18 октябралда райадминистрациялда т1обит1ана райадминистрациялъул коллегиялъул данделъи. Гьелда г1ахьаллъи гьабуна администрациялъул отделазул нухмалъулез, росабазул бегавулзабаз ва цогидалги районалъул г1уц1абазул нухмалъулез. Данделъиялда гьоркьор лъун рук1ана 2015-2016 ц1алул соналъул, ЕГЭ ва ОГЭ кьеялъул х1асилал гьариялъул ва 2016 соналъул т1оцебесеб ич1го моц1алъ бюджет т1убазабиялъул суалал.

Т1оцебесеб суалалда хурхун баян кьуна лъай кьеялъул отделалъул начальник Залимхан Г1умаровас. Кинабниги районалда х1алт1улеб буго 36 ясли-ах, 41 школа ва 3 т1адеги лъай кьеялъул г1уц1аби. Лъай кьеялъул бут1аялда х1алт1улев вугила азаргоялдаса ц1ик1к1ун педагог, техническиял х1алт1ухъабигун цадахъ гьезул къадар бахунеб буго 1850 ялде. 1407 лъимер хьвадулеб буго ясли-ахазде, гьеб ккола г1аммаб къадаралъул 70%. Гьаб соналъ щуго ясли-ахалда г1уц1ун руго т1адеги группаби. 2015-2016 ц1алул соналда районалъул школазда ц1алулеб бук1ун буго 3017 лъимер. Школа лъуг1ун буго 169 выпускникасул, гьезда гьоркьоса ЕГЭ кьезе к1веч1ого, аттестат щун гьеч1о анкьго ц1алдохъанасе. 11 ц1алдохъан вахъун вуго медалистлъун. Цебесеб ц1алул соналде данде ккун, дагь-дагьккун лъик1лъулел руго ЕГЭ ва ОГЭ кьеялъул х1асилал. Районалда борхулеб буго лъай кьеялъул ва ц1алдохъабазул ц1алул даража. Гьединго Залимхан Х1асановичас бицана районалда г1олел гьеч1ин учительзаби, х1ажат ругила математикаялъул, физикаялъул ва химиялъул специалистал. Пенсиялда ругел муг1алимзаби г1одор ч1ани чанго школа къазе ккеялъул х1инкъи бугила. Ц1акъ дагьаб гурони гьеч1ила т1аде рач1унел ц1иял учительзабазул къадар, ругезулги г1ураб даражаялъул лъайги гьеч1илан бихьизабуна гьес.

К1иабилеб суалалда хурхун к1алъай гьабуна финансазул отделалъул нухмалъулей Г1алибекова Мадинаца. Исана 9 моц1ида жаниб районалъул бюджеталде бач1ун буго 519 миллионгун 427 азарго гъурущ, гьеб кколеб буго лъаг1алил бихьизабиялъул 76,8%. Т1аде бач1унеб г1арцул аслияб бут1а кколеб буго физическиял лицабазул доходаздаса рач1унел налогал. Гьебго 9 моц1ида жаниб бюджеталъул т1аса унеб бут1а бащалъун буго 497 миллионгун 423 азарго гъурщида, ай лъаг1алил бихьизабиялъул 73,2%. Бюджеталъул 404 миллионгун 863 азарго гъурущ биччан буго социалияб сфераялде. Бищун ц1ик1к1ун г1арцул харж гьабун буго лъай кьеялъул бут1аялде-368 миллионгун 141 азарго гъурущ.

Ахиралда данделъиялъул г1ахьалчаг1аз загьир гьаруна жидерго пикраби ва гьоркьор лъурал суалазда хурхун къабул гьаруна рекъон кколел х1укмаби.

И. Мух1амадов.