал г1умруялде рахъинариялъулги. Араб соналъ районалъул 15 росулъ лъималазул площадкабазе лъун руго миллиогун 500 азарго гъурщиде кколеб къайи-къоно. Гьединго площадкаби гьаризе рак1алда бугила районалъул хут1арал росабалъги. Гьединго, Хунзахъ хасав инвестрорасул х1исабалда базе байбихьун буго  зах1маталъул ветераназул ва  бах1арзазул ц1аралда бугеб х1ухьбахъиялъул паркги.

Сайпудин Сайповасги лъик1аб къимат кьуна нилъер районалда киналго бут1абазда гьабулеб бугеб х1алт1уе:

- Жакъа муг1рузулаб территориалияб  округалда кинабго рахъалъ цересел бак1азда буго Хунзахъ район. Районалъул АТКялъул аппараталъул специалистаз к1удияб х1алт1и гьабулеб буго, баркала буго гьезие. Дирго рахъалдасан абизе к1ола, нижеда хадубккунги к1вараб кумек гьабилин нужер районалъеян. Бак1азда ругел росабазул  бут1рузда т1адаб буго, гьеб мекъаб идеологиялдехун гьет1и бугел  г1адамазда ва гьезул  г1агарлъиялда хадуб ц1ик1к1араб халкквей бук1инабизе. Рохьаздеги Сириялдеги рагъизе унел г1олилал  г1ага-божараздаги  лъач1ого гурелъулха гьенире унел, заманалда гьединал г1адамазде к1вар кьуни, к1везе бегьула анц1-анц1, х1атта  нус-нус г1адамазул г1умру хвасар гьабизе – ян абуна гьес.

Ахиралда Саг1ид Камиловичасул х1алт1уе къимат кьун, г1адамазул г1умру-яшав лъик1лъизабиялъе пайда бугел жидерго предложениялгун цере рахъана Гьоц1алъа Ибрагьимов  Ах1мад, Лъаг1илухъа Мусаев Г1али, Гъонохъа Батирова Пат1имат, бекьеч1дерил ва х1арисезул бегавулзаби Г1алиев Артурги Х1абулаев Саг1адулагьги.

Халгьабиялде росарал суалаздасан дандерекъон кколел х1укмабиги къабул гьарун  сессиялъ жиндирго х1алт1и лъуг1изе тана.