Араб анкьалъ нилъер районалде вач1ун вук1ана инвестициязул ва предпринимательствалъул рахъалъ республикаялъулаб Агенствоялъул нухмалъулев Башир Мух1амадов. Райадминистрациялда гьевгун дандч1вана районалъул нухмалъиги предпринимателалги.
Данделъаразе саламги кьун Башир Мух1амадовас бицана предпринимательствалде республикаялъулги улкаялъулги т1алъиялъ кьолеб бугеб к1варалъул. Гьедин предпринимателазе квег1енлъиялъе г1уц1араб бугила жидер агенствоги. Агенствоялъ квербакъулеб буго предпринимателазе грантал, кредитал ва цогидабги пачалихъалъул рахъалдасан кумек щвезе. Гьединго г1уц1ун бугила проектазул мобильнияб офисги.
Районалда г1исинаб ва гьоркьохъеб бизнес цебет1еялъе гьабулеб бугеб х1алт1ул бицана райадминистрациялъул экономикаялъул отделалъул нухмалъулей Пат1имат Набиевалъ. Районалда хъвай-хъваг1ай гьабун бугила 1096 г1исинаб предпринимательствалъул субъектазул, гьезда гьоркьоса 284 индивидуалияв предприниматель ва 691 юридикияв лицо кколила. Араб соналъ г1исинаб предпринимательствалъ гьабун буго 594,8 миллион гъурущалде даран-базар. Гьеб бут1аялда х1алт1улев вуго 2200 чи. Г1исинаб бизнесалдасан бач1ун буго 24630 гъурущ налогазулги, гьелдасан 9800 гъурущ ун буго муниципалияб бюджеталде.
2016 соналъ хасал инвестицияздалъун районалда бан буго лъабго футбол х1алеб майдан, паркал, ва 22 километралъул манзилалда ч1ун буго 5000 декоративияб гъвет1.
Гиничукь бан бахъун буго 6000 г1анк1у-х1елекоялъе бихьизабураб ферма. Хьиндахъ «Сокол» КФХялда лъаг1алида жаниб г1езабулеб буго 15-20 тонна форелалъул. Т1агьада «Аграрник» СПКялда ине руго ччуг1а г1езабиялъул ва 0,7 гектаралда теплицаби раялъул х1алт1аби. Гьоц1алъ х1алт1изе лъугьун буго пихъилгун овощазул ниг1матал х1адурулеб ООО «Гоцатль» абураб цех. Лъаг1алие гьениб биччалеб буго 15-20 миллион гъурщиде къайи. 2016 соналъ 3 КФХялъе щун руго грантал, гьединго 93 миллион гъурщил пачалихъияб кумек щун буго росдал маг1ишаталъул ниг1матал г1езарулел фермеразе.
Агенствоялъул кумекалдалъунги гъоркьисала районалдаса 14 чиясе щун руго грантал.
Ахиралда Саг1ид Юсуповас баркала кьуна гьалбадерие ва гьез бицаралда хурхун иш т1аде кколезе хасал т1адкъаялги гьаруна. Предпринимателаз кьуна жидерго суалалги.
|