Т1олабго Россиялдагог1адин нилъер районалдаги т1адбан унеб буго 18 марталда т1орит1изе ругел улкаялъул Президент вищулел рищиязде х1адурлъи. Районалъул нухмалъиялъ щибаб избирательнияб участокалдеги щун хал-шал гьабулеб буго гьел рищиязде х1адурун ругищали.

Гьедин гьал къоязда жаниб районалъул т1алъи щвана г1емерисел росабалъе.

13 марталда муниципалитеталъул нухмалъиялъ сапар бухьана Харахьи участокалда ругел росабалъе. Т1оцере щвана Гьамущи росулъе. Гьениб избирательнияб участок рагьун буго росдал администрациялъул минаялда жаниб. Участокалда кинабго х1адурун буго рищиязде. Гьебго минаялъуб буго ФАПги. Гьелъул х1алт1ухъабаз районалъул бет1ерасда гьарана медпункталда мебель хисизе кумек гьабеян. Гьенисан щвана Мущули росулъе. Гьенибги росдал советалъул минаялде рагьун бугеб избирательнияб участокалде кинабго х1адурун буго. ч1езабун буго генератор, принтер ва ноутбук. Лъаг1илухъ рищиязул участок х1адурун буго росдал клубалда жаниб, щвана гьеб росулъ ясли-ахалъе ц1ияб балеб бугеб минаялдеги. Гьениб аслияб къаг1идаялъ жанисел х1алт1аби лъуг1ун руго. Саг1ид Юсуповас т1адкъай кьуна 1 маялде минаялда гьарулел х1алт1аби раг1алде рахъинарейилан. Харахьи избирательнияб участок х1адурун буго культураялъул рокъоб ва рищиял т1орит1изе киналго шарт1ал ч1езарун руго. Г1орут1а рищиял т1орит1изе руго росдал клубалъул минаялда жанир. Амма мина ц1акъго басралъун буго, т1ун бач1ине х1адурун буго т1ох. Гьелда хурхун х1укму ккана гьениб капиталияб ремонт гьабиялъул суал халгьабиялде босизе. Хьиндахъ избирательнияб участок буго администрациялъул минаялъуб ва гьенибги кинабго х1адур буго. Лъик1аб х1ал батич1о Коло рищиязул участокалда. Гьениб участок рагьун буго ц1акъго басралъараб, болъодухъан к1иабилеб т1алаялде рахине кколеб росдал клубалда. Гьеб мина х1алица бахъун ч1ун бугин абунигицин мекъи ккеларо. Гьениб бугеб х1алги х1исабалде босун х1укму гьабуна участок школалъул минаялде бахъинабизе. Гьамишт1а ва Моч1охъ росабалъги избирательниял участоказда щибго г1унгут1и батич1о. Амма Г1оч1ло рищиязул участокалда бук1ине кколеб х1адурлъи батич1о. Росдал бегавуласе т1адкъай кьуна кинал г1унгут1абиги лъуг1изарун избирательнияб участок бук1ине кколеб даражаялда ч1езабейилан. Щибаб участокалде щведал районалъул бет1ерас г1адамал ах1улел рук1ана рищиязда г1ахьаллъи гьабизе. Амма г1иц1го рищиязда хурхун гуребги Харахьи участокалда гьабизе х1алт1и г1емер буго. Ч1унтун риххун иналде ккун руго культураялъул рукъзабазул ва цо-цо школазул минаби, г1азу-ц1ад байдал г1одоб х1ет1е ч1ун бажаруледухъ х1арщулъ т1ерхьун ва цо-цо бак1аздаса ччук1ун унел руго нухал. Амма гьабсаг1аталда аслияб цебе ч1араб масъала рищиял т1орит1и бугелъул, г1адамазул г1узрабаде щивго рег1ун гьеч1о.

Гьединалго халгьариял т1орит1ана Бакьагьеч1и, Г1обода, Сивухъ, Гьац1алухъ, Т1ануси, Шотода ва районалъул цогидал росабалъги. Гьенирги г1иси-бикъинал г1унгут1аби хут1изег1ан аслияб къаг1идаялда кинабго х1адурун бугин абизе бегьула.

Рищиязде х1адурлъиялъулъ жидерго бут1а лъолеб буго районалъул жамг1ияб палатаялъги. Палатаялъул председатель Г1усманова Раисатил нухмалъиялда гъоркь т1обит1араб данделъиялда бицана рищиязда тезе ругел жамг1иял халкколел чаг1азул х1акъалъулъ. Халкколел рикьун рук1ине руго жиде-жидеда хадур рухьинарурал участкабазда г1адлу-низамалъул хъаравуллъуда.

И. Мух1амадов