29 сентябралъ райадминистрациялъул данделъабазул залалда т1обит1ана «Хунзахъ район» муниципалияб районалъул депутатазул собраниялъул анлъабилеб ах1иялъул микьабилеб сессия. Сессиялда депутатазул халгьабиялде росун рук1ана «Хунзахъ район» муниципалияб районалъул росабазда сверухъ бак1 г1уц1а-к1ут1иялъул х1акъалъулъ къаг1идаби тасдикъ гьари», «Хунзахъ район» муниципалияб районалъул администрациялъул аппараталда хиса-басиял, Админстрациялъул штаталда ругел х1алт1ухъабазул оптимизация гьаби», «Хунзахъ район» муниципалияб районалъул 2016 соналъул бюджеталда хиса-басиял, т1адежураял» г1адал районалъул г1умруялда к1вар бугел суалал.
Сессия рагьана ва г1уц1адго гьеб нухда бачана райсобраниялъул председатель Хваджаев Хважаца.
Халгьабиялде босараб т1оцебесеб к1иябго суалалдасан информация кьуна райадминистрациялъул юрист Г1абдулаев Х1асаница. Аппараталда оптимизация гьабиялда бан къана райадминистрациялда рук1арал СМИялгун информационниял технологиязул ва бухьеналъул, росдал маг1ишаталъул ва предпринимательство цебет1езабиялъул, архитектураялъул, ЖКХялъул, ракьазул ва мал-мулкалъул гьоркьолъабазул, лъай кьеялъул ва г1олилазул политикаялъул отделал. СМИялгун информационниял технологиязул ва бухьеналъул отделалъул ишал т1аде рачана районалъул «Росдал зах1матчи» газеталъул редакциялде. Архитектураялъул, ЖКХялъул ракьазул ва мал-мулкалъул гьоркьорлъабазул отдел бачана «ОКС»муниципалияб бюджеталъулаб учреждениялде. Росдал маг1ишаталъул ва предпринимательство цебет1езабиялъул отделалъул бак1алда г1уц1ана «Росдал маг1ишаталъул ва кванил ниг1матазул отдел» муниципалияб казеннияб учреждение. Лъай кьеялъул ва г1олилазул политикаялъул отделалъул бак1алда гьабуна «Лъай кьеялъул отдел» муниципалияб казеннияб учреждение. Райадминистрациялъул аппараталда къокъ гьабуна муниципалияв хъулухъчи-социалиял программабазул рахъалъ бет1ерав специалистасул штат ва гьеб иш т1адкъана «Росдал маг1ишаталъул ва кванил ниг1матазул отделалда».
2016 соналъул районалъул бюджеталда ккарал цо-цо хиса-басиязул, т1адежураязул бицун к1алъана финотделалъул нухмалъулей Г1алибегова Мадина. Сессиялда х1асилалъулаб к1алъай гьабуна райадминистрациялъул бет1ер Саг1ид Юсуповас. Гьеб ана г1уц1адго, данделъаразул ч1агояб х1аракаталда.
|